ورتالىق الاڭدا الىپ تۇلعانىڭ ەڭسەلى ەسكەرتكىشى اشىلدى. مەرەيتويلىق شارالارعا الماتى وبلىسىنىڭ اكىمى اماندىق باتالوۆ, مادەنيەت جانە سپورت ءمينيسترى اقتوتى رايىمقۇلوۆا, قر جازۋشىلار وداعىنىڭ توراعاسى ۇلىقبەك ەسداۋلەت, اقىننىڭ ۇلى مەن كەلىنى جۇلدىز ماقاتاەۆ پەن باقىتگۇل ايداروۆا, تۇركسوي ۇيىمىنىڭ وكىلدەرى, پارلامەنت دەپۋتاتتارى, ەل زيالىلارى جانە اۋدان جۇرتشىلىعى قاتىستى.
«مۇقاعالي - جىردىڭ اسىل قازىناسى. ول - وتكەن مەن جاڭانىڭ اراسىن جالعاعان التىن كوپىر. ەلباسى مەن پرەزيدەنتتىڭ باستاماسىمەن اقىننىڭ عاسىرلىق تويىن يۋنەسكو كولەمىندە وتكىزۋگە ۇسىنىستار دايىندالۋدا. بۇگىنگى توي قۇتتى بولسىن. حالقىمىزدىڭ رۋحى مۇقاعالي جىرلارىنداي تازا, حانتاڭىرىندەي اسقاق, كولسايداي كورىكتى بولسىن», دەگەن ق.كوشەرباەۆ پرەزيدەنت قاسىم-جومارت توقاەۆتىڭ ارنايى قۇتتىقتاۋىن وقىپ, تابىستادى.
اتاپ وتسەك, ەسكەرتكىشتى دايىنداۋعا وبلىستىق بيۋدجەتتەن 61,1 ملن. تەڭگە جۇمسالدى. جۇمىستى مەردىگەر ۇيىم «تايقازان» جشس اتقاردى. ەسكەرتكىش قولادان قۇيىلعان, تۇعىرى گرانيتتەن دايىندالعان. جالپى ەسكەرتكىشتىڭ بيىكتىگى – 8,2 م, اۆتورى – ساۋلەتشى ا.رۇستەمبەكوۆ, ءمۇسىنشىسى – ق.كاكىموۆ.
ەسكەرتكىش ورناتىلعان ورتالىق ساياباقتاعى الاڭدى اباتتاندىرۋعا زور ءمان بەرىلگەن. وسى ماقساتقا ءوڭىر بيۋدجەتىنەن 70,1 ملن. تەڭگە قاراستىرىلىپ, اۋماق كوگالداندىرىلدى, سۋارۋ جۇيەسى جۇرگىزىلدى, جارىق شامدارى ورناتىلدى, شاعىن ساۋلەتتىك فورمالار قويىلدى.
