برەكەشەۆتىڭ ايتۋىنشا, ۇلتتىق جوبا 4 نەگىزگى باعىتتى قامتيدى.
ءبىرىنشى باعىت - «تازا قازاقستان» اتموسفەرالىق اۋا ساپاسىن جاقسارتۋ, قالدىقتاردى باسقارۋ جانە ەلىمىزدىڭ سۋ وبەكتىلەرىنىڭ ەكوجۇيەلەرىن ساقتاۋ سياقتى نەگىزگى ەكولوگيالىق پروبلەمالاردى شەشۋگە ىقپال ەتەدى.
«باعىت شەڭبەرىندە 16 ءىرى ونەركاسىپ كاسىپورىندارىنداعى شىعارىندىلاردى 5 جىل ىشىندە 20%-عا قىسقارتۋ بولجانىپ وتىر. بولەك جيناۋ ءۇشىن 8 مىڭنان استام كونتەينەر ورناتۋ, قتق-نىڭ ۇلەسى مەن كادەگە جاراتىلۋىن 18%-دان 34%-عا دەيىن ارتتىرۋ جوسپارلانۋدا. سۋ وبەكتىلەرىنىڭ ەكوجۇيەلەرىن ساقتاۋ بولىگىندە «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» جوباسىنىڭ ەكىنشى كەزەڭىن ىسكە اسىرۋ جوسپارلانۋدا», دەدى ول.
ەكىنشى باعىت - «ۇنەمدى قازاقستان». «سۋدى ۇنەمدى پايدالانۋ ەسەبىنەن ونىمدىلىكتى ارتتىرۋ» مىندەتى شەڭبەرىندە 401 ارنانى رەكونسترۋكتسيالاۋ جانە 212 ارنانى تسيفرلاندىرۋ ەسەبىنەن سۋارۋ كەزىندە سۋ شىعىنىن 4 كم3 قىسقارتۋ جوسپارلانۋدا.
«ۇلتتىق جوبادا سۋارمالى جەرلەردى 600 مىڭ گەكتارعا ۇلعايتۋ بويىنشا ءىس-شارالار كوزدەلگەن, قوسىمشا سۋارۋ كوزدەرىن قۇرۋ ءۇشىن 2025 جىلعا دەيىن اقمولا, باتىس قازاقستان, جامبىل, قىزىلوردا جانە تۇركىستان وبلىستارىندا جيناقتاۋ كولەمى 1,7 كم3 بولاتىن 9 جاڭا سۋ قويماسىن سالۋ جوسپارلانۋدا. اتالعان باعىت اياسىنداعى ەكىنشى مىندەت - ونەركاسىپتىك كاسىپورىنداردىڭ تەحنولوگيالىق جابدىقتارىن جاڭعىرتۋ جانە بيۋدجەت سەكتورىنداعى جارىقتاندىرۋدى جاڭعىرتۋ ەسەبىنەن ەنەرگيا تيىمدىلىگىن ارتتىرۋ», دەپ اتاپ ءوتتى ەكولوگيا مينيسترلىگىنىڭ باسشىسى.
بۇدان ءارى «تابيعات» باعىتى اياسىندا مەملەكەت باسشىسىنىڭ ءومىر ءسۇرۋ دەڭگەيى 65%-دان كەم ەمەس 2 ملرد اعاش وتىرعىزۋ جونىندەگى تاپسىرماسىن ىسكە اسىرۋ جانە سيرەك كەزدەسەتىن جانە جويىلىپ بارا جاتقان جانۋارلار تۇرلەرىنىڭ سانىن قالپىنا كەلتىرۋ جونىندەگى ءىس-شارالاردى جۇرگىزۋ كوزدەلىپ وتىر.
ء«تورتىنشى باعىت - «ەكولوگيا بولاشاعى» حالىقتىڭ ەكوقۇرىلىمى مەن مادەنيەتىنىڭ دەڭگەيىن ارتتىرۋعا باعىتتالعان», دەدى ول.
مينيستر ۇلتتىق جوبانى ىسكە اسىرۋ حالىق ءۇشىن قولايلى ءومىر ءسۇرۋ ورتاسىن قۇرۋعا جانە ەكولوگيالىق جاعدايدى جاقسارتۋعا, قالدىقتاردى قايتا وڭدەۋ جانە ەكولوگيالىق قاۋىپسىز كادەگە جاراتۋ ينفراقۇرىلىمىن قۇرۋعا مۇمكىندىك بەرەتىنىن اتاپ ءوتتى.
