ايماقتار • 24 قىركۇيەك، 2021

اقسۋدا قارتتار ءۇيى ورتەندى

175 رەت كورسەتىلدى

اقسۋدا قارتتار ۇيىنەن ءورت شىعىپ، ءبىر ادام زارداپ شەكتى. وقيعا ورنىندا جەكە قۇرامنان 12 ادام مەن 4 تەحنيكا جۇمىس ىستەدى، دەپ حابارلايدى Egemen.kz.

وبلىستىق تجد ءباسپاسوز قىزمەتىنىڭ مالىمەتىنشە، 23 قىركۇيەكتە ساعات 18.39-دا نابەرەجنايا كوشەسى، 27 مەكەنجايى بويىنشا پاۆلودار وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا قاراستى اقسۋ قالاسىنىڭ قارتتار مەن مۇگەدەكتەرگە ارنالعان جالپى ۇلگىدەگى ارناۋلى الەۋمەتتىك قىزمەت كورسەتۋ ورتالىعىندا ءورت شىققانى تۋرالى حابارلاما تۇسكەن.

«ەكىنشى كورپۋستىڭ بەسىنشى قاباتىندا № 14 پالاتادا 2 شارشى مەتر الاڭدا ماتراتس بىقسىپ، قاتتى ءتۇتىن پايدا بولعان. ءورت سوندىرۋشىلەر باسپالداق مارشى بويىنشا 4-ءشى جانە 5-ءشى قاباتتاردان 60 ادامدى ەۆاكۋاتسيالادى. اۆتوساتى قولدانىلدى. گاز-تۇتىننەن قورعاۋ قىزمەتىنىڭ بۋىنى بەسىنشى قاباتتاعى پالاتانىڭ تەرەزەسىنە قۇراستىرىلعان قول وقپانىن بەردى»، دەدى دەپارتامەنتتە.

ءورت ءسوندىرۋ بولىمشەلەرى كەلگەنگە دەيىن بولىمشە قىزمەتكەرلەرى زارداپ شەككەن 1937 جىلى تۋعان ەر ادامدى ەۆاكۋاتسيالادى. ول اقسۋ قالاسىنىڭ ورتالىق اۋرۋحاناسىنا جاتقىزىلدى.

ءورت 19 ساعات 09 مينۋتتا ءسوندىرىلدى. ءورتتىڭ شىعۋىنا توسەكتە تەمەكى شەگۋ سەبەپ بولعان.

 

 

سوڭعى جاڭالىقتار

الماتى تۇرعىندارى سۋسىز قالدى

ايماقتار • بۇگىن، 15:57

كانەلونى اۋىر شايقاس كۇتىپ تۇر

كاسىپقوي بوكس • بۇگىن، 12:18

ۇقساس جاڭالىقتار