ۇشاق ماسكەۋ ۋاقىتىمەن 18:15-تە (جەرگىلىكتى ۋاقىت بويىنشا 23:15) يركۋتسكىدەن شامامەن 500 كم قاشىقتىقتا ورنالاسقان كازاچينسكوە اۋىلىنان 4 كم قاشىقتىقتا قۇلاعان. پروكۋراتۋرا ۇشاق كازاچينسكي اۋەجايىنا قونعان كەزدە ەكىنشى اينالىمعا كىرۋگە تىرىسقانىن ايتتى. تەحنيكانىڭ ىستەن شىعۋى مەن ۇشقىشتىڭ كىناسى بولۋى مۇمكىن دەگەن نۇسقالار قاراستىرىلىپ جاتقانى بەلگىلى.
سوڭعى مالىمەتتەرگە سايكەس, وقيعا سالدارىنان ءتورت ادام – ۇشقىش پەن ءۇش جولاۋشى قايتىس بولدى. ال رەسەيدىڭ توتەنشە جاعداي مينيسترلىگىنىڭ حابارلاۋىنشا, 12 ادام زارداپ شەككەن. بارلىعى اۋرۋحاناعا جەتكىزىلگەن. ءبىر ادام اۋىر حالدە, ال قالعانىنىڭ جاعدايى ورتاشا دەپ باعالانىپ وتىر. يركۋتسك وبلىسىنىڭ بيلىگى قازا تاپقاندار مەن زارداپ شەككەندەردىڭ وتباسىلارىنا كومەك كورسەتىلەتىنىن مالىمدەدى.
