ماڭگىلىك ەل بەلگىسى

ماڭگىلىك ەل ۇعىمى قاسيەتتى, كيەلى, ەلجىرەتىپ جانىڭدى, يىتەدى جۇيەنى. تەبىرەنىپ بۇل سوزگە بابالاردىڭ ارۋاعى, تەرەڭدەگى تاريحتىڭ اعىتىلار تيەگى.   الاسۇرعان تەڭىزدەي توڭكەرىلگەن جالعاندا, ولمەيتۇعىن ءومىردى اڭسامايتىن ەل بار ما؟ ارپالىسىپ باعىپتى كۇلتەگىندەي باتىرلار, تونىكوكتەي دانىشپان, ەلتەرىستەي حاندار دا.   اسىل ارمان جولىندا قانشاما جۇرت قان كەشكەن, اجداھامەن الىسىپ, الپاۋىتپەن بەلدەسكەن. وسيەتىن ويدىرىپ قارا تاسقا اقىرى, قارا جەردىڭ بەتىنەن زىم-زيا بوپ ماڭگى وشكەن.   وكىنىشىن وقىساڭ تاستا قالعان سولاردىڭ, ساي-سۇيەگىڭ سىرقىراپ, كوكىرەككە تولار مۇڭ. تۇزداي قۇرتىپ تۇقىمىن تالايلاردى توزدىرعان, تالكەگىنەن تاعدىردىڭ كەلدى ساباق الار كۇن.   ماڭگىلىك ەل دەگەندى وڭاي ەمەس ايتۋ دا, بىلە بىلسەڭ, اعايىن, باعىت انىق, وي تۋرا. تىلسىممەنەن تىلدەسپەي, وتقا ءتۇسىپ, سۋ كەشپەي, ابىرويعا بولەنگەن قاي زاماندا, قاي تۇلعا؟   قانداي بولماق شىنىندا ماڭگىلىك ەل نىشانى, تۋعان جۇرتتىڭ ءتۇتىنى قايتسەك ءتۇزۋ ۇشادى؟ جەر بەتىندە جەتى الىپ جان-جاعىڭنان انتالاپ, ەرەگەسسە ەكەۋى ەكى وكپەڭنەن قىسادى.   تۇلپارىمىز تۇرالاپ تايعاق كەشۋ, تار جولدان, بودان ەدىك كەشەگى بوستاندىققا زار بولعان. ماڭگىلىك ەل بولا الساق – جۇلدىزىمىز جانعانى, جەردىڭ ءجۇزى, كۇن كوزى ديدارىنا تاڭ قالعان.   ماڭگىلىك ەل بولامىز دەپ وتىرمىز جۋىردا, ماڭگىلىك ەل بەلگىسى – جەلبىرەگەن تۋىڭدا! ەركىن جۇرگەن ەلىڭدە, اسپانىڭدا, جەرىڭدە, ەركىن ۇشقان قۇسىڭ دا, ەركىن اققان سۋىڭ دا!   نە كورمەدىڭ, قازاعىم, تايتالاسقان تىرلىكتە, ماڭگىلىك ەل بەلگىسى – بەرەكە مەن بىرلىكتە! ۇل-قىزىڭ دا جول كورگەن, بەسىگىڭدە تەربەلگەن, التىن جىپتەي ارقاۋى ۇزىلمەيتىن كىندىكتە!   بوساعاڭدى ۇمىتپا, تورگە شىقساڭ تەگىندە, ماڭگىلىك ەل بەلگىسى – ەسىك پەنەن تورىڭدە! قالاتۇعىن ارتىڭدا – ءداستۇر مەنەن سالتىڭ دا, ونەرىڭ دە ەشقاشان باس يمەگەن ولىمگە!   قازاق بولساڭ, قادىرلە ءوز ءتىلىڭدى تىرىڭدە, ماڭگىلىك ەل بەلگىسى – مەملەكەتتىك تىلىڭدە! تانىماعان توركىنىن, مەنسىنبەگەن ءوز ءتىلىن, تالاپاي بوپ تالاي جۇرت قۇرىپ بىتكەن تۇبىندە.   ماڭگىلىك ەل بەلگىسى – جۇرەگىڭدە, قانىڭدا, وتان ءۇشىن شىبىنداي شىرقىراعان جانىڭ دا! جاسىماعان جىگەردە, مۇقالماعان نامىستا, بىلعانباعان قولىڭ دا, كىر شالماعان ارىڭ دا!   قۇداي سۇيەر پەندەسىن ۇلتتىڭ جوعىن جوقتاعان, ماڭگىلىك ەل بەلگىسى – پارىزىڭدى اقتاعان! قۋاتىندا رۋحتىڭ, مۇراتىندا حالىقتىڭ, مۇراسىندا كوزىنىڭ قاراسىنداي ساقتاعان!   مەيىرىمى توگىلگەن الىس پەنەن جاقىنعا, ماڭگىلىك ەل بەلگىسى – پاراساتتا, اقىلدا! جۇرەك قانىن اعىزىپ, ءتىلدىڭ مايىن تامىزىپ, جىرلاپ كەتكەن اقىندار كەمەڭگەرلەر حاقىندا.   توبەمىزدەن ماڭگىلىك كۇننىڭ نۇرى قۇيىلسا, ماڭگىلىك ەل بولماقپىز بولاشاقتا بۇيىرسا: جۇگەندەلىپ جەمقورلار, تۇگەندەلىپ قازىنا, ۇرى-قارى تۇسالىپ, تەلى-تەنتەك تىيىلسا؟   ءدىندى بۇزعان سۇمداردىڭ, ەلدى بۇزعان قۋلاردىڭ, ادىمدارى ۇزارماي, قىلتالارى قيىلسا؟ ءبىر بايراقتىڭ استىنا, ءبىر تىلەكتىڭ ۇستىنە, شارتاراپقا شاشىلعان ءيىسى قازاق جيىلسا؟ جەتىم-جەسىر تويىنىپ, پاراقورلىق جويىلىپ, باۋىرلاسقان قالىڭ ەل ءبىر اللاعا سىيىنسا؟   باقىت قۇسى قوناردا, ماڭگىلىك ەل بولاردا, پەرىشتەنىڭ قاسىنا سايتان ءسىرا جولار ما؟ ماڭگىلىك ەل بەلگىسى – اسپانداعان بايتەرەك, جايناپ تۇرعان استانا, جارقىراعان اقوردا! جاقسى-جايساڭ كەڭەسىپ, ءتورت قۇبىلا تەڭەسىپ, ارمان بولماس اينالساق الىنبايتىن قامالعا!.. نەسىپبەك ايت ۇلى, مەملەكەتتىك سىيلىقتىڭ لاۋرەاتى. استانا.