كەزدەسۋگە قر اقدم اپپاراتىنىڭ باسشىسى ايجان شاينازاروۆا, «Adaldyq alany» جوبالىق كەڭسەسىنىڭ باسشىسى تيمۋر جۇمىرباەۆ, جاستار جانە وتباسى ىستەرى كوميتەتىنىڭ توراعاسى شاحماردان بايمانوۆ, «ازاماتتىق باستامالاردى قولداۋ ورتالىعى» كەاق باسقارما ءتورايىمى ليما دياس جانە «دامۋ» قازاقستاندىق قاۋىمداستىعى» زتب وكىلدەرى قاتىستى.
ۆەدومستۆو ءباسپاسوز قىزمەتىنىڭ جازۋىنشا, بۇل ىنتىماقتاستىق سىبايلاس جەمقورلىققا مۇلدەم توزبەۋ مادەنيەتىن بىرلەسە وتىرىپ دامىتۋدى كوزدەيدى. ونىڭ اياسىندا جاستار مەن ستۋدەنتتەر ۇيىمدارىنا ءبىلىم بەرۋ ترەنينگتەرى وتكىزىلەدى, سىبايلاس جەمقورلىققا قارسى ءىس-قيمىل تاقىرىبىندا الەۋمەتتىك بەينەروليكتەر جاسالادى, سونداي-اق شىعارماشىل جاستاردى قولداۋ ماقساتىندا ەسسە مەن سۋرەت كونكۋرسى جاريالانادى. اتالعان باستامالار جاستار اراسىندا سىبايلاس جەمقورلىققا قارسى مادەنيەت قالىپتاستىرۋعا باعىتتالعان.
«بۇگىندە ءدال وسى جاستار قوعامداعى ۇردىستەردى ءجيى قالىپتاستىرادى. ءبىز ءۇشىن قازىرگى جاستاردىڭ سىبايلاس جەمقورلىققا «مۇلدەم توزبەۋشىلىك» قاعيداتىن ۇستانۋى ماڭىزدى. بۇل ستۋدەنتتەر ءۇشىن دە, جۇمىسشى جاستار ءۇشىن دە وزەكتى», دەپ اتاپ ءوتتى «Adaldyq alany» جوبالىق كەڭسەسىنىڭ جەتەكشىسى ت.جۇمىرباەۆ.
قۇجاتقا «ازاماتتىق باستامالاردى قولداۋ ورتالىعى» كەاق قولداۋىمەن ىسكە اسىرىلاتىن «جاستاردىڭ سىبايلاس جەمقورلىققا قارسى مادەنيەتىن قالىپتاستىرۋ بويىنشا ءىس-شارالار كەشەنىن وتكىزۋ» جوباسى شەڭبەرىندە قول قويىلدى.
