بىلتىر ەسىل اۋدانىنىڭ اكىمدىگى مەن بۋحارەستتىڭ №1 اۋدانىنىڭ مەرياسى مادەني ىنتىماقتاستىق تۋرالى مەموراندۋمعا قول قويعان ەدى. رۋمىن جاعى بۋحارەستتىڭ ورتالىعىنداعى گۇلزاردى قازاقستاننىڭ قۇرمەتىنە اتاپ, وندا اباي قۇنانباەۆتىڭ ءبيۋستىن ورناتتى.
ءىس-شارا ۇلى اقىننىڭ 175 جىلدىعىنا ورايلاستىرىلدى. ءوز كەزەگىندە, قازاقستان جاعى ەلورداداعى ساياباقتاردىڭ بىرىنە «بۋحارەست» اتاۋىن بەردى.
وسى ساياباقتا رۋمىن اقىنى ميحاي ەمينەسكۋدىڭ ءبيۋستى اشىلدى. ءىس-شاراعا مادەنيەت جانە سپورت ءمينيسترى اقتوتى رايىمقۇلوۆا, رۋمىنيانىڭ قازاقستانداعى, قىرعىزستانداعى جانە تاجىكستانداعى توتەنشە جانە وكىلەتتى ەلشىسى مادالينا لۋپۋ, سونداي-اق قوعام قايراتكەرلەرى مەن ەلوردالىق زيالى قاۋىم وكىلدەرى قاتىستى.
ء«بىز ءۇشىن اباي شىعارماشىلىعى قانشالىقتى قۇندى بولسا, رۋمىندار ءۇشىن ميحاي ەمينەسكۋ شىعارماشىلىعى دا سونداي ماڭىزدى دەۋگە بولادى. ولاردىڭ ەكەۋى دە – زاماناۋي پوەتيكالىق مادەنيەتتىڭ نەگىزىن قالاۋشىلار جانە ۇلتتىق مادەني قايتا ورلەۋ ءداۋىرىنىڭ شابىتتاندىرۋشىلارى. بۇگىنگى ءىس-شارا – ەكى ەل اراسىنداعى مادەني بايلانىستاردى دامىتۋدىڭ جارقىن ۇلگىسى. اتاپ ايتقاندا, ءبىز رۋمىنيامەن تۋريزم جانە مادەنيەت سالاسىنداعى كەلىسىمگە قول قويدىق, ال سپورت سالاسىنداعى ىنتىماقتاستىق تۋرالى حاتتاما قول قويۋ ساتىسىندا», دەپ اتاپ ءوتتى اقتوتى رايىمقۇلوۆا.
ءوز كەزەگىندە مادالينا لۋپۋ بۇل تەك رۋمىنيا مەن قازاقستان ءۇشىن عانا ەمەس, بۇكىل ورتالىق ازيا ءۇشىن ماڭىزدى وقيعا ەكەنىن اتاپ ءوتتى.
«ورتالىق ازيا وڭىرىندە رۋمىننىڭ ۇلتتىق اقىنىنىڭ سكۆەرى مەن ءبيۋستى بار قازاقستاننان باسقا بىردە-ءبىر ەل جوق. وسى مۇمكىندىكتى پايدالانا وتىرىپ, قازاقستان حالقىن تاۋەلسىزدىكتىڭ 30 جىلدىق مەرەيتويىمەن قۇتتىقتايمىن. رۋمىنيا العاشقى ەلدەردىڭ قاتارىندا قازاقستاننىڭ ەگەمەندىگىن مويىندادى. قازاقستان – رۋمىنيانىڭ ورتالىق ازياداعى نەگىزگى ارىپتەستەرىنىڭ ءبىرى. قازاقستان استاناسىندا ەمينەسكۋ ءبيۋستىنىڭ اشىلۋى – ءبىزدىڭ حالىقتارىمىزدىڭ ءبىر-ءبىرىن جاقسى تانىپ, ديپلوماتيالىق قارىم-قاتىناستاردىڭ جاڭا دەڭگەيگە كوتەرىلۋىنە جاقسى سەرپىن بەرەدى», دەدى رۋمىنيا ەلشىسى.
اشىلۋ سالتاناتىنان كەيىن سپيكەرلەر مەملەكەتارالىق قاتىناستاردىڭ ۇزاق مەرزىمدىلىگى مەن وركەندەۋىنىڭ بەلگىسى رەتىندە قاراعاي مەن مامىرگۇل بۇتالارىن وتىرعىزدى.
