وق-ءدارى قويمالارىن تەكسەرۋ بارىسى تۋرالى قورعانىس مينيسترلىگى باس ينسپەكتسياسى باستىعىنىڭ بايانداماسى قارالدى. ينسپەكتسيالاۋدىڭ ارالىق ناتيجەسى بويىنشا قازىرگى ۋاقىتتا شەشىلمەگەن نەگىزگى ماسەلە تۇگەندەۋ ناتيجەسىندە اسكەري م ۇلىك رەتىندە پايدالانىلمايدى دەپ تانىلعان وق-دارىلەردى كادەگە جاراتۋ بولىپ تابىلادى.
زاڭ جۇزىندە وق-دارىلەردى كادەگە جاراتۋ جونىندەگى جۇمىستى ۋاكىلەتتى ورگان – يندۋستريا جانە ينفراقۇرىلىمدىق دامۋ مينيسترلىگى جۇرگىزەدى. بۇل رەتتە وعان ۆەدومستۆولىق باعىنىستى ۇيىمداردىڭ وق-دارىلەردى جويۋ بويىنشا مۇمكىندىگى شەكتەۋلى. وسىعان بايلانىستى قورعانىس مينيسترلىگى پايدالانىلمايتىن اسكەري م ۇلىكتى قويمالار مەن بازالاردا جىلدار بويى ساقتاۋعا ءماجبۇر بولادى.
وق-دارىلەردى ساقتاۋ قاۋىپسىزدىگىن قامتاماسىز ەتۋ ماقساتىندا قورعانىس ۆەدومستۆوسى 2021 جىلعى 30 قىركۇيەكتە ۇكىمەت قابىلداعان № 964 قاۋلىنى ازىرلەدى. وعان سايكەس يندۋستريا جانە ينفراقۇرىلىمدىق دامۋ مينيسترلىگى قورعانىس مينيسترلىگىمەن بىرلەسىپ, ساپەرلەردىڭ كۇشىمەن پايدالانىلمايتىن وق-دارىلەردى قويمالاردان اسكەري پوليگوندارعا شىعارۋ جۇمىسىن ۇيىمداستىرىپ, جوياتىن بولادى. تىكەلەي ءىس-قيمىل ءتارتىبىن ەكى مينيسترلىكتىڭ بىرلەسكەن بۇيرىعى ايقىندايدى.
ودان بولەك قىسقا دايىندىق ماسەلەسى قارالدى. لاۋازىمدى ادامداردىڭ بايانداماسى بويىنشا تۇرعىن ءۇي-كوممۋنالدىق شارۋاشىلىق اسكەري وبەكتىلەرىنىڭ قىسقا دايىندىعى 96,5%-ءتى قۇرايدى. اۋا رايى جاعدايىنا سايكەس جىلىتۋ ەلدىڭ سولتۇستىك, ورتالىق جانە شىعىس وڭىرلەرىندەگى اسكەري قالاشىقتاردا ىسكە قوسىلدى. قازاندىقتار قاجەتتى وتىن قورىمەن قامتاماسىز ەتىلگەن. ودان باسقا, قورعانىس مينيسترلىگى العاش رەت جىلىتۋ ماۋسىمىندا قىزمەت كورسەتەتىن پەرسونالدى ماتەريالدىق ىنتالاندىرۋدى كوزدەدى.
قورعانىس ءمينيسترى 4 قازاننان باستاپ اسكەرلەردە باستالعان قورىتىندى تەكسەرۋدى ساپالى ۇيىمداستىرۋعا باس قولباسشىلار مەن قولباسشىلاردىڭ نازارىن اۋداردى. بارلىق اسكەري قىزمەتشىلەر 3 اپتا بويى وقىتۋ پاندەرى بويىنشا سىناق تاپسىرىپ, وزدەرىنىڭ كاسىبي بىلىكتىلىگىن راستاۋعا ءتيىس. مينيستر بۇل وقۋ جىلىنداعى جاۋىنگەرلىك دايارلىقتى باعالاۋدىڭ نەگىزگى قۇرامداس بولىگى بولاتىنىن اتاپ ءوتتى. اسكەري بولىمدەردىڭ جاۋىنگەرلىك ازىرلىگى, ديۆەرسياعا قارسى جانە ورتكە قارسى قاۋىپسىزدىگىنىڭ جاي-كۇيى دە تەكسەرىلەدى.
ودان باسقا, قورعانىس ۆەدومستۆوسىنىڭ باسشىسى ولارعا سەنىپ تاپسىرىلعان قۇرامالارداعى, بولىمدەردەگى, بولىمشەلەردەگى اسكەري ءتارتىپتىڭ جاي-كۇيى بويىنشا بارلىق دارەجەدەگى كومانديرلەردىڭ جۇمىسىن باعالاۋعا نۇسقاۋ بەردى.
– قۇقىق ءتارتىبىن ساقتاۋدا جۇيەلى كەمشىلىك بولعان جاعدايدا, ءاربىر لاۋازىمدى ادامعا تارتىپتىك سيپاتتاعى شارالار, ءتىپتى لاۋازىمىن تومەندەتۋگە جانە قارۋلى كۇشتەر قاتارىنان شىعارۋعا دەيىنگى شارالار قابىلدانۋعا ءتيىس - دەدى قورعانىس ءمينيسترى.
گەنەرال-لەيتەنانت مۇرات بەكتانوۆ الداعى اپتادا جەرگىلىكتى اسكەري باسقارۋ ورگاندارىنان اسكەرلەرگە كەلە باستايتىن جاس بۋىندى قابىلداۋ جونىندەگى الداعى ءىس-شارالاردىڭ ماڭىزدىلىعىن اتاپ ءوتتى. قولباسشىلارعا جەرگىلىكتى جەرلەردەگى كازارمالىق-تۇرعىن ءۇي قورى مەن وقۋ-ماتەريالدىق بازانىڭ دايىندىعىن, جاڭا بۋىندى جيناۋ اكىمشىلىگىنىڭ كەشەگى اسكەرگە شاقىرىلۋشىلاردى اسكەري قىزمەتكە بەيىمدەۋ جونىندەگى جۇكتەلگەن مىندەتتەرگە سايكەستىگىن جەكە تەكسەرۋ تاپسىرىلدى.
