كۇندەلىكتى باسىلىم بەتىنەن: «كۇرەسىپ جاتىرمىز», دەگەن اقپاراتتى وقىعان سايىن, كوڭىل توعايتقانداي بولعانىمەن, اششى ىشەكتەي شۇباتىلعان اۋىر كۇندەر قاشان اياقتالار ەكەن دەپ الاڭدايسىڭ.
جولداۋدىڭ العاشقى بولىگىنىڭ «پاندەميادان كەيىنگى كەزەڭدەگى ەكونوميكالىق دامۋ» دەپ اتالعانىن كورىپ, ورىن العان قيىندىقتاردىڭ سەبەبى تۋرالى تەرەڭ تالداۋلار مەن ودان شىعۋدىڭ ناقتى جولدارى تۋرالى وقىعانىڭدا, بويىڭا سەنىم ۇيالاپ, كادىمگىدەي سەرپىلىپ قالاسىڭ.
ويعا العاننىڭ قاپىسىز ورىندالارىنا ەش كۇمان جوق.
قيان-كەسكى ۇرىستىڭ ورتاسىندا ەلدى دامىتۋ جونىندەگى جوسپاردى قاراپ وتىرىپ چەرچيلل: «مۇندا نەگە مادەنيەت قاراستىرىلماعان؟ ەگەر مادەنيەت جوق بولسا, وندا نە ءۇشىن سوعىسىپ جاتىرمىز؟!» دەپ تاڭعالعان ەكەن. سول ايتقانداي, پاندەميامەن الىسقاندا, بولاشاق ءۇشىن جان بەرىپ, جان الىسىپ جاتقان جوقپىز با؟
ەندى, مىنە, ارادا اپتا وتپەي جاتىپ, ۇكىمەت مەملەكەت باسشىسى جولداۋىنىڭ نەگىزگى باعىتتارى مەن باستامالارى بويىنشا مىندەتتەردى ساپالى ءارى جەدەل شەشۋگە باعىتتالعان «جولداۋدى ىسكە اسىرۋ ءۇشىن جالپىۇلتتىق جوسپارىن» ازىرلەپ ۇلگەردى.
پرەزيدەنتتىڭ قولداۋىمەن جاعادان دا الىپ, ەتەكتەن دە تارتىپ, باس كوتەرتپەي جاتقان قيىندىقتاردىڭ اراسىنان كوكتەمگى قىزعالداقتاي, كەنەن تاريحىمىزدى تۇگەندەپ, ۇرپاق تاربيەسىندە ماڭىزدى ءرول اتقاراتىن ءبىزدىڭ ورتالىقتىڭ قۇرىلۋى – اتا-بابا اماناتىنا شەكسىز ادالدىق پەن كەلەشەككە ارنالعان كەمەل قادامنىڭ جارقىن ۇلگىسى ەدى.
«مادەنيەت» دەگەن جالعىز اۋىز ءسوزدىڭ كۇنى بۇگىن التى جۇزگە جۋىق انىقتاماسى بار. بۇل – ونىڭ ادام ومىرىمەن بىتە قايناسىپ جاتقاندىعىنىڭ بەلگىسى. وسى سالا قىزمەتكەرلەرىنىڭ, كىتاپحاناشىلار مەن مۇراعاتشىلاردىڭ ەڭبەكاقىسىن كوتەرۋ ماسەلەسى كوكەيگە قونادى.
مەملەكەت باسشىسى قاسىم-جومارت توقاەۆتىڭ: «حالقىمىز ءۇشىن زيالى قاۋىمنىڭ ورنى قاشاندا ەرەكشە. ۇلت تاعدىرى سىنعا تۇسكەن ساتتە كوزى اشىق ازاماتتار ءاردايىم كوش باستاعان. اداسقانعا ءجون سىلتەپ, جاستارعا باعىت-باعدار بەرگەن. ەل اعالارى ءبىراۋىز سوزبەن تەنتەگىن تىيىپ, تەكتىسىن تورگە وزدىرعان» دەگەن ءسوزى قۋات بەرىپ قانا قويمايدى, اسقارالى مىندەت جۇكتەيدى.
تاۋەلسىزدىگىمىزدىڭ 30 جىلدىعى قارساڭىندا ايتىلعان جولداۋ بۇلت استىنان شىققان كۇن سەكىلدى جانىمىزدى جادىراتىپ تاستادى. شىن مانىندە, «ەگەمەندىك دەگەنىمىز – جالاڭ ۇران مەن جالىندى ءسوز ەمەس», ەندىگى جەردە قايناعان ءىس كۇتىپ تۇر.
الىبەك اسقار,
«گەرالديكالىق زەرتتەۋلەر ورتالىعى» رەسپۋبليكالىق مەملەكەتتىك مەكەمەسىنىڭ ديرەكتورى
