كوروناۆيرۋس • 19 قىركۇيەك، 2021

احۋال تۇراقتالعانداي، الايدا...

770 رەت كورسەتىلدى

اتىراۋدا كوروناۆيرۋس ينفەكتسياسىن جۇقتىرۋ دەرەگى سايابىرسىعانمەن، ءوڭىر ءالى دە «قىزىل ايماقتان» شىقپاي تۇر. قازىرگى احۋال قانداي؟ قانشا ادام ۆاكتسينا الدى؟ ورتالىق كوممۋنيكاتسيالار ورتالىعىنىڭ الاڭىندا وسى جانە وزگە دە ساۋالدارعا جاۋاپ بەرگەن وبلىس اكىمىنىڭ ورىنباسارى باقىتگۇل حامەنوۆانىڭ ايتۋىنشا، بىلتىرعى ناۋرىزدان بەرى 49 500 ادامنان كوروناۆيرۋس ينفەكتسياسى انىقتالعان.

– قاۋىپتى ۆيرۋستى جۇقتىرعان ناۋقاستاردىڭ 93 پايىزى ساۋىعىپ شىقتى. وڭىردە كوروناۆيرۋس ينفەكتسياسىنىڭ تارالۋى سوڭعى ءبىر ايدا 5،6 ەسەگە تومەندەدى. وسى­عان بايلانىستى 624 ورىندىق ين­فەكتسيالىق ستاتسيونار ازىرلەندى. ستاتسيونارلاردىڭ جانساقتاۋ بولىمىندە 40 توسەكتىك ورىن بار. قا­زىر ينفەكتسيالىق ستاتسيوناردا 518 ناۋقاس وقشاۋلانىپ، توسەكتىك ورىن جۇكتەمەسى 22 پايىزدى قۇراپ وتىر، – دەدى ب.حامەنوۆا.

كوروناۆيرۋس ينفەكتسياسىنىڭ ءبىرىنشى تولقىنى سانالعان بىل­تىرعى جازدا ءدارى-دارمەك تاپ­شىلىعى بايقالعان ەدى. مۇنى جوققا شىعارماعان وبلىس اكىمى ورىنباسارىنىڭ ايتۋىنشا، تۇرعىنداردىڭ جانى قىسىلىپ، ءدارى ىزدەگەن سابىلىسىنان سوڭ ءدارى-دارمەكتىڭ تۇراقتى قو­رىن جاساقتاۋ، دارىحانالارداعى با­عانىڭ تۇراقتىلىعىن ساقتاۋ ماقساتىندا «اتىراۋ» الەۋمەتتىك-كاسىپكەرلىك كورپوراتسياسى» اق مەن «ىڭكار» جشس اراسىندا كەلىسىم جاسالىپ، 500 ملن تەڭگە بولىنگەن. بۇل قارجىعا 42 ءتۇرلى ءدارى-دارمەك ساتىپ اكەلىنگەن. بۇعان قوسا، دەمەۋشىلىك كومەكپەن 3 ملرد-تان استام تەڭگەگە جەكە قورعانىش قۇرالدارى مەن مەديتسينالىق تەحنيكا ساتىپ الىنعان.

– قازىر وڭىردە 14 پتر-تەست زەرت­حاناسى جۇمىس ىستەپ تۇر. وندا تاۋلىگىنە 16 مىڭنان اس­تام تەست جۇرگىزۋ مۇمكىندىگى بار. مە­ديتسينالىق مەكەمەلەردە جەكە قورعانىش قۇرالدارى مەن ءدارى-دارمەكتىڭ ەكى ايلىق قورى جا­ساقتالدى. جەدەل مەديتسينالىق كو­مەك كورسەتۋ قىزمەتىن جەتىلدىرۋ باعى­تىندا جاڭادان 66 كولىك الىنىپ، 5 جىلجىمالى مەديتسينالىق كەشەن ىسكە قوسىلدى. اتىراۋ مەن قۇلسارى قالاسىندا 200 ورىندىق مودۋلدىك اۋرۋحانا پايدالانۋعا بەرىلدى، – دەدى وبلىس اكىمىنىڭ ورىنباسارى.

كارانتيندىك شەكتەۋ شارالارى اسىرەسە، شاعىن جانە ورتا بيزنەستىڭ وكىلدەرىنە وڭاي بولماي تۇر. كەيبىر كاسىپكەرلەر شىعىنعا باتقانىن ايتادى. سوعان بايلانىس­تى Ashyq جۇيەسى ەنگىزىلگەن ەدى. ماسەلەن، اتىراۋدا 13 قىركۇيەككە دەيىن اتالعان جۇيەگە 8 409 كا­سىپكەرلىك نىسانى قوسىلىپتى. دەگەنمەن قىركۇيەك باستالعالى 4 848 نىسان تەكسەرىلگەن. سول كەزدە 292 نىساننىڭ ەكى اپتا بويى Ashyq جۇيەسىن قولدانباعانى انىقتالعان. وسىعان بايلانىس­تى اتالعان نىساندار ەكى اپتا­لىق مەرزىمگە باعدارلامادان شى­عارىلدى.

اتىراۋ قالاسى مەن 7 اۋداندا قۇرىلعان 64 مونيتورينگتىك توپتىڭ مۇشەلەرى كارانتيندىك شەكتەۋ تالا­بىنىڭ ساقتالۋىن قاداعالايدى. توپ قۇرامىندا اكىمدىك، دەنساۋلىق ساقتاۋ، پولي­تسيا مەن باسقا دا ور­گانداردىڭ وكىلدەرى ەنگىزىلگەن. جىل باسىنان بەرى مۇنداي توپتار 51 713 نى­سانعا 12 501 رەيد جۇرگىزىپتى. رەيد ناتيجەسىندە 850 قۇقىق بۇ­زۋ­شىلىق انىقتالدى. كا­ران­تين تالابىن بۇزعان شاعىن جانە ور­تا بيزنەس نىساندارى مەن جەكە تۇلعالارعا 83 618 515 تەڭگە كولە­مىندە 596 ايىپپۇل سا­لىنعان. ال قىر­كۇيەك باستالعالى جۇر­گىزىل­گەن 366 رەيد كەزىندە 1 696 نىسان­نىڭ جۇمىسى قاداعالانعان. تەك­سەرۋ ناتيجەسىندە 31 اكىمشىلىك ءىس قوز­عالىپ، سالىنعان ايىپپۇل كولەمى 1 939 805 تەڭگەنى قۇراپ وتىر.

اكىم ورىنباسارىنىڭ ايتۋىنشا، سوڭعى كەزدە ۆاكتسينا سالدىرۋعا ىنتا بىلدىرۋشىلەر قا­تارى كوبەيگەن. ۆاكتسينالاردىڭ ءبىرىنشى كومپونەنتىن سالدىر­عان­دار سانى 215 357 (86%) ادامعا جەتسە، ەكىنشى كومپونەنتتى 166 570 تۇرعىن (76%) ەكتىرگەن. بۇل – وڭىردە ەكپە الۋشىلار قا­تا­رىنداعى تۇر­عىنداردىڭ 71،8 پا­يىزى. قازىر وبلىستا 59 ۆاكتسينا بەكەتى جۇمىس ىستەپ تۇر. ونىڭ ىشىندە 10 جىلجىمالى بەكەت بار. بۇل بەكەتتەرگە اقپان ايىنان بەرى ۆاكتسينالاردىڭ ءبىرىنشى كوم­پونەنتىنە ارنالعان 248 330، ەكىنشى كومپونەنت ءۇشىن 216 790 دوزا جەتكىزىلىپتى.

– وبلىستىڭ شالعاي اۋىلدارىن مەكەن ەتكەن تۇرعىنداردىڭ ۆاكتسينا سالدىرۋىن قامتاماسىز ەتۋ ماقساتىندا «قازاقستان تە­مىرجولى» اق-مەن بىرلەسكەن جو­بانى قولعا العان ەدىك. قازىر الىستاعى ەلدى مەكەندەردىڭ تۇر­عىندارى ۆاكتسينالاۋ بەكەتىنە پويىزبەن تەگىن جەتكىزىلەدى. جۇرت­شى­لىقتى ۆاكتسينا سال­دى­رۋعا ىن­تالاندىرۋ ءۇشىن وبلىس­تىق اكىم­دىكتىڭ قولداۋىمەن «ازا­مات­تىق اليانس» زتب 30 ماۋ­سىم­نان بەرى اقشالاي ۇتىس اكتسياسىن باس­تادى. وعان ۆاكتسينا العاندار عانا قاتىسۋدا. اقشالاي ۇتىس ويىنىنىڭ جالپى جۇلدە قورى 40 ملن تەڭگەنى قۇرايدى. باس جۇلدە – 10 ملن تەڭگە. وسى كەزگە دەيىن ۆاكتسينا ەكتىرگەندەر اراسىندا 200 مىڭ تەڭگەنىڭ 60 سەرتيفيكاتى، 1 ملن تەڭگەنىڭ 6، سونداي-اق 3 ملن تەڭگە تۇراتىن 2 سەرتيفيكات ويناتىلدى، – دەيدى ب.حامەنوۆا.

جاھان جۇرتىن جانالقىمنان العان قاۋىپتى ۆيرۋسقا قارسى وسىن­داي ءىس-شارالار اتقارىلىپ جاتقان اتىراۋدا 1 447 دارىگەر مەن 5 093 ورتا بۋىندى مەديتسينا قىزمەتكەرى جۇمىس ىستەيدى. الايدا دەنساۋلىق ساقتاۋ سالاسىنا ءالى دە 219 دارىگەر جەتىسپەيدى. اسىرەسە، جالپى تاجىريبەلىك دارىگەر، انەس­تيزيولوگ-رەانيماتولوگ، اكۋشەر-گينەكولوگ سەكىلدى ماماندار قاجەت-اق. ال بيىل جوعارى وقۋ ورنىن بىتىرگەن 34 جاس مامان كەلگەن. ونىڭ ىشىندە 26 ينتەرن، 5 رەزيدەنت، 3 باكالاۆر بار.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار