ۇكىمەت • 15 قازان، 2021

پوليتسيانىڭ سەرۆيستىك مودەلىن كەڭەيتۋ ماسەلەلەرى تالقىلاندى

107 رەت كورسەتىلدى

سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ دەپۋتاتتارى ىشكى ىستەر مينيسترلىگىنە بارىپ، پوليتسيانىڭ سەرۆيستىك مودەلىن كەڭەيتۋ ماسەلەلەرى بويىنشا كەزدەسۋ وتكىزدى، دەپ حابارلايدى Egemen.kz.

ءىس-شاراعا پرەزيدەنت اكىمشىلىگىنىڭ وكىلى الەكسەي كالايچيدي، ءىىم باسشىلىعى، ونلاين-رەجيمدە ءماسليحات حاتشىلارى، وڭىرلەردەگى پوليتسيا دەپارتامەنتتەرىنىڭ باسشىلارى جانە وبلىستار مەن نۇر-سۇلتان، الماتى، شىمكەنت قالالارى اكىمدەرىنىڭ ورىنباسارلارى قاتىستى.

كەزدەسۋدى اشقان اتالعان كوميتەتتىڭ توراعاسى ۆلاديمير ۆولكوۆ اتالعان ءىس-شارا ىشكى ىستەر ورگاندارىن رەفورمالاۋ اياسىندا جۇرگىزىلگەن بىرلەسكەن جۇمىستاردىڭ لايىقتى جالعاسى ەكەنىن ايتتى. كەلەسى قادام – پوليتسيانىڭ سەرۆيستىك مودەلىن كەڭەيتۋ. مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ءدال وسىنداي مىندەت جۇكتەدى.

سونداي-اق سەناتورلار مەن كەزدەسۋگە قاتىسۋشىلار ىشكى ىستەر ورگاندارى جۇيەسىن رەفورمالاۋ بويىنشا قابىلدانعان شارالارعا توقتالىپ ءوتتى. بۇل – سالاعا قاتىسى جوق بىرقاتار قىزمەتتەن بوساتۋ، ۋچاسكەلىك ينسپەكتورلاردىڭ مارتەبەسىن ارتتىرۋ، ولاردىڭ تەحنيكالىق جاراقتاندىرىلۋىن جاقسارتۋ جانە تاعى باسقالارى. سونىمەن بىرگە دەپۋتاتتار وسى سالاداعى وزەكتى ماسەلەلەرگە دە نازار اۋداردى.

«ۋچاسكەلىك ينسپەكتورلار مەن ولاردىڭ كومەكشىلەرىنىڭ قىزمەتىن شتاتتىق تۇرعىدان نىعايتۋدىڭ ماڭىزى زور. ىشكى ىستەر مينيسترلىگىنىڭ ءتيىستى نورماسىنا ساي بولۋ ءۇشىن ءالى 3 مىڭعا جۋىق ۋچاسكەلىك ينسپەكتور قاجەت ەكەنىن بىلەمىز. بۇل ولقىلىقتىڭ ورنىن ىشكى رەزەرۆتەردى قايتا ءبولۋ ارقىلى تولتىرۋعا بولادى. الايدا، جەرگىلىكتى اتقارۋشى ورگاندار مەن ءماسليحاتتار تاراپىنان قارجىلاي كومەك قاجەت»، دەپ ءتۇسىندىردى ۆلاديمير ۆولكوۆ.

كەزدەسۋ بارىسىندا دەپۋتاتتار جاڭا ۋچاسكەلىك پوليتسيا پۋنكتەرىن سالۋ قاجەتتىگىنە دە توقتالا كەتتى. بۇل «قولجەتىمدى پوليتسيا» قاعيداتىن قامتاماسىز ەتۋ ءۇشىن ماڭىزدى. سەناتورلار بۇل ىستە كەيبىر وبلىستاردا وڭ ناتيجەلەردىڭ بار ەكەنىن ايتىپ، جەتىلدىرەتىن تۇستاردىڭ دا از ەمەسىنە كوڭىل ءبولدى. تاياۋدا اشىلۋعا ءتيىس 78 ۋچاسكەلىك پوليتسيا پۋنكتىنىڭ 27-ءسى عانا جۇمىس ىستەپ تۇر. وسىعان بايلانىستى سەناتورلار ءماسليحاتتار مەن اكىمدىكتەردى اتالعان باعىتتا بەلسەندىلىك تانىتۋعا شاقىردى.

كەزدەسۋ بارىسىندا ىشكى ىستەر ءمينيسترى ەرلان تۇرعىمباەۆ ۆەدومستۆونىڭ پوليتسيانىڭ سەرۆيستىك مودەلىن كەڭەيتۋ بويىنشا اتقارعان جۇمىسى تۋرالى ايتىپ بەردى.

سوڭعى جاڭالىقتار

ۇقساس جاڭالىقتار