ساياسات • 24 تامىز، 2021

قاتارمەن ينۆەستيتسيالىق ىنتىماقتاستىقتى كەڭەيتەدى

قازاقستان پرەمەر-ءمينيسترىنىڭ ءبىرىنشى ورىنباسارى ءا.سمايىلوۆ باستاعان قازاقستاندىق دەلەگاتسيا قاتار مەملەكەتىنە جۇمىس ساپارىمەن باردى، دەپ حابارلادى ۇكىمەتتىڭ ءباسپاسوز قىزمەتى.

Egemen Qazaqstan

ساپار بارىسىندا پرەمەر-ءمينيستردىڭ ورىنباسارى – سىرتقى ىستەر ءمينيسترى شەيح مۇحاممەد بەن ابدۋراحمان ءال-تانيمەن، مۋنيتسيپاليتەت جانە قورشاعان ورتانى قورعاۋ ءمينيسترى ابدۋللا بەن ابدۋلازيز بەن تۇركي ءال-سۋبايەمەن، قاتار ساۋدا-ونەركاسىپ پالاتاسىنىڭ ءبىرىنشى ورىنباسارى مۇحاممەد بين تاۋار ءال-كوۆاريمەن، Qatar Airways باسشىسى اكبار ءال-بەيكەرمەن جانە Qatar Investment Authority مەن Hassad Food ۇلتتىق كومپانيالارىنىڭ باسشىلارىمەن كەزدەسۋلەر ءوتتى.

قازاقستان-قاتار ىسكەرلىك كەڭەسى ەكى ەلدىڭ ىسكەر توپتارىنىڭ قاتىسۋىمەن ءوتتى، وندا قازاقستان مەن قاتار اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ باسىم باعىتتارى تالقىلاندى. پرەمەر-ءمينيستردىڭ ءبىرىنشى ورىنباسارى ءا.سمايىلوۆ ساۋدا-ەكونوميكا جانە ينۆەستيتسيا سالالارىنداعى ەكىجاقتى ىنتىماقتاستىقتى دامىتۋدىڭ ۇلكەن الەۋەتى بار ەكەنىن اتاپ ءوتىپ، ەكى ەل اراسىنداعى مەملەكەتارالىق قاتىناستاردى تەرەڭدەتۋ مەن كەڭەيتۋگە جەكە سەكتوردى بەلسەندى تارتۋدىڭ ماڭىزدىلىعىن اتاپ ءوتتى.

شارا بارىسىندا قازاقستاننىڭ بىرقاتار ۇلتتىق كومپانياسى مەن ءىرى كاسىپورىندارىنىڭ باسشىلارى قاتارلىق بيزنەس وكىلدەرىنە ەلىمىزدە شەتەلدىك ينۆەستورلار ءۇشىن جاسالعان ەكونوميكالىق مۇمكىندىكتەر جونىندە باياندادى. قازاقستاندىق دەلەگاتسيا قۇرامىندا «سامۇرىق-قازىنا» ۇاق» اق، Kazakh invest ۇك اق، Kazakh Tourism ۇك اق، «بايتەرەك» ۇبح» اق باسشىلارى، قازاقستان رەسپۋبليكاسىنىڭ سىرتقى ىستەر، اۋىل شارۋاشىلىعى، ۇلتتىق ەكونوميكا، مادەنيەت جانە سپورت ۆيتسە-مينيسترلەرى، مۇنىمەن قوسا BI Group، Agro Holding Dinara Group، Target AI، Evotech CA سەكىلدى ءىرى كومپانيالاردىڭ باسشىلارى بولدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز