ىرىكتەۋ سىنى اياقتالىپ, نەگىزگى جارىستا جەرلەستەرىمىزدىڭ اراسىنان العاشقى بولىپ كورتقا 20 جاستاعى تيموفەي سكاتوۆ شىقتى. الەمدىك رەيتينگتە 280-ورىندا تۇرعان ول اندرەاس سەپپيمەن سايىسقا ءتۇستى. 37 جاستاعى يتاليا تەننيسشىسىنىڭ ەسىمى جانكۇيەرلەرگە جاقسى تانىس. اتر تۋرنيرلەرىن ءۇش رەت ۇتقان سەپپي كەزىندە ۋيمبلدون مەن رولان گارروستىڭ ءتورتىنشى كەزەڭىندە ونەر كورسەتكەن. ال اۋستراليانىڭ اشىق بىرىنشىلىگىندە ءتورت رەت ءدال سول مەجەگە دەيىن جەتتى. وسى تابىسىنىڭ ارقاسىندا الەمنىڭ 18-راكەتكاسى اتاندى. قازىرگى كەزدە اندرەاس ۇزدىكتەر تىزىمىندە 87-ورىندى يەلەنۋدە.
دەسەك تە تيموفەي ازۋلى قارسىلاسىنان ەش قايمىققان جوق. اسىرەسە, العاشقى سەتتەگى ويىنى كەرەمەت اسەر قالدىردى. كەزدەسۋ بارىسىندا 1:4 ەسەبىمەن جەڭىلىپ جاتىپ, باسەكەنى تاي-برەيككە دەيىن جەتكىزدى. شەشۋشى تۇستا شيراق قيمىلداعان سكاتوۆ جەڭىستى سەپپيدىڭ ۋىسىنان ج ۇلىپ اكەتتى – 7:6. ەكىنشى سەتتە اپەننين تۇبەگىنىڭ تۇلەگىنە ەسە جىبەردى – 4:6. دەسەك تە ءۇشىنشى سەتتى تيموفەيدىڭ مىسى باسىم بولدى – 6:1. وسىلايشا, نۇر-سۇلتانداعى تۋرنيردە العاشقى سەنساتسيا تىركەلدى. ەندى سكاتوۆ بەلارۋس ەلىنىڭ وكىلى يليا يۆاشكومەن كەزدەسەدى.
كەشە دميتري پوپكو اۋستراليالىق دجون ميللمانمەن شەبەرلىك بايقاسا, بۇگىن ميحايل كۋكۋشكين جاسىل قۇرلىقتىڭ تاعى ءبىر وكىلى دجەيمس داكۆوردپەن كۇش سىناسادى. العاشقىسى الەمدىك رەيتينگتە 48-ورىندا تۇرسا, ەكىنشىسى 65-ساتىعا جايعاستى. بىراق ءبىزدىڭ جىگىتتەر ءوز جانكۇيەرلەرىن جەرگە قاراتپاۋ ءۇشىن كورتتا بارىن سالادى دەپ ويلايمىز. ال جارىستى ەكىنشى اينالىمنان باستالاعالى وتىرعان قازاقستاننىڭ ءبىرىنشى راكەتكاسى الەكساندر بۋبليك بۇگىن اتر تىزىمىندە 60-ورىندى ەنشىلەپ وتىرعان سەربيالىق ميومير كەتسمانوۆيچكە قارسى وينايدى.
