«جاسىل ەكونوميكانى» دامىتۋ جانە جاڭارتىلاتىن ەنەرگيا كوزدەرىنە شەتەلدىك ينۆەستيتسيالاردى تارتۋ پەرسپەكتيۆاسى تۋرالى قر-داعى امەريكا ساۋدا پالاتاسىنىڭ (اتپ) اتقارۋشى ديرەكتورى دوريس برەدبيۋري, قر-داعى اتپ پرەزيدەنتى كەننەت ماك, ەىدۇ جاھاندىق قاتىناستار جونىندەگى حاتشىلىعىنىڭ ەۋرازيا ءبولىمىنىڭ باسشىسى ۋيليام تومپسون, قازاقستاندا اككرەديتتەلگەن ۇلىبريتانيا ەلشىسى كەتي ليچ, ەو ەلشىسى كەستۋتيس يانكاۋسكاس, نيدەرلاندى ەلشىسى حايمە دە بۋربون, ەو جانىنداعى كانادانىڭ ارنايى ەلشىسى ستەفان ديون, سونداي-اق GE, Total Energies, Orano Group Kazakhstan (KATCO), Eurasia Group كومپانيالاردىڭ وكىلدەرى جانە ت. ب. بايانداما جاسادى.
قابىلدانىپ جاتقان شارالار تۋرالى ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ, ەنەرگەتيكا ءبىرىنشى ۆيتسە-ءمينيسترى مۇرات جۇرەبەكوۆ باياندادى. ەكونوميكانى دەكاربونيزاتسيالاۋ جانە كليماتتىڭ وزگەرۋىنە بەيىمدەۋ, قر-دا ەڭ وزىق قولجەتىمدى تەحنولوگيالاردى ەنگىزۋ, جاڭارتىلاتىن ەنەرگيا كوزدەرىن, ناقتى ەگىنشىلىكتى جانە جالپى «جاسىل» ەكونوميكانى دامىتۋعا ينۆەستيتسيا تارتۋ ماسەلەلەرى تالقىلاندى.
ۇكىمەت باسشىسى قازاقستان كليماتتىڭ وزگەرۋىنە قارسى جاھاندىق كۇرەس اياسىندا ءوز مىندەتتەمەلەرىن ىسكە اسىرۋ بويىنشا شارالاردى ۇلعايتىپ جاتقانىن اتاپ ءوتتى. بۇل رەتتە كۇش-جىگەر ەكونوميكانىڭ تۇراقتىلىعى مەن دەكاربونيزاتسياسىن ارتتىرۋعا باعىتتالعان.
قر پاريج كەلىسىمىن ىسكە اسىرۋ ءۇشىن 2030 جىلعا قاراي ۇكىمەت پارنيكتىك گازدار شىعارىندىلارىن 15%-عا ازايتۋدى تارگەتتەيدى. قويىلعان ماقساتقا قول جەتكىزۋ ءۇشىن قازاقستان ۇلتتىق دەڭگەيدە ايقىندالاتىن شىعارىندىلاردى ازايتۋ جونىندەگى ۇلەسىن جاڭارتتى جانە 2022-2025 جىلدارعا ارنالعان ءتيىستى جول كارتاسىن ازىرلەدى.
«ۇكىمەت سونىمەن قاتار 2020 جىلدىڭ جەلتوقسان ايىندا كليماتتىق امبيتسيالار بويىنشا بۇۇ ءسامميتى اياسىندا قر پرەزيدەنتى قاسىم-جومارت توقاەۆ جاريالاعان قازاقستاننىڭ 2060 جىلعا قاراي كومىرتەكتى بەيتاراپتىلىققا قول جەتكىزۋ ماقساتىن ىسكە اسىرۋ ءۇشىن تاجىريبەلىك شارالار قابىلداۋدا. 2060 جىلعا دەيىن قر كومىرتەگى بەيتاراپتىلىعىنا قول جەتكىزۋ دوكتريناسىن ازىرلەۋ جۇرگىزىلۋدە, ول بيىل قاراشا ايىندا گلازگو قالاسىندا كليماتتىڭ وزگەرۋى جونىندەگى بۇۇ كونفەرەنتسياسىندا ۇسىنىلاتىن بولادى. قۇجاتتا قر ەكونوميكاسىنىڭ ەنەرگەتيكالىق تيىمدىلىگىن ارتتىرۋ, ەلەكترلەندىرۋ جانە جاڭارتىلاتىن ەنەرگيا كوزدەرىن كەڭ اۋقىمدى پايدالانۋ شارالارى كوزدەلگەن», دەدى ا. مامين.
پرەمەر-مينيستر ۇكىمەتتىڭ ەنەرگيا ءوندىرۋدىڭ جالپى كولەمىندەگى جاڭارتىلاتىن ەنەرگيا كوزدەرىنىڭ ۇلەسىن بۇرىن جوسپارلانعانداي 2025 جىلعا قاراي ەمەس, 2023 جىلعا قاراي 6%-عا دەيىن ەكى ەسە ارتتىرۋعا نيەتتى ەكەنىن اتاپ ءوتتى. ۇكىمەت باسشىسى قازاقستاننىڭ بالامالى ەنەرگەتيكانى دامىتۋ سالاسىنا شەتەلدىك كاپيتال مەن وزىق تەحنولوگيالاردى تارتۋ ءۇشىن ينۆەستيتسيالىق ورتانى جاقسارتۋ جونىندە بىرقاتار شارالار قابىلداعانىن جەتكىزدى.
ناتيجەسىندە, 2020 جىلى جاڭارتىلاتىن ەنەرگەتيكا سالاسىندا جالپى قۋاتى 600 مۆت جۋىق بولاتىن 25 جوبا پايدالانۋعا بەرىلدى. ينۆەستيتسيا كولەمى $510 ملن استى. الداعى ءتورت جىل ىشىندە جالپى قۋاتى 2400 مۆت بولاتىن جانە ينۆەستيتسيا كولەمى $2,5 ملرد استامدى قۇرايتىن 60-تان اسا جاڭا جەك جوباسىن پايدالانۋعا بەرۋ جوسپارلانۋدا.
قازىرگى ۋاقىتتا قازاقستاندا بەلگىلەنگەن قۋاتى 1922 مۆت بولاتىن 124 جەك وبەكتىسى جۇمىس ىستەيدى: 31 جەل ەلەكتر ستانتسياسى, 48 كۇن ەلەكتر ستانتسياسى, 40 سۋ ەلەكتر ستانتسياسى, 5 بيوەلەكتر ستانتسياسى.
