1967-1968 جىلدارى دنەپروپەتروۆسك پەن ۆيلنيۋس قالالارىندا وتكەن حيميادان وقۋشىلاردىڭ بۇكىلوداقتىق وليمپيادالارىنا قاتىستى. قاراعاندىنىڭ №1 ورتا مەكتەبىن ۇزدىك ءبىتىرىپ, س.م.كيروۆ اتىنداعى قازمۋ-ءدىڭ حيميا فاكۋلتەتىنە وقۋعا تۇسكەن ستۋدەنتتىك جىلدارى عىلىمعا ۇمتىلىپ, ۇيىرمەلەرگە بەلسەندى قاتىسادى, باياندامالار جاسايدى, لەنين اتىنداعى ستيپەنديا يەگەرى اتانادى. كەيىن ۋنيۆەرسيتەتتىڭ ورگانيكالىق حيميا كافەدراسى جانىنداعى كۇندىزگى اسپيرانتۋراعا ءتۇسىپ, كانديداتتىق ديسسەرتاتسياسىن ءساتتى قورعادى.
قازكسر عا كوررەسپوندەنت-مۇشەسى ا.ش.شاريفكانوۆتىڭ جەتەكشىلىگىمەن ورگانيكالىق سينتەز سالاسىنداعى كەيىنگى زەرتتەۋلەرىن باستاۋعا مۇمكىندىك الادى. قاراعاندى مەملەكەتتىك ۋنيۆەرسيتەتىندە جۇمىس ىستەگەننەن كەيىن قازكسر عا ورگانيكالىق سينتەز جانە كومىر حيمياسى ينستيتۋتىنىڭ عىلىمي حاتشىسى ەتىپ تاعايىندالادى. ءدال وسى عىلىمي مەكەمەنىڭ قابىرعاسىندا تالانتتى عالىم, بەلسەندى ۇيىمداستىرۋشى رەتىندەگى قابىلەتى كەڭىنەن كورىندى. 1987 جىلى اكادەميك م.ج.جۇرىنوۆتىڭ جەتەكشىلىگىمەن ورگانيكالىق قوسىلىستاردىڭ ەلەكتروحيمياسى زەرتحاناسىن ۇيىمداستىردى. ول نازىك ورگانيكالىق سينتەز, تابيعي قوسىلىستار حيمياسى, فارماكولوگيا جانە كۆانتتىق حيميا توعىسىنداعى بيولوگيالىق بەلسەندى زاتتار سينتەزى سالاسىنداعى جاڭا عىلىمي باعىتتى دامىتتى. وسى ۇدەرىستەردىڭ زاڭدىلىقتارى مەن مەحانيزمدەرىن جەتكىلىكتى زەرتتەۋ ناتيجەسىندە 1991 جىلى «جاڭا بيوبەلسەندى الكالويدتار تۋىندىلارىنىڭ سينتەزى» تاقىرىبىنداعى دوكتورلىق ديسسەرتاتسياسىن قورعادى. 1992 جىلى وداقتىق جوعارى اتتەستاتتاۋ كوميسسياسى پروفەسسور عىلىمي اتاعىن بەردى. وسى جىلى عىلىم اكادەمياسىنىڭ ۇزدىك عىلىمي جۇمىس كونكۋرسىندا ات-قورىنىڭ مەدالى مەن سىيلىقتارىنا يە بولدى. 1994 جىلى ۇعا كوررەسپوندەنت-مۇشەسى, ال 2003 جىلى ۇعا اكادەميگى بولىپ سايلاندى.
1996-1998 جىلدارى ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ءبىرىنشى پرورەكتورى لاۋازىمىندا جەمىستى جۇمىس ىستەگەن ول قارمۋ تاريحىندا حيميا عىلىمدارى سالاسىندا ديسسەرتاتسيالار قورعاۋ بويىنشا ءبىرىنشى ديسسەرتاتسيالىق كەڭەس قۇردى. 1998 جىلى ۇعا ورگانيكالىق سينتەز جانە كومىر حيمياسى ينستيتۋتىنا ديرەكتوردىڭ عىلىمي جۇمىس جونىندەگى ورىنباسارى بولىپ ورالادى جانە جاڭادان قۇرىلعان رەسەي-قازاقستان زاماناۋي گۋمانيتارلىق ۋنيۆەرسيتەتىنىڭ ءبىرىنشى پرورەكتورى بولىپ تاعايىندالادى. 1999 جىلى ۇعا ورتالىق قازاقستان بولىمشەسى توراعاسىنىڭ ورىنباسارى جانە سونىمەن قاتار وسكي ديرەكتورىنىڭ ورىنباسارى بولىپ بەكىتىلدى.
نازىك ورگانيكالىق سينتەز, الكالويدتار حيمياسى, فارماكولوگيا جانە كۆانتتىق حيميا توعىسىنداعى بيولوگيالىق بەلسەندى زاتتار سينتەزى سالاسىندا جاڭا عىلىمي باعىت قۇرعانى ءۇشىن ا.عازاليەۆ 2003 جىلى ەلىمىزدىڭ ءبىلىم, عىلىم جانە تەحنيكا سالاسىنداعى مەملەكەتتىك سىيلىعىنىڭ لاۋرەاتى اتاندى.
2006 جىلى ارستان ماۋلەن ۇلى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ رەكتورى بولىپ تاعايىندالدى. جاڭا لاۋازىمدا ونىڭ بارلىق ۇيىمداستىرۋشىلىق تالانتى كورىندى. ونىڭ باسشىلىعىمەن شقمۋ قازاقستاننىڭ جوعارى وقۋ ورىندارىنىڭ رەيتينگىندە 17-ورىننان 4-ورىنعا كوتەرىلدى. ونىڭ باستاماسىمەن قازاق ءتىل ءبىلىمىنىڭ نەگىزىن قالاۋشى سارسەن امانجولوۆقا ەسكەرتكىش قويىلدى. 2007 جىلى ۋنيۆەرسيتەت عيماراتىنىڭ الدىندا مەملەكەتتىك حاتشى ورالباي ابدىكارىموۆتىڭ قاتىسۋىمەن سالتاناتتى تۇردە اشىلعان ەسكەرتكىش كەشەنى وسكەمەن قالاسىنىڭ كورىكتى جەرلەرىنىڭ بىرىنە اينالدى. وسكەمەن قالاسىنداعى تەكستيلششيكتەر داڭعىلى ۇلى عالىم قانىش ساتباەۆ اتىنداعى داڭعىل بولىپ قايتا اتالدى. ۋريتسكي كوشەسى ۇلى وتان سوعىسىنىڭ باتىرى, پارتيزان قاسىم قايسەنوۆ كوشەسى بولىپ وزگەرتىلدى. ارستان ماۋلەن ۇلى پارلامەنت ءماجىلىسىنىڭ دەپۋتاتى س.فەرحومەن بىرگە قالا كوشەلەرىنىڭ بىرىنە شقمۋ پانكراتەۆ باعىنىڭ نەگىزىن قالاۋشى گۋستاۆ ۆيستەنيۋستىڭ ەسىمىن بەرۋگە اتسالىستى. 1997 جىلى باستالعان قوعام قايراتكەرلەرى مەن عالىمدارىن ماڭگى ەستە قالدىرۋ جونىندەگى قوعامدىق جۇمىسى وسى كۇنگە دەيىن تولاستاعان ەمەس. ۇستازى ءارى تالىمگەرى اكادەميك ا.شاريفقانوۆتىڭ ەسىمى الماتى قالاسىندا ۇلىقتالسا, بۇقار جىراۋ اۋدانىندا جىرجىس قاجىنىڭ ەسىمىن ەل ەسىنە سالعان ەلەۋلى ءىس-شارالار اتقاردى. سول سياقتى قازكسر ەڭبەك سىڭىرگەن مۇعالىمى, ۇلى وتان سوعىسىنىڭ ارداگەرى م.عازاليەۆ, پارتيالىق مەملەكەتتىك قۇرىلىس ارداگەرى ن.تولەپوۆ, قارمتۋ العاشقى رەكتورى, سوتسياليستىك ەڭبەك ەرى, اكادەميك ا.ساعىنوۆ ىسپەتتى باسقا دا بەلگىلى ءبىلىم, عىلىم جانە قوعام قايراتكەرلەرىنىڭ مۇرالارىن ناسيحاتتاۋعا ۇلكەن ۇلەس قوستى. ولاردىڭ اتىندا ەسكەرتكىش-تاقتالار, اۋديتوريالار, گالەرەيالار اشىلىپ, كوشەلەرگە ەسىمدەرى بەرىلدى, كىتاپتارى جارىق كوردى.
2008-2016 جىلدارى ا.عازاليەۆ قاراعاندى مەملەكەتتىك تەحنيكالىق ۋنيۆەرسيتەتىن تابىستى باسقاردى. جوعارى وقۋ ورنى وقۋ, وقۋ-ادىستەمەلىك, عىلىمي جانە تاربيە جۇمىسىن قوسا العاندا بارلىق پوزيتسيا بويىنشا قارقىندى دامىدى. بىرەگەي مودەلدەر قۇرىلىپ, قارمتۋ تاجىريبەسىنە ەنگىزىلدى: تۇڭعىش پرەزيدەنت ن.نازارباەۆتىڭ ۇلگىسىندە پاتريوتتىق تاربيە بەرۋ مودەلى «ماڭگىلىك ەل» جالپىۇلتتىق يدەياسىن ىسكە اسىرۋ شەڭبەرىندە ازىرلەنگەن جانە ۋنيۆەرسيتەت ستۋدەنتتەرىن وقىتۋدىڭ بارلىق كەزەڭىندە مەملەكەتتىڭ قوعامدىق-ساياسي قىزمەتىنىڭ قازىرگى زامانعى پەداگوگيكاسى مەن پراكتيكاسى ازىرلەگەن ينتەراكتيۆتى نىساندارى مەن ادىستەرىن ەسكەرە وتىرىپ, پاتريوتتىق تاربيەنى كەشەندى جۇزەگە اسىراتىن ءتيىمدى جۇيە سانالادى. مودەلدىڭ عىلىمي-ادىستەمەلىك بازاسى مەملەكەتتىك جانە ورىس تىلدەرىندە شىعارىلعان جوو-نىڭ 230 وزەكتى ازىرلەمەلەرىنىڭ كەشەنىمەن ۇسىنىلعان. 2010 جىلى ءبىلىم جانە عىلىم مينيسترلىگى بۇل مودەلدى قازاقستاننىڭ 50 جەتەكشى جوعارى وقۋ ورنى مەن بىرقاتار كوللەدجدەرىنە مەملەكەتتىك جانە ورىس تىلدەرىندە 30 بەينەفيلمنەن, 19 كىتاپتان جانە 17 كومپاكت-ديسكىدەن اقپاراتتىق-ادىستەمەلىك ماتەريالدار جيىنتىعى تۇرىندە بەردى. سونداي-اق ستۋدەنتتىك ءوزىن ءوزى باسقارۋ, اتا-انالارمەن جۇمىس, جوعارى وقۋ ورنىن باسقارۋ, ەلەكتروندى ۋنيۆەرسيتەت, تەحنيكالىق جانە كاسىپتىك ءبىلىم بەرۋ, قوسارلى ءبىلىم بەرۋ, كورپوراتيۆتىك ۋنيۆەرسيتەت مودەلدەرى جوعارى وقۋ ورنىنىڭ جۇمىسىن جان-جاقتى قۇرۋعا مۇمكىندىك بەردى.
2011 جىلدىڭ قازان ايىندا قارمتۋ-دىڭ حالىقارالىق قامقورشىلىق كەڭەسى ۇيىمداستىرىلدى. ونىڭ قۇرامىنا جەتەكشى ۋنيۆەرسيتەتتەر وكىلدەرىنەن, رەسەي, ەۋرووداق, اقش, كانادا جانە قىتايدىڭ تانىمال ساياسي جانە قوعام قايراتكەرلەرىنەن, سونداي-اق ترانسۇلتتىق كورپوراتسيالار مەن كورپوراتيۆتىك ۋنيۆەرسيتەت كاسىپورىندارىنىڭ ءبىرىنشى باسشىلارىنان 20-دان استام شەتەلدىك مۇشە كىردى. حالىقارالىق قامقورشىلىق كەڭەسى مۇشەلەرىنىڭ كومەگىمەن ۋنيۆەرسيتەتتىڭ ماتەريالدىق-تەحنيكالىق بازاسى, عىلىمي-وندىرىستىك بايلانىستارى مەن ءيميدجى نىعايتىلدى. ا.عازاليەۆتىڭ باستاماسى بويىنشا قارمتۋ-دا قۇرامىنا 7 عزي, 35 عزز, 3 عىلىمي-تەحنيكالىق ورتالىق, ستۋدەنتتىك يننوۆاتسيالار ورتالىعى, قازاقستان رەسپۋبليكاسىندا بىرەگەي ينجەنەرلىك بەيىندەگى زەرتحانا جانە «پوليتەح» تەحنوپاركى كىرەتىن ينتەگراتسيالانعان ۋنيۆەرسيتەتتىك يننوۆاتسيالىق عىلىمي-تەحنيكالىق كەشەن ۇيىمداستىرىلدى, ونىڭ قۇرامىندا 6 عىلىمي-زەرتتەۋ زەرتحاناسى جانە 4 يننوۆاتسيالىق كاسىپورىن جۇمىس ىستەيدى. كەشەندى ىقشام ورنالاستىرۋ ءۇشىن قارمتۋ-دا جالپى اۋدانى 4 مىڭ شارشى مەتر «حاي تەك» جوعارى تەحنولوگيالار ايماعى قۇرىلدى. ۋنيۆەرسيتەتتە «مينەرالدىق شيكىزات رەسۋرستارىن كەشەندى يگەرۋ» ينجەنەرلىك بەيىندەگى سىناق زەرتحاناسى اشىلىپ, تابىستى دامىپ كەلەدى. قارمتۋ جانىنداعى ينجەنەرلىك بەيىندەگى سىناق زەرتحاناسىنىڭ قىزمەتى عزج ناتيجەلىلىگى جانە ونى وندىرىسكە ەنگىزۋ بويىنشا رەسپۋبليكادا ۇزدىك دەپ تانىلدى. 2013 جىلعى 20 ماۋسىمدا ينجەنەرلىك بەيىندەگى سىناق زەرتحاناسىنىڭ جوباسى عىلىم جانە كوممەرتسيالاندىرۋ جونىندەگى حالىقارالىق كەڭەستىڭ رەسپۋبليكالىق كونكۋرسىندا جەڭىمپاز اتاندى جانە حالىقارالىق بانكتىڭ 2 ملن دوللار مولشەرىندەگى گرانتىن الدى. ناتيجەسىندە قارمتۋ نەگىزىندە حالىقارالىق ماتەريالتانۋ ورتالىعى قۇرىلدى. قارمتۋ عىلىمي-تەحنيكالىق كەشەنىنىڭ قۇرامىندا ونەركاسىپتەگى يننوۆاتسيالار مەن ينجينيرينگكە باعىتتالعان عزي تابىستى جۇمىس ىستەيدى. ونەركاسىپتىك ەكولوگيا عزي ونەركاسىپتىك گازداردى كادەگە جاراتۋدىڭ بىرەگەي تەحنولوگيالارىن جاساۋ جانە باعالى حيميالىق شيكىزاتتى الۋ سالاسىنداعى زەرتتەۋلەر ءۇشىن كورپوراتيۆتىك ۋنيۆەرسيتەت مۇشەسى – Absalut Eسوlogy جشس-مەن بىرلەسىپ قۇرىلدى. قارمتۋ نەگىزىندە دانەكەرلەۋ ينستيتۋتى اشىلدى, ول حالىقارالىق اككرەديتتەۋدەن ءساتتى ءوتتى جانە 2012 جىلدىڭ قازان ايىنان باستاپ كاسىپورىنداردىڭ (ارسەلور ميتتال تەمىرتاۋ, قاراشىعاناق پەترولەۋم, ەرساي, بوگاتىر كومىر جانە ت.ب.) تاپسىرىستارى بويىنشا دانەكەرلەۋ جۇمىسشىلارىنىڭ, تەحنيكتەرى مەن ينجەنەرلەرىنىڭ ءبىرىنشى لەگىن دايىنداۋدى باستادى. جوبا ەلباسى ن.نازارباەۆتىڭ تاپسىرماسىنا سايكەس فرانتسۋزدىق TOTAL مۇناي-گاز كومپانياسىنىڭ باستاماسىمەن جۇزەگە اسىرىلدى. 2016 جىلى اشىلعان «مەتان ەنەرگەتيكاسىنىڭ زەرتحاناسى» كومىر قاباتتارىنداعى مەتاندى بارلاۋ جانە ءوندىرۋ بويىنشا عىلىمي نەگىزدەردى ازىرلەۋ جانە ۇسىنىستار بەرۋ ءۇشىن نەگىز بولدى. سونىمەن بىرگە قارمتۋ-دا جاڭا قۇرىلىمدىق بولىمشەلەر قۇرىلدى: زاماناۋي كومپيۋتەرلەرمەن جابدىقتالعان ەلەكتروندى وقۋ زالدارى, ۋنيۆەرسيتەت تاريحىنىڭ مۇراجايى تولىعىمەن جاڭارتىلدى, «ش.قۇدايبەرديەۆ اتىنداعى تىلدەردىڭ ۇشتۇعىرلىعى» ورتالىعى جانە اكادەميك ا.س.ساعىنوۆ اتىنداعى ء«بىلىم مەن عىلىمداعى يننوۆاتسيالار» كورمەسى اشىلدى. بولون دەكلاراتسياسىنىڭ نەگىزگى قاعيداتتارىن ستۋدەنتتەردىڭ پاندەردى ەركىن تاڭداۋى, ىشكى جانە سىرتقى اكادەميالىق ۇتقىرلىقتى قامتاماسىز ەتۋ بولىگىندە تولىققاندى ەنگىزۋدى جۇزەگە اسىراتىن بولون پروتسەسى دەپارتامەنتى قۇرىلدى. سونىمەن قاتار 16 يننوۆاتسيالىق ورتالىعى جۇمىس ىستەيدى. ەكونوميكانىڭ ناقتى سەكتورىندا تالاپ ەتىلەتىن وزەكتى باعىتتار بويىنشا عىلىمي زەرتتەۋلەر, ينجينيرينگ جانە مامانداردىڭ بىلىكتىلىگىن ارتتىرۋ سالاسىندا يننوۆاتسيالىق ورتالىقتار قۇرۋ ۋنيۆەرسيتەتتىڭ ءبىلىم بەرۋ جانە عىلىمي قىزمەتىن دامىتۋدىڭ جانە «100 ناقتى قادام» ۇلت جوسپارىن ىسكە اسىرۋدىڭ ماڭىزدى باعىتتارىنىڭ ءبىرى.
2009 جىلدان باستاپ ارستان ماۋلەن ۇلىنىڭ باستاماسىمەن قارمتۋ-دا جىل سايىنعى حالىقارالىق عىلىمي-پراكتيكالىق كونفەرەنتسياعا ۋنيۆەرسيتەتتىڭ نەگىزىن قالاۋشى ابىلقاس ساعىنوۆتىڭ ەسىمى بەرىلىپ, «ساعىنوۆ وقۋلارى» دەپ اتالادى.
قارمتۋ-دىڭ حالىقارالىق قىزمەتى اقش, كانادا, ۇلىبريتانيا, گەرمانيا, اۋستراليا, قىتاي, ءباا, پاكىستان, ۋكراينا, رەسەي جانە باسقا ەلدەردىڭ جەتەكشى ۋنيۆەرسيتەتتەرىمەن ىنتىماقتاستىق تۋرالى 160-تان استام مەموراندۋمدار اياسىندا بەلسەندى جۇرگىزىلدى. ۋنيۆەرسيتەتتە اقش, كانادا, گەرمانيا, جاپونيا, فرانتسيا, شۆەيتساريا جانە ت.ب. الەمنىڭ 250-دەن استام جەتەكشى عالىمدارى, ونىڭ ىشىندە الەمدىك رەيتينگتىڭ توپ-10, توپ-30 جانە توپ-500 (گارۆارد, گونكونگ جانە كليۆلەند ۋنيۆەرسيتەتتەرى) قۇرامىنا كىرەتىن ۋنيۆەرسيتەتتەر وكىلدەرى زاماناۋي عىلىمي زەرتتەۋلەر بويىنشا دارىستەر, سەمينارلار مەن پرەزەنتاتسيالار وتكىزدى.
جوو TEMPUS, Erasmus Mundus, سينەرگيا, شىۇ ۋنيۆەرسيتەتى حالىقارالىق ءبىلىم بەرۋ جوبالارىنا قاتىسادى. بۇل رەتتە قارمتۋ Festo گەرمان-اۋستريالىق كونتسەرنىنىڭ قامقورلىعىمەن ىسكە اسىرىلاتىن بىرەگەي حالىقارالىق سينەرگيا جوباسىنىڭ (قازاقستان, اۋستريا, رەسەي) جانە «ەنەرگەتيكا» مەن «ەكولوگيا» وزەكتى باعىتتارى بويىنشا شىۇ نەگىزگى جوو-نىڭ قازاقستانداعى جالعىز قاتىسۋشىسى سانالادى.
كونفۋتسي ينستيتۋتىندا 2011 جىلدان باستاپ ستۋدەنتتەر مەن پروفەسسور-وقىتۋشىلار قۇرامى ءۇشىن قىتاي ءتىلى مەن مادەنيەتىن زەرتتەۋ بويىنشا ساباقتار وتكىزىلەدى. سونداي-اق ۋنيۆەرسيتەتتە ليتسەنزيالانعان باعدارلامالىق جاساقتامانى, 69 كومپيۋتەرلىك سىنىپتى, سوڭعى بۋىنداعى 3500-دەن استام كومپيۋتەردى, 52 ينتەراكتيۆتى تاقتانى, 88 بەينەپروەكتوردى قامتيتىن زاماناۋي اقپاراتتىق-ءبىلىم بەرۋ ورتاسى قۇرىلدى. جوعارى وقۋ ورىندارى اراسىنداعى رەسپۋبليكالىق ەلەكتروندىق كىتاپحانانىڭ رەسۋرستارىنا قارمتۋ پروفەسسور-وقىتۋشىلار قۇرامى ازىرلەگەن 8 300-دەن استام ەلەكتروندى وقۋ باسىلىمدارى ەنگىزىلگەن. وسى كورسەتكىش بويىنشا قارمتۋ قازاقستاننىڭ جوعارى وقۋ ورىندارى اراسىندا ءبىرىنشى ورىن الادى. «EPAM Systems» امەريكا-بەلورۋس فيرماسىمەن بىرگە باعدارلاماشىلاردى ماقساتتى دايارلاۋ جانە IT-تەحنولوگيالار سالاسىندا باعدارلامالىق ونىمدەردى ازىرلەۋ بويىنشا مامانداندىرىلعان R&D-زەرتحاناسى اشىلدى.
ارستان ماۋلەن ۇلى ستۋدەنتتەردىڭ پاتريوتتىق جانە مادەني تاربيەسىنە كوپ كوڭىل ءبولدى. ايتالىق, ءالىمحان ەرمەكوۆتىڭ 120 جىلدىعىنا ارنالعان كونفەرەنتسيا, «قازاق مەملەكەتتىلىگىن قالىپتاستىرۋداعى قازىبەك ءبيدىڭ ءرولى», «تولە بي – قازاق حالقىنىڭ دانا ءبيى», « ۇلى دالا ءدىلمارى – ايتەكە بي», «بۇقار جىراۋ – دالانىڭ داناگويى, بىرلىكتىڭ باتاگويى», « ۇلى وتان سوعىسى XXI عاسىر جاستارىنىڭ كوزىمەن» تاقىرىپتارىندا جىل سايىنعى كونفەرەنتسيا جانە ت.ب. ءوتتى. 2016 جىلى بەلگىلى اقىن جانە قوعام قايراتكەرى, «نەۆادا-سەمەي» حالىقارالىق انتيادرولىق قوزعالىسىنىڭ پرەزيدەنتى ولجاس سۇلەيمەنوۆتىڭ قاتىسۋىمەن «بەيبىتشىلىك ەستافەتاسى – جاستارعا» رەسپۋبليكالىق انتيادرولىق ونلاين-فورۋمى ءوتتى. فورۋمعا قازاقستاننىڭ 17 جوعارى وقۋ ورنى قاتىستى. 2012 جىلدان باستاپ رەكتور بالىن وتكىزۋ جاقسى داستۇرگە اينالدى.
ا.عازاليەۆتىڭ باسشىلىعىمەن ۋنيۆەرسيتەت كامپۋسى تۇبەگەيلى وزگەردى, بارلىق ينفراقۇرىلىمدى كۇردەلى جاڭعىرتۋ جۇرگىزىلدى. 2014 جىلى «ستۋدەنتتىك تۇرعىن ءۇي» پرەزيدەنتتىك باعدارلاماسى اياسىندا سالىنعان, 822 ورىنعا ارنالعان «ارمانداستار ورداسى» جاڭا ستۋدەنتتىك جاتاقحانا اشىلدى. 2015 جىلى №6 كورپۋس «ماڭگىلىك ەل جاستارى – يندۋسترياعا!» الەۋمەتتىك جوباسى («سەرپىن-2050») بويىنشا وقيتىن ستۋدەنتتەرگە ارنالعان «سەرپىندەستەر ورداسى» ستۋدەنتتىك جاتاقحاناسى بولىپ قايتا قۇرىلدى. 2010 جىلدىڭ 29 تامىزىندا قارمتۋ باس عيماراتىنىڭ الدىندا جارىق-مۋزىكالىق سۋبۇرقاق اشىلدى. سۋبۇرقاق قۇرىلىسى قاراعاندى وبلىسى اكىمىنىڭ قالانى اباتتاندىرۋ باعدارلاماسى اياسىندا قىسقا مەرزىمدە جۇزەگە اسىرىلدى.
ا.عازاليەۆ ءبىلىم بەرۋ, عىلىمي جانە تاربيە باعىتىنداعى 200-دەن استام كورنەكى ستەندتەردى ازىرلەۋ بويىنشا اۋقىمدى جۇمىس اتقاردى.
2012 جىلعى 1 جەلتوقساندا مەملەكەتتىك مەرەكە – قازاقستان رەسپۋبليكاسىنىڭ تۇڭعىش پرەزيدەنتى كۇنى ەلباسى نۇرسۇلتان نازارباەۆ كەزىندە ينجەنەرلىك ءبىلىم نەگىزدەرىن العان قاراعاندى مەملەكەتتىك تەحنيكالىق ۋنيۆەرسيتەتىندە ساپارمەن بولدى. نۇرسۇلتان ءابىش ۇلى جوو-نىڭ ءبىلىم, عىلىم جانە يننوۆاتسيا سالاسىنداعى جەتىستىكتەرىمەن تانىستى, سونداي-اق وقىتۋشىلار ۇجىمىمەن جانە ستۋدەنتتىك بەلسەندىلەرمەن, ءوزىنىڭ كۋرستاستارىمەن جانە سەرىكتەستەرىمەن كەزدەستى. قۇرمەتتى قوناقتار كىتابىنا ول: «مەن وسى وقۋ ورنىندا – بۇكىل قازاقستانعا ارنالعان ينجەنەرلىك كادرلار ۇستاحاناسىندا وقىعانىمدى ماقتان تۇتامىن», دەپ جازدى.
الەمدىك ءبىلىم بەرۋ كەڭىستىگىندە لايىقتى ورنى بار ۋنيۆەرسيتەت 2013 جىلى «Ranking Web of World universities: Top 20000 world ranking» جاھاندىق رەيتينگىنىڭ دەرەكتەرى بويىنشا قارمتۋ لايىقتى 2 385-ورىندى, ونىڭ ىشىندە قازاقستان بويىنشا 2-ورىندى يەلەندى. «ەۋرورەيتينگ-2013» رەيتينگىندە قازاقستاندىق جوو اراسىندا لايىقتى ءۇشىنشى ورىنعا يە بولدى. ەلىمىزدىڭ ءبىلىم جانە عىلىم مينيسترلىگىنىڭ رەيتينگىندە ءىرى ۇلتتىق ۋنيۆەرسيتەتتەردەن كەيىن عانا قازاقستاندىق ۇزدىك جوو-لاردىڭ توپ-30 جوعارعى قاتارىنا ەندى. تاۋەلسىز قازاقستاندىق ءبىلىم بەرۋ ساپاسىن قامتاماسىز ەتۋ اگەنتتىگىنىڭ باس رەيتينگىندە ەلىمىزدىڭ تەحنيكالىق جوعارى وقۋ ورىندارى اراسىندا ءۇشىنشى ورىنعا يە بولدى. 2010-2014 جىلدارى ۇلتتىق رەيتينگ ناتيجەسى بويىنشا قارمتۋ-دىڭ 14-17 ماماندىعى جىل سايىن جۇلدەلى ورىندارعا يە بولدى. 2013 جىلدىڭ جەلتوقسان ايىندا ۋنيۆەرسيتەت 5 جىل مەرزىمگە ينستيتۋتتىق اككرەديتتەۋدەن ءساتتى ءوتتى.
وسىلايشا, قارمتۋ-دىڭ قازىرگى دامۋ دەڭگەيى مەن جاڭا جەتىستىكتەرى اكادەميك ارستان عازاليەۆ جۇزەگە اسىرعان كرەاتيۆتى يدەيالار مەن باستامالار نەگىزىندە قۇرىلادى. ارستان ماۋلەن ۇلىنىڭ باسشىلىعىمەن قول جەتكىزىلگەن جاڭا ۋاقىتتاعى ۋنيۆەرسيتەتتىڭ جەتىستىكتەرىن ونىڭ العاشقى رەكتورى, اكادەميك ابىلقاس ساعىنوۆ باسقارعان ۋنيۆەرسيتەتتىڭ دامۋ اۋقىمىمەن عانا سالىستىرۋعا بولادى.
ۇعا اكادەميگى ا.عازاليەۆ جاس كادرلاردى دايارلاۋعا كوپ ۋاقىت پەن كۇش جۇمسادى. ونىڭ عىلىمي جەتەكشىلىگىمەن 2 ۇعا اكادەميگى, 12 حيميا عىلىمىنىڭ دوكتورى مەن 46 كانديداتى دايىندالدى, ونىڭ ىشىندە 1 مەملەكەتتىك سىيلىقتىڭ لاۋرەاتى, 2 ق.ساتباەۆ اتىنداعى سىيلىقتىڭ لاۋرەاتى, 1 تۇڭعىش پرەزيدەنت قورى سىيلىعىنىڭ لاۋرەاتى, 1 تمد ەلدەرىنىڭ جاس عالىمدارىنا ارنالعان «دەبيۋتتەر دوستاستىعى» حالىقارالىق سىيلىعىنىڭ لاۋرەاتى دايىندالدى.
«ەڭبەگى جوق عالىم – ىستىعى جوق جالىن» دەيدى. ا.عازاليەۆتىڭ كوپجىلدىق شىعارماشىلىق قىزمەتىنىڭ ناتيجەلەرى (حيرش يندەكسى 6) 900-دەن استام عىلىمي ەڭبەكتە (ونىڭ ىشىندە 18 مونوگرافيادا), ماقالالار مەن باياندامالار تەزيستەرىندە, 25 اۆتورلىق كۋالىكتەر مەن پاتەنتتەردە جانە قازاقستاننىڭ بىرقاتار جوعارى وقۋ ورىندارىنىڭ وقۋ پروتسەسىندە تابىستى پايدالاناتىن قر بعم گريفى بار 11 وقۋلىقتا كورسەتىلگەن.
ەسەلى ەڭبەك ناتيجەسىن دە كورسەتتى. A.M.عازاليەۆكە 2000, 2006, 2008 جانە 2010 جىلدارى عىلىم مەن تەحنيكاعا اسا كورنەكتى ۇلەس قوسقان عالىمدارعا ارنالعان مەملەكەتتىك عىلىمي ستيپەنديا تاعايىندالدى. «قۇرمەت» (2009) جانە «پاراسات» (2015) وردەندەرىمەن, «قازاقستان رەسپۋبليكاسىنىڭ ءبىلىم بەرۋ ۇزدىگى» (2000), «قازاقستان رەسپۋبليكاسىنىڭ عىلىمىن دامىتۋعا سىڭىرگەن ەڭبەگى ءۇشىن» (2001), ء«بىلىم بەرۋ ءىسىنىڭ قۇرمەتتى قىزمەتكەرى» (2003), «ى.التىنسارين» (2007), «كومىر ونەركاسىبىنىڭ قۇرمەتتى قىزمەتكەرى» (2010) توسبەلگىلەرىمەن ماراپاتتالعان. سونداي-اق كوپتەگەن سالالىق جانە مەرەكەلىك مەدالدارمەن قوسا «ەرەن ەڭبەگى ءۇشىن» (2013), «ەڭبەك ارداگەرى» (2018) مەدالدارىنىڭ, اكادەميك ا.سكوچينسكي اتىنداعى تاۋ-كەن ءىسى سالاسىنداعى حالىقارالىق سىيلىق (2010) يەگەرى. قاراعاندى قالاسىنىڭ قۇرمەتتى ازاماتى (2020) جانە پاۆلودار وبلىسى باياناۋىل اۋدانىنىڭ, قاراعاندى وبلىسىنىڭ بۇقار جىراۋ جانە وساكاروۆ اۋداندارىنىڭ قۇرمەتتى ازاماتى اتاندى.
2021 جىلى ا.عازاليەۆ ۇلى عالىم, اكادەميك ق.ي. ساتباەۆتىڭ ەسكەرتكىشىن جاساۋعا جانە نۇر-سۇلتان قالاسىندا مەملەكەت قايراتكەرى ج.تاشەنەۆتىڭ ەسكەرتكىشىن اشۋعا بەلسەندى قاتىستى.
بوراش تولەۋوۆ,
ۇعا اكادەميگى,
حيميا عىلىمدارىنىڭ دوكتورى, پروفەسسور
