قارقابات انا ەسكەرتكىشىنىڭ اشىلۋ سالتاناتىنا قازاقستان جازۋشىلار وداعىنىڭ توراعاسى ۇلىقبەك ەسداۋلەت, اقىن, مەملەكەتتىك سىيلىقتىڭ لاۋرەاتى سەرىك اقسۇڭقار ۇلى جانە اتقارۋشى بيلىك پەن زيالى قاۋىم وكىلدەرى, قۇرمەتتى قوناقتار قاتىستى.
– قازاق حالقىنىڭ تاريحىندا ءىز قالدىرعان قازداۋىستى قازىبەك بيدەن باستاپ باتىر-عارىشكەر توقتار اۋباكىروۆكە دەيىنگى تۇلعالار اناسىنىڭ ەسىمى ەشقاشان ۇمىتىلماق ەمەس. بۇل ەسكەرتكىشتىڭ وسكەلەڭ ۇرپاقتى وتانسۇيگىشتىك رۋحتا تاربيەلەۋ ىسىندەگى ماڭىزى زور, – دەپ اتاپ ءوتتى نىساننىڭ اشىلۋىندا ءسوز سويلەگەن ۇلىقبەك ەسداۋلەت.
ەڭسەلى ەسكەرتكىشكە قاجەتتى قاراجاتتى ورتالىق قازاقستان اكادەمياسىنىڭ رەكتورى باقتىباي ءجۇنىسوۆ باستاماشى بولىپ, قارقابات انا ۇرپاقتارى جيناعان.
قازاقستان سۋرەتشىلەر وداعى قاراعاندى وبلىستىق فيليالىنىڭ شەبەرحاناسىندا قۇيىلعان ەسكەرتكىشتىڭ اۆتورى – بەلگىلى ءمۇسىنشى بەيبىت مۇستافين.
