ەلوردا • 16 قازان، 2021

ەلوردادا قوعامدىق كولىكتەردە جول اقىسىن بانك كارتاسى ارقىلى تولەۋگە بولادى

169 رەت كورسەتىلدى

18 قازاننان باستاپ نۇر-سۇلتان قالاسىندا بىرنەشە قوعامدىق كولىك باعىتتارىندا جول ءجۇرۋ اقىسىن كەز كەلگەن ەكىنشى دەڭگەيدەگى بانكتىڭ كارتاسىمەن تولەۋگە بولادى، دەپ حابارلايدى Egemen.kz.

CTS كومپانياسىنىڭ مالىمەتىنشە، بۇل جاڭاشىلدىق پيلوتتىق رەجيمدە ىسكە قوسىلادى جانە 31 قازانعا دەيىن جالعاسادى.

«VISA جانە Mastercard كارتالارى، سونداي-اق NFC جۇيەسىمەن جابدىقتالعان سمارتفون ارقىلى تولەم جاساۋعا بولادى. ترانزاكتسيا ءۇشىن ولاردى ۆاليداتوردىڭ جانىندا ورنالاسقان ارنايى تەرمينالعا تيگىزۋ جەتكىلىكتى»، دەدى كومپانيادان.

ايتا كەتەيىك، پيلوتتىق جوبا №61 قالالىق باعىتتاعى ءۇش اۆتوبۋستا، سونداي-اق قالا ماڭىنا قاتىنايتىن №309، 310، 315 باعدارلاردا جۇزەگە اسىرىلادى.

اۆتوبۋستار ارنايى سايكەستەندىرۋ جاپسىرمالارىمەن ەرەكشەلەنەدى. بانك كارتاسىمەن تولەۋ كەزىندەگى جول ءجۇرۋ قۇنى وزگەرىسسىز قالادى.

پيلوتتىق جوبا بانك كارتاسىمەن جول اقىسىن تولەۋ ۆاليداتورلارىن سىناقتان وتكىزۋگە مۇمكىندىك بەرەدى. كەيىن بۇل قىزمەت بارلىق اۆتوبۋستاردا قولجەتىمدى بولماق.

سوڭعى جاڭالىقتار

ۇقساس جاڭالىقتار