«7 قىركۇيەكتە, ساعات 03:30 شاماسىندا, پاۆلودار-قىزىلوردا اۆتوجولىنىڭ 113-ءشى شاقىرىمىندا جول-كولىك وقيعاسى ورىن الدى. وندا 34 جاستاعى «تويوتا كامري» اۆتوكولىگىنىڭ جۇرگىزۋشىسى جول مەتالل كەسكىشپەن سوقتىعىسىپ, كەيىن كولىك تراەكتورياسىن وزگەرتىپ, «Shengrun» ترالىنا ءىلىنىپ تۇرعان «ماز» اۆتوكولىگىمەن سوقتىعىسقان. جول اپاتى سالدارىنان «تويوتا كامري» اۆتوكولىگىنىڭ ەكى جولاۋشىسى العان جاراقاتتارىنان وقيعا ورنىندا قايتىس بولدى», دەدى پاۆلودار وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى جاسقايرات قايىروۆ.
اتالعان دەرەك بويىنشا قازاقستان رەسپۋبليكاسى قك-ءنىڭ 345-بابىنىڭ 4-بولىگى «كولىك قۇرالدارىن باسقاراتىن ادامداردىڭ جول قوزعالىسى نەمەسە كولىك قۇرالدارىن پايدالانۋ ەرەجەلەرىن بۇزۋى» بويىنشا سوتقا دەيىنگى تەرگەۋ باستالدى.
«تاعى ءبىر قايعىلى وقيعا 10 قىركۇيەكتە ساعات 01:10-دا شىدەرتى كەنتىنىڭ جانىنداعى «پاۆلودار-نۇر-سۇلتان» اۆتوجولىندا ورىن الدى. «تويوتا كامري» جۇرگىزۋشىسى رۋلدە ۇيىقتاپ قالىپ, ىلەسپە باعىتتا كەلە جاتقان تىركەمەگە ىلىنگەن كامازبەن سوقتىعىستى», دەپ حابارلادى پاۆلودار وبلىسى پوليتسيا دەپارتامەنتىنىڭ ءباسپاسوز قىزمەتى.
ناتيجەسىندە «تويوتا كامري» اۆتوكولىگىنىڭ ءبىر جولاۋشىسى قايتىس بولدى, ال ەكىنشىسى دەنە جاراقاتتارىمەن اۋرۋحاناعا جەتكىزىلدى. قازىرگى ۋاقىتتا سوتقا دەيىنگى تەرگەۋ جۇرگىزىلۋدە.
جىل باسىنان بەرى پاۆلودار وبلىسىنىڭ جولدارىندا 356 اپات تىركەلىپ, 31 ادام قازا تاپتى.
