وتكەن جىلدىڭ سوڭىنان باستاپ ەل پرەزيدەنتىنىڭ 2020 جىلعى 24 قاراشاداعى «ساياسي قۋعىن-سۇرگىن قۇرباندارىن تولىق وڭالتۋ جونىندەگى مەملەكەتتىك كوميسسيا تۋرالى» جارلىعى بويىنشا سولتۇستىك قازاقستان وبلىسىندا ساياسي قۋعىن-سۇرگىن قۇرباندارىن تولىق وڭالتۋ جونىندەگى وڭىرلىك كوميسسيا جۇمىس ىستەيدى.
ۇسىنىلعان كىتاپتار كوميسسيا جۇمىسى اياسىندا ورىندالعان العاشقى ەڭبەكتەردىڭ ءبىرى بولىپ سانالادى.
«جاس ازامات» گازەتى ءوزىن جاستار باسىلىمى دەپ جاريالاپ, ونىڭ بەتتەرىندە الاش پارتياسىنىڭ مۇددەسى اشىق ناسيحاتتالدى. «جاس ازامات» كىتابىندا گازەتتىڭ 22 ءنومىرىنىڭ ماتەريالدارى ۇسىنىلعان. زەرتتەۋشىلەر ءوز ۋاقىتىندا اراب گرافيكاسىندا جازىلعان ماقالالاردى اۋدارۋ ءۇشىن ۇلكەن جۇمىس اتقاردى.
سونىمەن قاتار, «جاس ازامات» كىتابىندا ماعجان جۇماباەۆ, جۇماعالي تىلەۋلين, سماعۇل سادۋاقاسوۆ, قوشكە كەمەڭگەروۆ, ءبىلال مالدىباي, ءابدىراحمان ايسارين جانە ت.ب. تۇلعالاردىڭ ءرولى كورسەتىلگەن.
ال ەكىنشى كىتاپ, «الاش» قوزعالىسىنىڭ كورنەكتى قايراتكەرلەرىنىڭ ءبىرى - جۇماعالي تىلەۋليننىڭ قىزمەتتىك جولىنا ارنالعان.
جۇماعالي تىلەۋليننىڭ سولتۇستىك قازاقستان مادەنيەتى مەن ءبىلىمىنىڭ قالىپتاسۋى مەن دامۋىنا قوسقان ۇلەسى زور. ول وڭىردەگى مەديتسينالىق ءبىلىمى بار العاشقى مامان, گۋبەرنيالىق دەنساۋلىق ساقتاۋ جانە حالىققا ءبىلىم بەرۋدى ۇيىمداستىرۋشى, پەتروپاۆل پەداگوگيكالىق تەحنيكۋمىنىڭ ءبىرىنشى ديرەكتورى, قازاقستاننىڭ تاريحى مەن ەتنوگرافياسىن زەردەلەۋ جونىندەگى قوعامنىڭ وبلىستىق فيليالىنىڭ ءبىرىنشى توراعاسى, ولكەتانۋ مۋزەيىن ۇيىمداستىرۋشىلاردىڭ ءبىرى بولدى.
تانىستىرىلعان كىتاپتار - ساياسي قۋعىن-سۇرگىن قۇرباندارىن تولىق وڭالتۋ جونىندەگى وڭىرلىك كوميسسيانىڭ ۇلكەن زەرتتەۋ جۇمىسىنىڭ ناتيجەسى بولىپ وتىر.
