ءبىلىم • 22 قىركۇيەك، 2021

«100 جاڭا وقۋلىق» جوباسىنا قانشا قارجى جۇمسالدى؟

61 رەت كورسەتىلدى

«ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى «قازاق تىلىندەگى 100 جاڭا وقۋلىق» جوباسىن جۇزەگە اسىرۋعا جۇمسالعان قاراجات كولەمىن اتادى، دەپ حابارلايدى Egemen.kz.

بوتاكوز باقبەرگەن

«جالاقى قورى دەگەن ۇعىم جوق. جالپى، الەمدە قالاي جاسالاتىنى تۋرالى تاجىريبە زەرتتەلدى، اۋدارما قىزمەتىن ۇيىمداستىرۋ ماقساتىندا اۆتورلىق قۇقىقتى الۋ ءۇشىن قاجەتتى قاراجات ەسەپتەلىپ، سودان كەيىن باسىپ شىعارۋ مەن تاراتۋعا جۇمسالادى. مۇندا بىرنەشە كومپونەنتتەر بار، ەڭ قاراپايىمى – باسىپ شىعارۋ جانە تاراتۋ. ءبىز اشىق كونكۋرس وتكىزدىك، وعان ەلىمىزدىڭ ءىرى باسپالارى قاتىستى. بارلىق كىتاپتار قازاقستاندا باسىلىپ شىقتى»، دەدى راۋان كەنجەحان ۇلى وكق بريفينگىندە.

ونىڭ ايتۋىنشا، اۋدارما بىرنەشە دەڭگەيدەن تۇردى.

«بۇل تىكەلەي اۋدارما قىزمەتى، ءارى قاراي-عىلىمي جانە ادەبي رەداكتسيالاۋ، سودان كەيىن بەتتەۋ جانە باسپاعا دايىنداۋ. ەڭ قيىن بولىگى - قۇقىقتاردى ساتىپ الۋ، ويتكەنى بۇل زياتكەرلىك مەنشىك، سوندىقتان كىتاپ قۇنىن اۆتوردىڭ ءوزى بەلگىلەيدى. ءار وقۋلىق بويىنشا جەكە كەلىسسوزدەر جۇرگىزدىك. ەگەر ءاربىر كىتاپقا جۇمسالاتىن ورتاشا شىعىندى قاراستىراتىن بولساق، بۇل - 3860 تەڭگە. ءار كىتاپ ورتا ەسەپپەن 500-600 بەتتەن تۇرادى. اۆتورلىق قۇقىقتارمەن، اۋدارمامەن جانە مورمەن، سونداي-اق تاراتۋمەن بايلانىستى بارلىق شىعىستاردى قوسا العاندا، جۇمسالعان قاراجات ءبىر كىتاپقا 3860 تەڭگەنى قۇرادى»، دەپ حابارلادى سپيكەر.

«مۇندا قاراپايىم اريفمەتيكا: بىزدە 100 وقۋلىق بار، ولاردىڭ ارقايسىسى 10 مىڭ تيراجبەن باسىلعان. جوبانىڭ بۇكىل تارالىمى - ءبىر ميلليون دانا، بۇل شامامەن 3،8 ملرد تەڭگە»، دەپ تۇيىندەدى ر. كەنجەحان ۇلى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز