ەلوردالىق ازاماتتىق باستامالار ورتالىعىندا وتكەن ءىس-شاراعا ساراپشىلار, ۇكىمەتتىك ەمەس ۇيىمداردىڭ وكىلدەرى, مەملەكەتتىك ورگانداردىڭ قىزمەتكەرلەرى, سونداي-اق ساياساتتانۋشىلار, الەۋمەتتانۋشىلار قاتىستى.
وتىرىس بارىسىندا پرەزيدەنت جولداۋى ءبىزدىڭ قوعامنىڭ ەڭ وتكىر جانە شۇعىل ماسەلەلەرىن شەشۋگە باعىتتالعان ەكونوميكالىق, الەۋمەتتىك جانە ساياسي شارالاردىڭ ويلاستىرىلعان جانە شىنايى كەشەنى ەكەندىگى ايتىلدى. قازاقستاننىڭ بارلىق ازاماتتارىنىڭ الەۋمەتتىك-ەكونوميكالىق ءال-اۋقاتى, ەلىمىزدىڭ دامۋى, ەل دامۋىنىڭ ستراتەگيالىق ماقساتتارىنا قول جەتكىزۋى وسىلاردى ىسكە اسىرۋعا بايلانىستى ەكەندىگى ايتىلىپ ءوتتى.
«مەملەكەت باسشىسى جولداۋدا كوتەرگەن ماسەلەلەردىڭ ىشىندە ەڭبەك نارىعىندا ەكوجۇيەنىڭ قالىپتاسۋىن ەرەكشە اتاپ وتكىم كەلەدى. شىن مانىندە, كوممەرتسيالىق ەمەس ۇيىمدار كوبىنەسە حالىقتىڭ الەۋمەتتىك وسال توپتارىمەن جۇمىس ىستەيدى. ەڭ الدىمەن, ءبىز جۇمىس ورىندارىن قۇرىپ, جۇمىسسىزدىقپەن كۇرەسكە ۇلەس قوسامىز, ولاردى ەكونوميكا, بيزنەس-جوسپارلاۋ, الەۋمەتتىك كاسىپكەرلىك نەگىزدەرىنە وقىتامىز. جولداۋدىڭ تاعى ءبىر ماڭىزدى بولىگى – ساياسي جاڭعىرۋ جانە ادام قۇقىقتارىن قورعاۋ. قازىرگى ۋاقىتتا قازاقستان حالىقارالىق كونۆەنتسيالارعا قول قويدى, مۇگەدەك ادامداردىڭ ءومىر ءسۇرۋ ساپاسىن جاقسارتۋ ستراتەگياسى ازىرلەندى. سونداي-اق ءبىز بيۋدجەت تەتىگىنىڭ اشىقتىعىن ودان ءارى جەتىلدىرۋمەن بايلانىستى وڭىرلىك ساياساتتى جەتىلدىرۋ بويىنشا جۇمىس ىستەيمىز. بۇل جاقىن ارادا جۇزەگە اسىرىلاتىن جوسپارلارىمىزدىڭ از عانا بولىگى», دەدى نۇر-سۇلتان قالاسىنىڭ ازاماتتىق باستامالار ورتالىعىنىڭ جەتەكشىسى ماحاببات ەسپەنوۆا.
بۇدان بولەك, دوڭگەلەك ۇستەل باسىنا ۇكىمەتتىك ەمەس ۇيىمدار مەن ازاماتتىق قوعام وكىلدەرى پرەزيدەنت جولداۋىندا ايتىلعان الەۋمەتتىك ماسەلەلەرگە جان-جاقتى توقتالىپ, ونى ورىنداۋ جولدارىن تالقىلادى.
نۇر-سۇلتان قالاسى اكىمدىگى ىشكى ساياسات باسقارماسىنىڭ باسشىسى داۋرەن بابامۇراتوۆ بۇگىندە ۇكىمەتتىك ەمەس ۇيىمدار مەملەكەتتىك ساياساتتىڭ نەگىزگى تۇستارىن حالىققا جەتكىزىپ, تۇسىندىرەتىن قوزعاۋشى كۇشكە اينالعانىن اتاپ ءوتىپ, جولداۋدا كوتەرلىگەن بىرقاتار ماسەلەگە توقتالدى.
«نەگىزگى تالقىلانىپ جاتقان ماسەلەلەر بۇل تومەنگى جالاقىنىڭ ۇلعايۋى. 42 500-دەن 60 مىڭنىڭ ۇستىنە شىقتى. ەڭ تومەنگى جالاقىنىڭ ءوسۋى ەڭبەكاقىنى, ستيپەنديالاردى, زەينەتاقىلاردى يندەكستەۋگە ىقپال ەتەدى جانە بارلىق قازاقستاندىقتاردىڭ ءال-اۋقاتىن جاقسارتۋعا ىقپال ەتەتىن بولادى. سونداي-اق, ەكولوگيالىق, مەكتەپ قۇرىلىسى ماسەلەسى. نۇر-سۇلتاندا وقۋ جىلىنىڭ باسىندا 8 مەكتەپ اشىلدى. وسى جىلدىڭ سوڭىنا دەيىن تاعى 7 مەكتەپتى پايدالانۋعا بەرۋ مىندەتىن قويدى. وسىلايشا, 2021 جىلى قالادا 15 جاڭا ءىرى مەكتەپ سالىنادى. ول مەكتەپتەردىڭ ساپاسىنىڭ ماسەلەسى. ول مەكتەپتەردەگى وقۋشىلاردىڭ تاعى دا قوسىمشا سپورتپەن قامتاماسىز ەتۋ. مۇنىڭ بارلىعى جولداۋدىڭ ىشىندە بار», دەپ اتاپ ءوتتى داۋرەن بابامۇراتوۆ.
ازاماتتىق قوعام وكىلدەرى جولداۋدا ايتىلعان باستى نازاردا ۇستارلىق باعىتتاردىڭ ءبىرى كادرلاردى دايارلاۋ ماسەلەسىن ەرەكشە اتاپ ءوتىپ, مەملەكەت باسشىسىنىڭ جولداۋى ۋاقىت تالابىنا جانە قوعامنىڭ ۇمىتىنە ساي كەلەدى دەگەن پىكىرگە كەلدى.
«پرەزيدەنت ءوزىنىڭ جولداۋىندا كادرلىق ماسەلەنى بىرنەشە رەت ايتقان بولاتىن. حالىقتىڭ ءومىرىن جاقسارتۋ ءۇشىن جۇمىستى كاسىبي, ۋاقىتىلى جانە ۇلكەن جاۋاپكەرشىلىكپەن ورىنداۋ كەرەك. ءبىز وعان قوسىلامىز جانە قولدايمىز», - دەدى «ۇلاعات» مادەنيەت جانە دامۋ قورىنىڭ ءتورايىمى كاماجان جۇماقاسوۆا
ءىس-شارا بارىسىندا ازاماتتىق قوعام وكىلدەرى الەۋمەتتىك وسال وتباسىلاردان شىققان بالالاردى, دارىندى جاستار مەن جاس عالىمداردى قولداۋ مەملەكەتتىڭ الەۋمەتتىك ساياساتىنىڭ قوسالقى, ماڭىزدى جانە جۇيەلى قۇرامداس بولىگى بولادى دەگەن پىكىر ءبىلدىردى.
