دوڭگەلەك ۇستەلگە قاتىسۋشىلار پرەزيدەنت جولداۋىنىڭ باسىمدىقتارى مەن مىندەتتەرىن, ولاردى جۇزەگە اسىرۋعا قحا-نىڭ اتسالىسۋىن, سونداي-اق قوعامدىق كەلىسىم مەن ۇلتتىق بىرلىكتى نىعايتۋ بويىنشا اسسامبلەيانىڭ الداعى جۇمىسىنا توقتالدى. وتىرىستى اشقان قحا توراعاسىنىڭ ورىنباسارى – حاتشىلىق مەڭگەرۋشىسى مارات ءازىلحانوۆ قاتىسۋشىلار نازارىن جولداۋدىڭ «ۇلتتىڭ ۇيىسۋى – ودان ءارى دامۋدىڭ باستى فاكتورى» دەپ اتالاتىن جەتىنشى بولىمىنە اۋداردى.
– مەملەكەت باسشىسى 2021 جىلعى جولداۋدى ءوزىنىڭ جاڭا مارتەبەسى – قازاقستان حالقى اسسامبلەياسىنىڭ توراعاسى رەتىندە جاريالاعانىن اتاپ ءوتۋ قاجەت. جولداۋدىڭ نەگىزگى تەزيستەرىن زەردەلەي وتىرىپ, بىرىنشىدەن, مەملەكەت باسشىسىنىڭ ەتنوسارالىق قاتىناستار ماسەلەلەرىندەگى ستراتەگيالىق ساباقتاستىقتى قامتاماسىز ەتۋ جونىندەگى ساياسي ەرىك-جىگەرىنىڭ تاباندىلىعىن تەرەڭ تۇسىنەمىز. بۇلاردىڭ بارلىعى اسسامبلەيانىڭ 29-سەسسياسىندا ەلباسى نۇرسۇلتان نازارباەۆ ايقىنداپ بەرگەن ەتنوسارالىق قاتىناستار جانە ينتەگراتسيا سالاسىنداعى مەملەكەتتىك ساياساتتى جۇرگىزۋ, سونداي-اق ۇلتتىڭ جاڭا بىرەگەيلىگىن نىعايتۋ قاعيداتتارى مەن يدەولوگيالىق تاسىلدەرىنەن تىكەلەي تۋىندايدى, – دەدى م.ءازىلحانوۆ. ول سونداي-اق مەملەكەت باسشىسىنىڭ اسسامبلەياعا وركەنيەتتى ديالوگ پەن ءوزارا قۇرمەت مادەنيەتىن دامىتۋدى, ازاماتتىق بەلسەندىلىكتى جانداندىرۋدى تاپسىرعانىن اتاپ ءوتتى.
اقپارات جانە قوعامدىق دامۋ ۆيتسە-ءمينيسترى سەرىك ەگىزباەۆ ەلىمىزدەگى ەتنوسارالىق قاتىناستىڭ ماڭىزدىلىعى جونىندە ايتا كەلە, قازاق ءتىلىن دامىتۋ باعىتىندا اتقارىلعان جۇمىسقا توقتالدى.
– مينيسترلىك قازاق ءتىلىن دامىتۋعا, جەتىلدىرۋگە جانە ونىڭ قولدانىس اياسىن كەڭەيتۋگە, سونداي-اق قازاقستان ەتنوستارى اراسىندا مەملەكەتتىك ءتىلدى ۇيرەنۋگە ايرىقشا كوڭىل بولەدى. ەلىمىزدىڭ بارلىق وڭىرلەرىندەگى دوستىق ۇيلەرىندە ەتنومادەني بىرلەستىكتەر جانىنداعى جەكسەنبىلىك مەكتەپتەر جۇمىس ىستەيدى. وندا كەلۋشىلەر مەملەكەتتىك ءتىلدى جانە ەتنوستاردىڭ انا تىلدەرىن وقىپ, قازاق حالقىنىڭ باي مادەنيەتى مەن ەجەلگى داستۇرلەرىمەن تانىسادى. ەلىمىز بويىنشا بارلىعى 174 جەكسەنبىلىك مەكتەپ جۇمىس ىستەيدى, ونىڭ ىشىندە 124 توپ قازاق ءتىلى كۋرستارىن وتكىزەدى. وعان 1 200-گە جۋىق ادام قاتىسادى. سونىمەن قاتار دوستىق ۇيلەرىنىڭ بازاسىندا تۇراقتى نەگىزدە قازاق ءتىلىن وقىتۋ بويىنشا 18 «مامىلە» پىكىرتالاس كلۋبى ۇيىمداستىرىلدى, «قازاقتانۋ» رەسپۋبليكالىق مادەني-اعارتۋشىلىق جوباسى ىسكە اسىرىلادى, – دەدى س.ەگىزباەۆ.
وتىرىستا ءسوز العان «دۋستليك» وزبەك ەتنومادەني بىرلەستىكتەرى قاۋىمداستىعىنىڭ توراعاسى يكرامجان حاشيمجانوۆ 30 جىل بويى جيناقتاعان مول تاجىريبەمىزدىڭ ارقاسىندا ءبىزدىڭ قوعامدىق كەلىسىم مەن جالپىۇلتتىق بىرلىك سالاسىنداعى مەملەكەتتىك ساياساتىمىز الەمدىك قوعامداستىق تاراپىنان وڭ باعالاناتىنىن باسا ايتتى.
– بۇگىندە شىمكەنت قالاسى تۇرعىندارىنىڭ 30 پايىزدان استامىن ءتۇرلى ەتنوس وكىلدەرى قۇرايدى. قالامىزدا ەتنوستاردىڭ ءتىلى مەن مادەنيەتىن, سالت-ءداستۇرىن ۇستانۋعا, دارىپتەۋگە, ساقتاۋعا لايىقتى جاعداي جاسالعان. بۇل تۇرعىدا ەلىمىز وركەنيەتتى ەلدەردەن وزىق تۇراتىن پاراساتتى ساياسات ۇستانىپ وتىر. ءوز كەزەگىندە بارشا ەتنوس اسسامبلەيانىڭ بەرەكەلى شاڭىراعىنىڭ استىنا جيىلىپ, ەل بىرلىگىنە باعىتتالعان اۋقىمدى جوبا-جوسپارلاردى ۇتىمدى ىسكە اسىرۋعا جانە ەڭ باستىسى – مەملەكەت قۇراۋشى قازاق حالقىنىڭ ماڭايىنا توپتاسىپ وتىر, – دەدى ي.حاشيمجانوۆ. ول سونداي-اق جولداۋعا قولداۋ كورسەتۋ جانە ونى ناقتى ءارى ساپالى ورىنداۋ بارشامىزعا ورتاق مىندەت ەكەنىنە, سوندىقتان تاۋەلسىزدىك تويى قارساڭىنداعى مەملەكەت باسشىسى ايتقان بارلىق تاپسىرمالاردى ءار سالا ماماندارى ساپالى ءارى ناتيجەلى ورىنداعاندا عانا ءبىز ەل جاعدايىنىڭ ءىس جۇزىندە جاقسارعانىنىڭ كۋاسى بولاتىنىمىزعا سەنىم ءبىلدىردى.
جازۋشى, مادەنيەت سالاسىنىڭ ۇزدىگى مالىك وتارباەۆ جولداۋدىڭ قوعامدا ورىن الىپ وتىرعان كۇرمەۋى كۇردەلى ماسەلەلەردىڭ شەشىلۋىنە ءۇمىت بولعانىن اتاپ ءوتتى.
– جولداۋدا كوكەيدەگى كوپتەگەن تۇيتكىلدى ماسەلەلەردىڭ ءتۇيىنى تارقادى. ماسەلەن, ازىق-ت ۇلىكتىڭ باعاسى شارىقتاپ وسە باستاعان شاقتا ناقتى شەشىم جولدارىن ۇسىنىپ, قوعامداعى الاڭداۋشىلىقتى باستى. سونداي-اق كوكەيىمىزدە جۇرگەن ەڭ ءبىر ماڭىزدى ماسەلە – ءتىل مەن ادەبيەت, ونەر مەن مادەنيەت سالاسىن ودان ءارى دامىتۋ, مادەنيەت قىزمەتكەرلەرىنىڭ جالاقىسىن كوتەرۋ جانە جاس تالانتتاردى قولداۋ جانە ولارعا قامقورلىق كورسەتۋ بولدى. بۇل شىن مانىسىندە زيالىلارىمىزدىڭ كوڭىلىنەن شىققان جاعىمدى جاڭالىق, – دەدى مالىك وتارباەۆ.
ودان بولەك جيىندا ءسوز سويلەگەن قازاقستان نەمىستەرىنىڭ «ۆوزروجدەنيە» بىرلەستىگى قامقورشىلىق كەڭەسى توراعاسىنىڭ ورىنباسارى ەۆگەني بولگەرت بۇل جولداۋدىڭ «ۆوزروجدەنيە» قازاقستاندىق نەمىستەر بىرلەستىگى ءۇشىن تاياۋ بولاشاققا باعىتتالعان باعدارلامالىق قۇجاتى بولاتىنىن اتاپ ءوتتى.
اسسامبلەيانىڭ «جاڭعىرۋ جولى» رەسپۋبليكالىق جاستار قوزعالىسىنىڭ مۇشەسى, «جاستار» عىلىمي-زەرتتەۋ ورتالىعى ديرەكتورىنىڭ ورىنباسارى ەلينا پاۋلي قازاق ءتىلىنىڭ قولدانىسىن كەڭەيتۋ اسسامبلەيا مىندەتتەرىنىڭ ءبىرى ەكەنىنە توقتالدى.
– ءبىز ۇرپاق بولاشاعىن ويلاي وتىرىپ, ولاردىڭ قازاق ءتىلىن بىلۋىنە جاعداي جاساۋىمىز جانە قولداۋىمىز كەرەك. مەملەكەت تاراپىنان بارلىق جاعداي جاسالعان. مىسال رەتىندە رەسپۋبليكالىق بارلىق دوستىق ۇيلەرىندە قۇرىلعان قازاق ءتىلىن مەڭگەرۋگە ارنالعان «مامىلە» كلۋبتارىن ايتۋعا بولادى. وسىنداي باستامالاردى قولداي وتىرىپ زاماناۋي فورماتتا جۇرگىزگەن جۇمىستى دامىتۋ قاجەت, – دەدى اسسامبلەيا جاستار قوزعالىسىنىڭ وكىلى.
وسىلايشا, ءىس-شارا بارىسىندا جولداۋدى جۇزەگە اسىرۋدا قازاقستان حالقى اسسامبلەياسىنىڭ باستى مىندەتى ايقىندالىپ, اتقارىلاتىن جۇمىستىڭ باعىتى بەلگىلەندى.
