«2021 جىلعى 14 ساۋىردە «اق جول» پارتياسىنىڭ پارلامەنتتىك فراكتسياسى ەلىمىزدە اۆتوبۋس تاسىمالىنداعى كۇردەلى جاعدايدى ساۋىقتىرۋ, سونىڭ ىشىندە جۇمىس ىستەپ تۇرعان اۆتوپاركتەرگە تيەسىلى سۋبسيديالاردى تولەۋ بويىنشا شۇعىل شارا قابىلداۋ جونىندە ۇكىمەتكە دەپۋتاتتىق ساۋال جولداعان بولاتىنبىز. ەلىمىزدىڭ ءار وڭىرىنەن ءتۇسىپ جاتقان وتىنىشتەرىنە وراي, سونداي-اق اتالعان ماسەلە بويىنشا سايلاۋشىلارمەن كەزدەسۋ بارىسىندا جولاۋشىلار تاسىمالداۋ سالاسىندا جاعدايدىڭ وزگەرمەگەنىنە كوزىمىز جەتىپ, ماسەلەنى قايتا كوتەرۋگە ءماجبۇر بولىپ وتىرمىز. تىعىرىققا تىرەلىپ, بانكروتتىققا ۇشىراۋدىڭ الدىندا تۇرعان تاسىمالداۋشىلار بىرنەشە قالادا ەرەۋىلگە دە شىعىپ ۇلگەردى. بۇنداي اقپارات اقتوبە, شىمكەنت, پەتروپاۆل قالالارىنان تۇسۋدە. ويتكەنى, جەرگىلىكتى اتقارۋشى ورگاندار بەكىتكەن تاريفتەر سالدارىنان, سۋبسيدياسىز اۆتوبۋس جۇرگىزۋشىلەرىنە جالاقى تولەي الماۋى, ونىڭ ۇستىنە ساتىپ الىنعان جاڭا اۆتوبۋستارعا ليزينگ بويىنشا مەملەكەت تاراپىنان تيەسىلى قاراجاتتىڭ تولەنبەۋى جىعىلعاننىڭ ۇستىنە جۇدىرىق بولۋدا», دەدى س. ەرۋباەۆ پرەمەر-ءمينيستردىڭ ءبىرىنشى ورىنباسارى ءاليحان سمايىلوۆتىڭ اتىنا جولداعان دەپۋتاتتىق ساۋالىندا.
ونىڭ ايتۋىنشا, سەمەي قالاسىنداعى ەكى جىل بويى قىزمەتىن ءساتتى اتقارىپ كەلگەن اۆتوپارك, قاجەتتى قاراجات الماعاندىقتان, سوتتىڭ شەشىمىمەن بانكروت بولىپ جاريالانىپ, نەسيەگە العان تەحنيكاسى تۇسىنىكسىز جولمەن باسقا مەردىگەرگە بەرىلگەن.
«ەڭ قىزىعى, اتالعان اۆتوپارككە ەكى جىل بويى تولەنبەگەن سۋبسيديالاردى جاڭا مەردىگەرگە قالا باسشىلارى ءبىر ساتتە 520 ملن تەڭگە مولشەرىندە بەرىلگەن. بۇل قاراجات قايدان شىقتى؟ بيۋدجەتتە جاڭا مەردىگەرگە ارنايى ساقتالىپ وتىرعان با؟ ارينە, ءبىز بانكروتتىققا ۇشىراعان اۆتوپاركتى اقتاعىمىز كەلمەيدى, سوتتىڭ شەشىمى بويىنشا ونىڭ دا كىناسى بار شىعار. ال بىراق بۇنداي تاجىريبە كەڭ تارالسا, باسقا دا قالالاردا قولداۋسىز قالعان اۆتوپاركتەردىڭ تاعدىرى الاڭداتادى», دەدى دەپۋتات.
سونداي-اق دەپۋتار 2018-2020 جىلدارى رەسپۋبليكالىق جانە جەرگىلىكتى بيۋدجەتتەن بولىنگەن قاراجاتتىڭ قانشاسى تىكەلەي اۆتوبۋس پاركتەرىنە جەتكەندىگى, ال قانشاسى ءالى كۇنگە دەيىن اكىمدىكتىڭ قورىندا يگەرۋسىز جاتقانى تۋرالى, سونداي-اق 2022-2024 جىلدارعا ارنالعان بيۋدجەتتە وسى باعىتتا قانشا قاراجات قاراستىرىلاتىندىعى جونىندە مالىمەت بەرۋدى سۇرادى.
«قاراستىرىلعان قاراجات ءتيىستى مەكەمەلەرگە جەتكىزبەگەنىنىڭ ناتيجەسىندە, اۆتوپاركتەر بانكروتتىققا ۇشىراعان جاعدايدا جاۋاپكەرشىلىكتى كىمنەن سۇراۋ كەرەك؟», دەدى ول.
