قازاقستان • 09 قىركۇيەك، 2021

سىرقاتتانۋ دەڭگەيى تومەندەپ كەلەدى

89 رەت كورسەتىلدى

دۇنيەنى ءدۇر سىلكىندىرگەن ىندەتتىڭ ءىز سالعانىنا ەكى جىلعا جۋىقتادى. الەمنىڭ كەي بۇرىشى الاڭسىز الاڭ­دارعا جيىلىپ، قالىپتى ومىر­مەن قاۋىشىپ ۇلگەردى. باسقا ءبىر ايماقتارى ءالى دە بەتىنەن بەتپەردەسىن تاستاماي، ساقتىق شارالارىن ساقتاۋعا مىندەتتەلىپ وتىر. ال ەلىمىز­دەگى ەپيدەميالىق جاعدايدى تولىق جاقساردى دەپ ايتۋ ەرتە. دەگەنمەن تامىز ايىمەن سا­لىس­تىرعاندا سىرقاتتانۋ دەڭگەيى 1،4 ەسە تومەندەگەن.

«پاندەميا باستالعاننان بەرى الەمدە كوروناۆيرۋس ينفەكتسياسىنىڭ 220 ملن-نان اسا جاعدايى تىركەلدى، وكىنىشكە قاراي 4،5 ملن-نان اسا ادام قايتىس بولدى. قازاقستاندا 8 قىركۇيەكتە كوروناۆيرۋستىڭ وڭ ناتيجەسىمەن 824 مىڭنان اسا جانە كوروناۆيرۋستىڭ تەرىس ناتيجەسىمەن 71 مىڭنان اسا جاعداي تىركەلدى. كۆي-مەن اۋىراتىن ناۋقاستاردىڭ شامامەن 88 پايىزى ساۋىعىپ شىقتى»، دەدى دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ.

ونىڭ ايتۋىنشا، ەپيدەميالىق جاعداي ماتريتساسىنا سايكەس، قازاق­ستاننىڭ 12 ءوڭىرى «قىزىل ايماق­تا» ورنالاسقان. سوڭعى اپتادا «سارى ايماققا» 4 وبلىس اۋىس­تى. بۇل – شىعىس قازاقستان، جام­بىل، سول­تۇس­تىك قازاقستان جانە قىزىل­ور­دا وبلىستارى. «جاسىل ايماقتا» تۇركىس­­تان وبلىسى تۇر. سوڭ­عى ەكى اپتادا ەپيدەميالىق جاعداي­دىڭ بىرتىندەپ تۇراقتانۋى بايقا­لا­دى. تامىز ايى­مەن سالىستىر­عاندا سىرقاتتانۋ دەڭ­گەيى 1،4 ەسە تومەندەدى.

مينيسترلىك مالىمەتى بويىنشا ءبىرىنشى كومپونەنتپەن 6 928 646 ادام، ەكىنشى كومپونەنتپەن 5 755 817 ادام ۆاكتسينا سالدىردى. سونداي-اق م.شورانوۆ ەلىمىزدە 15 قىركۇيەك كۇنى تۇماۋعا قارسى ۆاكتسينالاۋ باس­تالاتىنىن ايتتى.

«جاقىنداپ قالعان جرۆي، ياعني تۇماۋ ماۋسىمىنا ايرىقشا توقتالىپ وتكىم كەلەدى. بيىل بيۋدجەت قارا­جاتى ەسەبىنەن رەسەيدە شىعارىلعان «گريپپول+» ۆاكتسيناسىنىڭ 2،5 ملن دوزاسى ساتىپ الىندى. ۆاكتسينا قۇرامىندا الداعى ماۋسىمعا قارسى شتامم بار. بۇل رەسپۋبليكانىڭ جالپى تۇرعىندارىنىڭ 13 پايىزىن قامتۋعا مۇمكىندىك بەرەدى»، دەدى ول.

وسىعان وراي ەلىمىزدىڭ باس مەم­لەكەتتىك سانيتار دارىگەرىنىڭ قاۋ­لىسى قابىلدانعان.

«مەملەكەتتىك بيۋدجەت قاراجاتى ەسەبىنەن حالىقتىڭ ەڭ ءالسىز توبى ۆاكتسينالاناتىنىن اتاپ وتكىم كەلەدى. ولار – مەديتسينا قىزمەتكەرلەرى، مەديتسينالىق ۇيىمداردا ديسپانسەر­لىك ەسەپتە تۇرعان بالالار، جەتىم بالا­لار جانە اتا-اناسىنىڭ قام­قور­لى­عىنسىز قالعان بالالار جانە باسقالار. بۇعان قوسا جۇمىس بەرۋ­شى­لەردىڭ جانە حالىقتىڭ جەكە قارا­جاتى ەسەبىنەن دە ۆاكتسينالاۋ جۇر­گىزىلەدى»، دەدى م.شورانوۆ.

ونىڭ ايتۋىنشا، رەسەيلىك ۆاكتسينادان بولەك قازاقستان اۋماعىندا تاعى 3 ءوندىرۋشىنىڭ 4 ۆاكتسيناسى تىركەلگەن. اتاپ ايتقاندا، سانوفي-پاستەر (فرانتسيا) وندىرگەن «ۆاك­سيگريپ تەترا»، ينفليۋۆاك (ني­دەر­لاند) مەن سينوۆاك بيوتەك (قىتاي) كومپانيالارى وندىرگەن ۆاكتسينالاردى دا الۋعا بولادى.

دەنساۋلىق ساقتاۋ ءبىرىنشى ۆيتسە-ءمينيسترى كوروناۆيرۋسپەن بىرنەشە رەت اۋىرعانداردىڭ سانىن اتادى.

«كوروناۆيرۋسپەن قايتالاپ اۋىر­عانداردىڭ سانى 23 مىڭ ادامداي بولادى. بىلتىرعى ناۋرىزدان باستاپ قايتالاپ اۋرىپ، ەمدەلگەندەردىڭ سانى – وسىنشا. سونىڭ ىشىندە 3 200 ادام – ستاتسيونارلىق ەم العاندار. قالعان 20 مىڭ ادام جەڭىل فورمادا اۋرىپ، ەمحانا دەڭگەيىندە ەم العان»، دەدى م.شورانوۆ.

سانيتارلىق-ەپيدەميولوگيالىق باقىلاۋ كوميتەتى توراعاسىنىڭ ورىن­باسارى زاۋرە احمەتوۆا قازاق­ستان­دا كوروناۆيرۋسقا قارسى قول­دا­نى­لاتىن ۆاكتسينالاردىڭ تيىم­دى­لى­گى تۋرالى ستاتيستيكانى ايتتى. ونىڭ ايتۋىنشا، ۆاكتسينانىڭ ءب­ىرىن­­شى كومپونەنتىن العاننان كەيىن اۋىرعانداردىڭ ۇلەسى 0،1 پايىز بولسا، ەكىنشى كومپونەنتىن العان­نان كە­يىن اۋىرعانداردىڭ ۇلەسى – 0،2 پايىز.

«كوروناۆيرۋسپەن اۋىرعان­دار­دىڭ ستاتيستيكاسىن قاراساق، 99،9 پايىزى – ۆاكتسينا الماعاندار. تەك 0،1 پايىزى عانا ۆاكتسينا العاننان كەيىن اۋىرعان. ونىڭ سانى – 20 211 ادام. ۆاكتسينالاردىڭ تۇرىنە قاراي جىكتەسەك، ءبىرىنشى كومپونەنت الىپ اۋىرعانداردىڭ سانى – 7 070 ادام. ونىڭ ىشىندە سپۋتنيك V العان 6 108 ادام (0،1 پايىز). بۇل ۆاكتسينانى 5 669 855 ادام العان. QazVac ۆاتسيناسىن 172 707 ادام العان. ونىڭ ىشىندە 172 ادام اۋىرعان (0،1 پايىز). Hayat-Vax العاندار سانى – 529 349 ادام. ونىڭ ىشىندە 553 ادام اۋىرعان (0،1 پايىز). CoronaVac ەكپەسىن العاندار اراسىندا 218 ادام اۋرۋ جۇقتىرعان (0،1 پايىز). جالپى، بۇل ۆاكتسينانى العاندار سانى – 249 373 ادام»، دەدى ز.احمەتوۆا.

ال ەكىنشى كومپونەنت العاننان كەيىن 13 141 ادام اۋىرعان ەكەن. بۇل – 0،2 پايىز. ونىڭ ىشىندە سپۋتنيك V العان 4 912 195 ادامنىڭ 11 101-ءى اۋىرعان (0،2 پايىز). QazVac ۆاتسيناسىنىڭ ەكىنشى كومپونەنتىن العان 113 730 ادامنىڭ 231-ءى اۋىرعان (0،2 پايىز). Hayat-Vax العاندار سانى – 472 463 ادام. ونىڭ ىشىندە 1 448 ادام اۋىرعان (0،1 پايىز). CoronaVac ەكپەسىن العانداردىڭ 341-ءى اۋرۋ جۇقتىرعان (0،15 پايىز).

سونىمەن قاتار بريفينگ بارىسىندا جالعان ۆاكتسينا پاسپورتىن ساتىپ العاندارعا قايتا ەكپە الۋ مۇمكىندىگى تۋرالى ءسوز بولدى.

«دەنساۋلىق ساقتاۋ مينيسترلىگى ءبىرىنشى كەزەكتە حالىقتى يممۋنداۋدى ساپالى جۇرگىزۋگە مۇددەلى. سوندىقتان ونداي ولقىلىقتاردىڭ جولىن بارىنشا قاتاڭ تۇردە كەسۋ كەرەك. وزدەرىڭىز بىلەسىزدەر، ىشكى ىستەر مينيسترلىگىمەن بىرلەسكەن جۇمىس ءجۇرىپ جاتىر. وڭىرلەردىڭ بارىندە دەرلىك جالعان ۆاكتسينا پاسپورتىن جاساعان مەديتسينا قىزمەتكەرلەرىنىڭ ۇستىنەن قىلمىستىق ءىس قوزعالدى. ۆاكتسينا پاسپورتىن زاڭسىز جولمەن ساتىپ الۋ ارەكەتتەرىمەن ءالى دە كۇرەسە بەرەمىز. ازىرگە جالعان ۆاكتسينا پاسپورتى بار ازاماتتاردان قايتا ەكپە الۋ تۋرالى ءوتىنىش تۇسپەدى. ءبىر كەزدە زاڭسىز تاسىلگە جۇگىنگەن، ەندى ناعىز ۆاكتسينا العىسى كەلەتىندەردەن وتى­نىمدەر كەلگەن جوق. جۇگىنگەن جاع­دايدا ونداي ازاماتتارمەن جۇ­مىس ىستەۋگە دايىنبىز. بىراق بۇل جەردە بىرقاتار نورماتيۆتىك-زاڭنا­مالىق ماسەلەلەردى اتقارۋ كەرەك. ياعني ءتيىستى قۇزىرلى ورگانداردىڭ ءتيىستى ماقۇلداۋى كەرەك. بىرىڭعاي شەشىم شىققان كەزدە ول تۋرالى مالىمدەيمىز»، دەدى م.شورانوۆ.

سونداي-اق ماماندار ەلىمىزدەگى 18 جاسقا تولماعان بالالارعا ۆاكتسينا تەك اتا-اناسىنىڭ رۇقساتىمەن عانا جاسالاتىنىن جەتكىزدى.

«ەڭ ءبىرىنشى اتا-اناسى قاجەتتى ما­لى­مەت الادى جانە قولحات بەرۋ ار­قى­­لى جاسالادى. وسىعان بايلانىس­تى مەكتەپ اياسىندا قانداي دا بولسىن ەكپە جاسالاتىن بولسا، اتا-انا­­لار جي­نالىسى وتەدى. بۇگىن­گى تاڭ­­دا با­لا­لار اراسىندا ەكپە سالۋ جۇر­­­گى­زى­لىپ جاتقان جوق. وسى­عان باي­­لا­­نىس­تى ءبىز اتا-انالار­دى جال­عان اق­پا­راتتارعا سەنبەۋگە شاقى­را­­مىز»، دەدى قوعامدىق دەنساۋلىق ساق­­تاۋ ۇلتتىق ورتالىعى باسقارما تور­اعا­سىنىڭ ورىنباسارى ايناگۇل قۋاتباەۆا.

 

سوڭعى جاڭالىقتار

سىردىڭ سۋى تومەندەپ بارادى

ايماقتار • بۇگىن، 17:27

دوللار ارزاندادى

قارجى • بۇگىن، 16:56

الماتى ماڭىندا جەر سىلكىندى

ايماقتار • بۇگىن، 16:38

قازاقستاندا ەت قىمباتتادى

قوعام • بۇگىن، 15:10

ەلىمىزدە كيىك سانى كوبەيىپ كەلەدى

قازاقستان • بۇگىن، 14:41

ۇقساس جاڭالىقتار