Astana Open ATP 250 جارىسى بيىلعى كاسىپقوي تەننيسشىلەر قاۋىمداستىعىنىڭ (ATP) جاڭارتىلعان رەسمي كۇنتىزبەسىنە ەنگىزىلگەن. قازاقستان تەننيس فەدەراتسياسىنىڭ ۆيتسە-پرەزيدەنتى يۋري پولسكيدىڭ ايتۋىنشا, ATP-دىڭ ديرەكتورلار كەڭەسى مەن بىلتىر ەلوردادا وتكەن جارىسقا قاتىسقان ويىنشىلار Astana Open دوداسىنىڭ دەڭگەيىن جوعارى باعالاعان.
– پاندەميانىڭ قايتادان كەڭ تارالۋىنا بايلانىستى بيىل كۇزدە قىتايدا كوپتەگەن حالىقارالىق جارىس وتپەيتىن بولدى. ءسويتىپ, ATP باسشىلىعى بىزگە سول تۋرنيرلەردىڭ ءبىرىن ۇيىمداستىرۋعا ءوتىنىش بىلدىرگەن بولاتىن. ءبىز ءوز تاراپىمىزدان ولاردىڭ ۇسىنىسىن قابىل الىپ, جارىستى وتكىزۋگە كەلىسىم بەردىك. بۇل – ءبىز ءۇشىن جاقسى مۇمكىندىك, مۇنداي جارىستار ەڭ الدىمەن تالانتتى جاستارعا جول اشادى, – دەدى يۋ.پولسكي.
سونىمەن قاتار Astana Open جارىسىنان ءبىر اپتا بۇرىن نۇر-سۇلتان قالاسىندا ەرلەر مەن ايەلدەر اراسىندا قازاقستان چەمپيوناتى وتەدى. مۇندا جەڭىمپاز اتانعان ويىنشى Astana Open-ءنىڭ نەگىزگى تۋرنيرىنە, جۇلدەگەرلەرى ىرىكتەۋ سايىستارىنا جولداما الادى. استانا اشىق بىرىنشىلىگىنە ەلىمىزدىڭ تاجىريبەلى تەننيسشىلەرى – الەكساندر بۋبليك, ميحايل كۋكۋشكين, اندرەي گولۋبەۆ پەن الەكساندر نەدوۆەسوۆ, سونداي-اق دميتري پوپكو, تيموفەي سكاتوۆ, دەنيس ەۆسەەۆ جانە بەيبىت جۇقاەۆ سەكىلدى جاس سپورتشىلارىمىز دا ەل چەمپيوناتى ارقىلى ءوز باعىن سىناپ كورەدى.
جارىستى ۇيىمداستىرۋشىلار بيىلعى باسەكەگە بالالاردى شەكتەۋلى كولەمدە كىرگىزۋدى جوسپارلاپ وتىر. ولار بارلىق سانيتارلىق تالاپتارعا سايكەس اۋەلى پتر تەست تاپسىرادى. ءسويتىپ, ول بالالار سۇيىكتى تەننيسشىلەرىنىڭ ويىندارىن ءوز كوزىمەن كورە الادى. ەرەسەك جانكۇيەرلەر كورتقا جىبەرىلمەيدى. قازاقستان تەننيس فەدەراتسياسى بارلىق ماتچتاردى قتف سايتى مەن قازاقستان تەلەارنالارىنىڭ بىرىندە تىكەلەي ەفيردە كورسەتۋدى جوسپارلاپ وتىر.
بىلتىر قاراشا ايىندا وتكەن ءبىرىنشى ATP 250 Astana Open جارىسىندا اۋستراليالىق دجون ميللمان توپ جارعان بولاتىن. بۇل – ونىڭ مانسابىنداعى ATP تۋرىنداعى تۇڭعىش جۇلدەسى. د.ميللمان فينالدا فرانتسيالىق سپورتشى ادريان ماننارينودان 7:5, 6:1 ەسەبىمەن باسىم تۇسكەن ەدى. وسى جەڭىستىڭ ارقاسىندا ميللمان 2020 جىلى اتر ءتۋرنيرىنىڭ جۇلدەلەرىن ۇتىپ العان ەليتالىق چەمپيوندار تىزىمىنە ەندى. بۇل تىزىمدە سونداي-اق يرجي ۆەسەلىي (پۋنا), رەيلي وپەلكا (دەلرەي بيچ), نوۆاك دجوكوۆيچ (دۋباي) جانە ۋگو ۋمبەر (انتۆەرپەن) بار.
ايتا كەتەيىك, اتر 250 الەمدىك تۋرىنا جىلىنا 40 كاسىبي ەرلەر جارىسى كىرەدى. نۇر-سۇلتانداعى تۋرنير جەڭىمپازى اتر رەيتينگىندە 250 ۇپاي ەنشىلەۋگە مۇمكىندىك الادى.
