«جىل باسىنان بەرى نۇر-سۇلتان قالاسى اۋماعىندا 3250 ينتەرنەت الاياقتىق قىلمىسى تىركەلدى. بۇل وتكەن جىلمەن سالىستىرعاندا 135 پايىزعا ارتىق. ينتەرنەت الاياقتىق اسىرەسە پاندەميا كەزىندە ورشىگەنى بايقالادى. كارانتيندىك شەكتەۋلەرگە بايلانىستى كوپ ادامدار ينتەرنەت قىزمەتتىڭ كومەگىنە جۇگىنە باستادى. ءبىزدىڭ دەپارتامەنت تاراپىنان ينتەرنەت الاياقتىقپەن كۇرەسۋ جولىندا بىرقاتار شارالار ىسكە اسىپ جاتىر. سونىڭ ءبىرى اتالعان قىلمىس ءتۇرىن زەرتتەۋ جانە اشۋ بويىنشا مامانداندىرىلعان جەدەل تەرگەۋ توبى قۇرىلدى. ناتيجەسىندە بۇگىندە ەلوردادا 100 ينتەرنەت الاياق ۇستالىپ, قىلمىستىق جاۋاپقا تارتىلدى. ولار جالپى سوماسى 150 ملن تەڭگەنىڭ شىعىنىن كەلتىردى, ونىڭ 50 ملن تەڭگەسى زارداپ شەگۋشىلەرگە قايتارىلدى. ۇستالعان 100 قىلمىسكەردىڭ 45-ءى بۇعان دەيىن ينتەرنەت الاياقتىق بويىنشا جاۋاپقا تارتىلعان بولىپ شىقتى», دەدى تالعات بولەگەنوۆ ەلوردانىڭ پوليتسيا دەپارتامەنتىندە وتكەن بريفينگ بارىسىندا.
ونىڭ ايتۋىنشا, ەلوردادا ينتەرنەت الاياقتىقپەن اينالىساتىنداردىڭ دەنى 20 مەن 35 جاس ارالىعىنداعى ادامدار.
«ينتەرنەت الاياقتىقتىڭ الدىن الۋ مەن كۇرەسۋدە مامانداردىڭ بىلىكتىلىگىن ارتتىرۋ قاراستىرىلعان. ءبىزدىڭ قىزمەتكەرلەر كيبەرقىلمىسپەن كۇرەسۋ بويىنشا ارنايى وقۋ كۋرسىن ءوتىپ وتىرادى. سونىمەن قاتار اتالعان قىلمىسپەن كۇرەستە باق ارقىلى دا حالىقتى ساق بولۋعا شاقىرىپ جاتىرمىز. ودان بولەك, ءبىزدىڭ دەپارتامەنت ينتەرنەت الاياقتىق تۋرالى ارنايى بەينەروليكتەر ازىرلەدى. ول حالىق ءجيى شوعىرلاناتىن جەرلەردە كورسەتىلەتىن بولادى», دەيدى ول.
