ەنەرگەتيكا ءمينيسترى ماعزۇم مىرزاعاليەۆ ۇكىمەت وتىرىسىندا ءمالىم ەتكەندەي, ىشكى نارىقتى ديزەل وتىنىمەن قامتاماسىز ەتۋ ءۇشىن پاۆلودار مۇناي-حيميا زاۋىتىندا جوندەۋ جۇمىستارىنىڭ مەرزىمىن اۋىستىرۋ نەمەسە قىسقارتۋ تۋرالى ماسەلە كۇن تارتىبىندە.
بۇدان باسقا, جانارمايدىڭ, ديزەل وتىنىنىڭ جانە مۇناي ونىمدەرىنىڭ باسقا دا جەكەلەگەن تۇرلەرىن قازاقستان رەسپۋبليكاسىنان تىس جەرلەرگە اۆتوموبيل كولىگىمەن اكەتۋگە تىيىم سالۋدى كوزدەيتىن بۇيرىقتىڭ قولدانىلۋىن تاعى 6 ايعا ۇزارتۋ تۋرالى ماسەلە پىسىقتالۋدا. بۇگىندە ەنەرگەتيكا, قارجى مينيسترلىكتەرى مەن ۇلتتىق قاۋىپسىزدىك كوميتەتىنىڭ «قر اۋماعىنان مۇناي ونىمدەرىن اكەتۋدىڭ كەيبىر ماسەلەلەرى تۋرالى» بىرلەسكەن بۇيرىعى بار.
سونداي-اق, ۇكىمەت وتىرىسىندا 2021 جىلدىڭ قاڭتار-تامىز ايلارىندا 44 ملن توننا مۇناي ەكسپورتتالعانى حابارلاندى. ماعزۇم مىرزاعاليەۆتىڭ ايتۋىنشا, مۇناي مەن كوندەنسات 56,1 ملن توننا وندىرىلگەن, جوسپاردىڭ ءىشىنارا ورىندالماۋى قاراشىعاناق جوباسى بويىنشا ارتتا قالۋ ەسەبىنەن ورىن العان. گازدىڭ دا 35,5 ملرد تەكشە مەترى ءوندىرىلدى. ءىرى جەر قويناۋىن پايدالانۋشىلاردىڭ ىشكى قاجەتتىلىكتەرىنىڭ ءوسۋى مەن تاۋارلىق گاز ءوندىرىسىنىڭ ازايۋى سەبەبىنەن 5 ملرد تەكشە مەتر ەكسپورتتالدى.
