ەل پرەزيدەنتى دە قازاق ءتىلىن دامىتۋ مەملەكەتتىك ساياساتتىڭ باسىم باعىتىنىڭ ءبىرى بولىپ قالا بەرەتىنىن ايتتى. سوندىقتان دا بۇكىل ۇكىمەت مۇشەلەرى, بارلىق مەملەكەتتىك ورگاندار وسى باعىتقا قاراي بەت بۇرۋى قاجەت. سەبەبى راسىمەن دە قازاق ءتىلى قازىرگى تاڭدا ءبىلىم مەن عىلىمنىڭ, مادەنيەت پەن ءىس جۇرگىزۋدىڭ تىلىنە اينالىپ كەلەدى.
ەكىنشى ماسەلە – اۋىلشارۋاشىلىق سالاسىنداعى جايىلىمدىققا قاتىستى. كۇنى كەشە ەلدەن كەلدىك. جازدا ەل-ەلدى, اۋىل-ايماقتاردى ارالاعاندا, حالىقپەن كەزدەسكەندە وسى ماسەلەگە قاتىستى كوپتەگەن سۇراق قويىلدى. بەلگىلى ءبىر ادامداردىڭ مىڭداعان گەكتار جەرلەردى يەمدەنىپ العانىن حالىق اشىنىپ ايتىپ وتىر. وسى جايتقا ەرەكشە كوڭىل بولگەن مەملەكەت باسشىسى ۇكىمەتكە ناقتى تاپسىرمالار بەردى. ماسەلەنى تۇبەگەيلى شەشەتىن باتىل شارالار قابىلداۋدى مىندەتتەدى. ەڭ باستىسى – جايىلىمدىق جەرلەردى يەلەنىپ وتىرعان قوجايىنداردىڭ قۇقىقتىق مارتەبەسىن ايقىنداپ بەرەتىن «جەكە قوسالقى شارۋاشىلىقتار تۋرالى» بولەك زاڭ قابىلداۋ قاجەتتىگى ايتىلدى. الدىمىز – كۇز. جايلاۋداعى مال اۋىلعا تۇسكەندە جايىلىمدىق ماسەلەسى تاعى ۋشىعايىن دەپ تۇر. اۋىلدا جەمشوپ از. سوندىقتان اۋىل حالقىنا ورمان شارۋاشىلىعى جەرلەرىن پايدالانۋعا بەرۋ كەرەك دەپ ويلايمىن. بۇل جەرلەر جەكە شارۋالاردىڭ, قاراپايىم حالىقتىڭ يگىلىگىنە بەرىلۋى كەرەك.
ءۇشىنشى ماسەلە – قاسىم-جومارت توقاەۆتىڭ ەڭ تومەنگى جالاقى مولشەرىن كوبەيتۋگە قاتىستى تاپسىرماسى. ەلىمىزدە ەڭ تومەنگى جالاقى مولشەرى 2018 جىلدان بەرى وسكەن جوق. بىزدەگى ەڭ تومەنگى جالاقى دەڭگەيى تمد-نىڭ بىرقاتار ەلىنەن ارتتا قالىپ قويعان. وسىعان وراي پرەزيدەنت كەلەر جىلدان باستاپ ەڭ تومەنگى جالاقىنى 60 مىڭ تەڭگەگە دەيىن كوتەرۋ تۋرالى شەشىم قابىلدادى. شىنداپ كەلگەندە, بۇل – ەل-جۇرتتىڭ ەڭ كوپ كوتەرەتىن وزەكتى سۇراعى بولاتىن. الەۋمەتتىك سالاداعى قىزمەتكەرلەردىڭ ەڭبەكاقىسىن كوتەرۋ – بۇكىل حالىق شەشىمىن كۇتىپ وتىرعان ماسەلەنىڭ ءبىرى.
جاناربەك ءاشىمجانوۆ,
ءماجىلىس دەپۋتاتى
