ايتۋلى تۋرنير WTA Tour سەرياسىنا جاتاتىندىقتان وعان تەك الەمدەگى «توپ-100» ويىنشىلار عانا قاتىسا الادى. ال قالعاندارى ىرىكتەۋ سىنىنا وتۋگە ءتيىس. نەگىزگى باسەكەگە جولداما الۋ ءۇشىن بىرنەشە قازاقستاندىق تەننيسشىلەر باق سىنادى. وكىنىشكە قاراي, ولاردىڭ بىرەۋىنىڭ دە جولى بولمادى. اتاپ ايتساق, تاتيانا نيكولەنكو ناتاليا ۆيحليانتسەۆاعا, گوزال اينيتدينوۆا بەلارۋسسيالىق يۋلي گوتوۆكوعا, سوفيا چۋرسينا پولشالىق ۋرسۋلا رادۆانسكاعا, دانا بايداۋلەت ۇلىبريتانيالىق كەتي بۋلتەرگە جانە ەكاتەرينا دميتريچەنكو ۋكراينالىق ۆالەري ستراحوۆاعا ەسە جىبەردى.
جارىستىڭ نەگىزگى بولىگىندە قازاقستاننىڭ ءتورت تەننيسشىسى كۇش سىناسۋ قۇرمەتىنە يە بولدى. كەشە يۋليا پۋتينتسەۆا گرۋزيالىق ەكاتەرينا گورگودزەمەن ويناسا, اننا دانيلينا فرانتسيالىق كريستينا ملادەنوۆيچپەن سايىسقا ءتۇستى. جىبەك كۇلامباەۆا بەلگيالىق ەليسون ۆان ەيتۆانككە قارسى شىقسا, زارينا دياس ىرىكتەۋ سىنىندا توپ جارعان ويىنشىلاردىڭ بىرىمەن شەبەرلىك بايقاسادى.
الداعى كۇندەرى Astana Open تۋرنيرىندە جوعارىدا ەسىمدەرى اتالعانداردان بولەك, چەحيالىق كريستينا پليشكوۆا, اۋستراليالىق ارينا راديونوۆا, بەلگيالىق گرەتە ميننەن, حورۆاتيالىق انا كونيۋح, بەلارۋسسيالىق ۆەرا لاپكو سىندى ەسىمى سپورت سۇيەر قاۋىمعا جاقسى تانىس ويىنشىلار كورتقا شىعادى.
