جولداۋدا قاراپايىم اۋىل مەكتەپتەرىنە دە قولداۋ كورسەتىلەتىنى ايتىلدى. اۋىل مەكتەبىنىڭ ماسەلەسى – قازاقتىڭ ەلدىگىنىڭ ماسەلەسى, اۋىلدىڭ, ەلدى مەكەننىڭ ساقتالۋىنىڭ بىردەن-ءبىر العىشارتى.
جاڭا ءبىلىم بەرۋ نىساندارىن سالۋدا بيزنەستى تارتىپ, قولداۋدىڭ جاڭا تۇرلەرىن, سونىڭ ىشىندە قارجىلاندىرۋدىڭ ۆاۋچەرلىك ءتاسىلىن ويلاستىرۋ قاجەت ەكەندىگىنە ءمان بەرىلدى. وسى ورايدا مەكتەپ سالعان ينۆەستورلار قۇرىلىس جۇمىسىنىڭ شىعىنىمەن قاتار سول مەكتەپكە جاڭا فورماتسياداعى مۇعالىمدەردى دايارلاۋعا, ولاردىڭ بىلىمدەرىن 3 جىلدا ءبىر جەتىلدىرۋگە كەتەتىن شىعىندى دا ەسكەرسە دەپ ويلايمىن. بۇگىنگى تاڭدا جاڭا فورماتسياداعى مۇعالىمدەر – قازىرگى نازارباەۆ زياتكەرلىك مەكتەبىندەگى مۇعالىمدەر. ءار مۇعالىمدى بۇل دەڭگەيگە جەتكىزۋ ءۇشىن مەكتەپتى نازارباەۆ زياتكەرلىك مەكتەبىندەگىدەي ماتەريالدىق, تەحنيكالىق بازامەن تولىق قامتاماسىز ەتۋ قاجەت.
ەلىمىزدەگى دەموگرافيالىق ءۇردىستىڭ وڭ وزگەرىستەرى جاڭا وقۋ جىلىندا ءبىرىنشى سىنىپقا كەلەتىن بالانىڭ سانىنان ايقىن كورىنەدى. بۇل ماسەلە جىل سايىن ەلىمىزدە جۇزدەگەن مەكتەپ پەن بالاباقشا سالۋ قاجەتتىگىن ايقىندايدى. وسىعان وراي بولاشاق مۇعالىم ماماندارىن دايارلايتىن جوعارى وقۋ ورىندارىنا دا سان مەن ساپا جاعىنان تالاپتىڭ ءبىرشاما كۇشەيتىلەتىندىگىن سەزەمىز.
بيىل پەداگوگيكالىق ماماندىقتى تاڭداعان مەكتەپ تۇلەكتەرىنە ۇبت بالى 75-تەن كەم بولماۋى تالاپ ەتىلدى. بۇل – وتە جوعارى كورسەتكىش. سەمەي قالاسىنىڭ شاكارىم اتىنداعى ۋنيۆەرسيتەتىندەگى پەداگوگيكالىق ماماندىقتارعا, اسىرەسە, ماتەماتيكا, فيزيكا, ينفورماتيكا مۇعالىمدەرىن دايارلاۋ ماماندىقتارىنا كۇندىزگى بولىمگە 182 ستۋدەنتتىڭ, ونىڭ ىشىندە 22 «التىن بەلگى» يەگەرىنىڭ قابىلدانۋى – جاستاردىڭ بىلىمگە, ۇستازدىق قىزمەتكە دەگەن قۇشتارلىعى بولار. وسى جاستار – بولاشاق ۇستازدار ەل پرەزيدەنتىنىڭ بۇگىنگى جولداۋىنداعى مىندەتتەردى جۇزەگە اسىراتىن ءبىزدىڭ عىلىمي-پەداگوگيكالىق قىزمەتىمىزدىڭ جەمىسى بولادى دەپ سەنەمىن!
ورالتاي جولىمباەۆ,
سەمەي قالاسىنىڭ شاكارىم اتىنداعى
ۋنيۆەرسيتەتىنىڭ كافەدرا مەڭگەرۋشىسى,
قاۋىمداستىرىلعان پروفەسسور
