بۇل سايلاۋ ەل ءۇشىن ماڭىزدى بولىپ تۇر. ويتكەنى سايلاۋعا انگەلا مەركەل قاتىسپايدى. ونىڭ ورنىنا كىم كانتسلەر اتاناتىنى نەمىستەرگە عانا ەمەس, بۇكىل الەم ءۇشىن قىزىق.
ساۋالداماعا سۇيەنسەك, قازىرگى تاڭدا حالىق اراسىندا سوتسياليستىك-دەموكراتيالىق پارتيانىڭ (SPD) بەدەلى بيىك. ونى قولدايتىندار سانى 25 پايىزعا جەتكەن ەكەن. وسى كورسەتكىشپەن SPD قازىر توپ باستاپ تۇر. الدا-جالدا سايلاۋ ءدال بۇگىن وتە قالسا, جەڭىمپاز وسى پارتيا اتاناتىنى ءسوزسىز.
سوندىقتان شىعار, قازىرگى كانتسلەر انگەلا مەركەل حالىقتى ءوز پارتياسى حريستيان-دەموكراتيالىق پارتياسىنا داۋىس بەرۋگە شاقىردى. سوندا عانا پارتيانىڭ جەتەكشىسى ارمين لاشەتتى جاڭا بۋندەسباسشى رەتىندە تاعايىنداۋعا جول اشىلماق.
«داۋىس بەرۋشىلەر الدىندا ۇلكەن تاڭداۋ تۇر. SPD مەن جاسىلداردان قۇرالعان ۇكىمەت. ولار سولشىلداردىڭ قولداۋىن يەلەنبەك نەمەسە ولاردى ماقۇلدايدى. نەمەسە كانتسلەر ارمين لاشەت باستاعان CDU جانە CSU پارتيالارىنىڭ ۇكىمەتى. بۇل ءبىزدىڭ ەلدى جارقىن كەلەشەككە باستايدى», دەپ مالىمدەدى ا.مەركەل.
كانتسلەردىڭ سولشىلداردى تىلگە تيەك ەتۋى بەكەر ەمەس. ويتكەنى ولار قازىرگى بيلىكتەگى كوپشىلىك داۋىسقا يە حريستيان-دەموكراتيالىق پارتياسىنىڭ وپپوزيتسياسى سانالادى.
كەيىنگى ۋاقىتتا CDU-ءدىڭ باسىنان باق تايا باستادى. پارتيانىڭ جەتەكشىسى ءارى مەركەلدىڭ ءىزباسارى بولىپ ارمين لاشەت سايلانعان ەدى. الايدا ونىڭ ەل ىشىندەگى بەدەلى جوعارى ەمەس. كوروناۆيرۋس ىندەتى جاپپاي تاراعانعا دەيىن ول تۋرالى ەل ىشىندە جىلى پىكىر قالىپتاسقان-تۇعىن. بىراق پاندەميا ءبارىن وزگەرتىپ كەتتى. ماسەلەن, لاشەت باسشىلىق ەتكەن سولتۇستىك رين-ۆەستفاليا ءوڭىرى ۆيرۋستان قاتتى زارداپ شەكتى. ايماقتا دەرتكە شالدىققاندار سانى كۇن ساناپ ارتىپ جاتقان كەزدە لاشەت لوكداۋن ەنگىزۋگە اسىققان جوق.
ونىڭ ۇستىنە, العاشقىلاردىڭ ءبىرى بولىپ كارانتيندىك شەكتەۋ شارالارىن جەڭىلدەتۋگە كىرىستى. وسىلايشا, ءاپ-ساتتە تۇرعىنداردىڭ نارازىلىعىنا ۇشىرادى. بيىلعى شىلدەدە ەۋروپادا سۋ تاسقىنى بولىپ, ءبىراز ەل زارداپ شەگىپ, مىڭداعان ادام قايتىس بولعانى بەلگىلى. گەرمانيادا شامامەن 177 ادام قازا تاپتى. وسى وقيعادان كەيىن پرەزيدەنت فرانك-ۆالتەر شتاينمايەر باستاعان بيلىك وكىلدەرى سۋ تاسقىنىنان زارداپ شەككەن وڭىرلەرگە بارعان-دى.
كوڭىل كۇيى جوق پرەزيدەنت جۋرناليستەرگە سۇحبات بەرىپ جاتقاندا, ارتقى جاعىندا لاشەتتىڭ ارىپتەسىمەن ازىلدەسىپ, ك ۇلىپ تۇرعانى بەينەجازباعا ءتۇسىپ قالدى. سودان كەيىن نەمىستەر ونى سىنعا الىپ, ەل قايعىرىپ جاتقاندا كۇلگەنىن ايىپتادى. كوپ ۇزاماي-اق لاشەت كەشىرىم سۇرادى. بىراق قايعىدان قابىرعاسى قايىسقان حالىققا بۇل اسەر ەتە قويعان جوق.
جىعىلعانعا جۇدىرىق دەمەكشى, بۇعان دەيىنگى ساۋالدامالاردا جاسىلدار پارتياسى وزىق شىعىپ, ساياسي ەليتانى ءبىر ءدۇر سىلكىنتكەن ەدى. ەندى سوتسياليستىك-دەموكراتيالىق پارتيا الداعى سايلاۋدا جەڭىستەن دامەلى.
ونىڭ ۇستىنە, SPD اتىنان ساياسي دوداعا ءتۇسىپ جاتقان ولاف ءشولتستىڭ حالىق اراسىندا بەدەلى جوعارى. قازىرگى تاڭدا ول گەرمانيانىڭ ۆيتسە-كانتسلەرى, قارجى ءمينيسترى قىزمەتىن اتقارادى. ەگەر مەركەلدىڭ ءسوزى نەمىستەردىڭ پىكىرىن وزگەرتە الماسا, وندا سوتسياليستىك-دەموكراتيالىق پارتيانىڭ جەڭىسى ۋاقىت ەنشىسىندەگى شارۋا.
الدا-جالدا SPD جەڭىسكە جەتە قالسا, پارتيانىڭ الدىندا ەكى جول بار. جاسىلدار مەن ەركىن دەموكراتتار (FDP) پارتيالارىمەن كواليتسيا قۇرۋ. نەمەسە جاسىلدار مەن سولشىلدارمەن تىزە قوسۋ. ەكى جاعدايدا دا سوتسياليستىك-دەموكراتيالىق پارتيا بۇگىنگە دەيىن پارلامەنتتە كوپشىلىك ورىنعا يە بولىپ كەلگەن CDU-دان اۋىلىن الىس قوندىرادى.
قازىرگى تاڭدا بۋندەستاگتى CDU مەن SPD كواليتسياسى باسقارىپ كەلگەنى بەلگىلى. ەندەشە, الداعى سايلاۋ انگەلا مەركەلدىڭ كەتۋىمەن عانا ەمەس, بيلەۋشى كواليتسيانىڭ وزگەرۋىمەن دە ەستە قالماق.
