اۋىل تۇرعىندارىنىڭ ايتۋىنشا, مەكتەپ ديرەكتورى جازعى ەمتيحان كەزىندە 15 جاسار وقۋشىعا سوگىس ايتىپ, وعان تومەن بالل قويعان. وسىدان كەيىن 9 سىنىپ وقۋشىسى ءوز-وزىنە قول جۇمساعان.
ەۋرازيا ءبىرىنشى ارناسىنا تاراتقان اقپارات بويىنشا, مارقۇم وقۋشىنىڭ اكەسى ءتارتىپ ساقشىلارى بۇل ءىستى ءۇش اي بويى تەكسەرىپ جاتقانىن ايتادى, بىراق بۇل ءىس ءالى دە سوڭىنا جەتەر ەمەس.
«تەرگەۋ جۇمىستارى ۇزاققا سوزىلدى. ال ءبىلىم ءبولىمى ديرەكتورعا 8-ءشى قىركۇيەكتە جۇمىسقا ورالىپ, 25-ىنە دەيىن قىزمەتىن اياقتاۋدى ۇسىندى. ءبىز وعان قارسىمىز. ونى ءبىلىم بەرۋ جۇيەسىنەن مۇلدە شەتتەتۋ كەرەك», دەدى كوكارال اۋىلىنىڭ تۇرعىنى اقىلبەك تالىپباەۆ.
ديرەكتوردىڭ ءوزى 1-ءشى قىركۇيەك كۇنى وتكىزىلگەن سالتاناتتى شاراعا قاتىسقان جوق. اۋدان اكىمدىگىندە ونىڭ ەمتيحان كەزىندە جاسوسپىرىمنەن «شپارگالكا» تاۋىپ العانى ايتىلدى. تەرگەۋ امالدارىنىڭ جۇرگىزىلۋى مەرزىمىندە ديرەكتور قىزمەتىنەن ۋاقىتشا شەتتەتىلدى.
«قازىر مەن وسى ءىس بويىنشا قۇقىق قورعاۋ ورگاندارىنىڭ شەشىمىن كۇتۋدەمىن. مەنىڭ قولىمدا شەشىم بولمايىنشا, ديرەكتوردى قىزمەتىنەن بوساتا المايمىن. ەگەر ونىڭ كىناسى انىقتالسا, ول جەرگىلىكتى تۇرعىنداردان كەشىرىم سۇراپ, قىزمەتىنەن كەتۋگە دايىن», دەدى ورداباسى اۋداندىق ادامي الەۋەتتى دامىتۋ ءبولىمىنىڭ باسشىسى شۇعا نۇراباەۆا.
شۇعا نۇراباەۆا وسى مەكتەپتىڭ ديرەكتورى مەن مەڭگەرۋشىسىنە قاتىستى قاتاڭ سوگىس جاريالاپ, جۇمىستان شىعارۋ تۋرالى ۇسىنىس كەلىپ تۇسكەنىن ايتتى.
اۋىل تۇرعىندارىنىڭ ءبىر بولىگى ديرەكتور قىزمەتىن توقتاتقانعا دەيىن ءوز بالالارىن مەكتەپكە جىبەرمەيتىنىن مالىمدەدى. الايدا, اتا-انالار وقۋشىلاردىڭ مەرەكەسىن بۇزباۋدى شەشكەن.
