بۇل تۋرالى قر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى مالىمدەدى.
جول كولىك وقيعالارىنىڭ (جكو) ءوسۋى وتكەن جىلدىڭ ۇقساس كەزەڭىمەن سالىستىرعاندا 10,2%-دى قۇرادى, زارداپ شەككەندەردىڭ سانى 11,2%-عا ءوستى.
ءتۇرلى جكو سالدارىنان 10 947 ادام دەنە جاراقاتىن الدى (10,5%-عا ءوستى) جانە 1 258 ادام قايتىس بولدى (17,7%-عا ءوستى).
جولداردا كامەلەتكە تولماعاندار زارداپ شەككەندەردىڭ ءوسۋى ەرەكشە نازار اۋدارۋعا تۇرارلىق, ولاردىڭ سانى 1808-دەن 2298-گە دەيىن ارتتى جانە زارداپ شەككەندەردىڭ جالپى سانىنىڭ 18,8%-ىن قۇرايدى.
جاسالعان ورنى بويىنشا جول اپاتتارىنىڭ نەگىزگى بولىگى 72,6% نەمەسە 6030 ەلدى مەكەندەردە, 1512 حالىقارالىق, رەسپۋبليكالىق ماڭىزى بار تراسسالاردا, 765 وبلىستىق, اۋداندىق ماڭىزى بار جولداردا تىركەلدى. ەلىمىزدىڭ جولدارى مەن كوشەلەرىندەگى اپاتتار تۋرالى تولىق اقپارات «qamqor.gov.kz» سايتىنىڭ «اقپاراتتىق سەرۆيس» بولىمىندە ورنالاستىرىلعان.
كوبىنەسە جكو كولىك قۇرالدارىنىڭ سوقتىعىسۋىنان – 3420 فاكت, سونداي-اق جاياۋ جۇرگىنشىلەردى قاعىپ كەتۋىنەن – 2897 ورىن الدى.
زەرتتەۋ ناتيجەلەرىنە سايكەس جكو-نىڭ 87% جۇرگىزۋشىلەردىڭ كىناسىنەن (7256 فاكت), ونىڭ ىشىندە 322 الكوگولدىك نەمەسە ەسىرتكىلىك ماس كۇيدە بولعان. جول-كولىك وقيعالارى تۋرالى تالدامالىق اقپارات «قازاۆتوجول» ۇلتتىق كومپانياسى» اق-عا قاراۋ جانە جۇمىستا قولدانۋ ءۇشىن جولداندى.
ەڭ كوپ ءولىم جاعدايى بۇيىرلىك جانە ىلەسپە باعىتتاعى اۆتوكولىك قۇرالدارىنىڭ سوقتىعىسۋ ناتيجەسىندە جاسالدى (قايتىس بولعانداردىڭ جالپى سانىنىڭ 40,5%). ەكىنشى ورىندا – جاياۋ جۇرگىنشىنى قاعىپ كەتۋمەن بايلانىستى جول كولىك وقيعالارى (قازا بولعانداردىڭ جالپى سانىنىڭ 26,9%) بولىپ تابىلادى. بەلگىلەنگەن جىلدامدىقتىڭ ارتۋىنان 1990 جكو ورىن العان, وندا 405 ادام قازا تاپتى.
بۇرىنعىداي جولدارداعى اپاتتاردىڭ ەڭ كوپ سانى الماتى قالاسىنا تيەسىلى – 2161 جاعداي, ال ەڭ جوعارى ءولىم كورسەتكىشى الماتى وبلىسىندا انىقتالدى, 268 ادام قايتىس بولدى.
جول كولىك وقيعالارىندا ادامدار زارداپ شەككەن ەلوردادا 349, شىمكەنت قالاسىندا 203 جكو تىركەلدى.
جكو-نىڭ ەڭ از سانى سولتۇستىك قازاقستان – 107 جانە ماڭعىستاۋ – 138 وبلىستارىندا ورىن الدى.
