«ينستيتۋت عالىمدارى قولدانىستاعى QazVac ۆاكتسيناسىمەن قاتار ەكىنشى سۋببىرلىكتى Qaz Covac P ۆاكتسيناسىن جاساپ شىعاردى. ەكىنشى وتاندىق ۆاكتسينا العاشقى كلينيكالىق سىنامادان ءساتتى ءوتتى. بۇگىنگى كۇنى ەكىنشى كلينيكالىق سىناما جۇرگىزىلۋدە», دەدى ول تامىز كونفەرەنتسياسى بارىسىندا.
ونىڭ ايتۋىنشا, قازاقستاندىق عالىمدار كوروناۆيرۋسقا قارسى وزگە دە ۆاكتسينالاردى جاساپ جاتىر, ولار سىناق ۇستىندە.
ەستەرىڭىزگە سالا كەتەيىك, دۇنيەجۇزىلىك دەنساۋلىق ساقتاۋ ۇيىمى كوروناۆيرۋسقا قارسى قازاقستاندىق ەكىنشى ۆاكتسينانى ۇمىتكەر رەتىندە 2020 جىلدىڭ تامىزىندا تىركەدى.
ينستيتۋت باسشىسىنىڭ ايتۋىنشا, العاشقى وتاندىق QazVac ۆاكتسيناسى جاقسى ناتيجەلەر كورسەتۋدە.
«ۆاكتسينا قازاقستاندىقتاردىڭ دەنساۋلىعىن قورعاۋ ماقساتىندا قولدانىلىپ جاتىر. مەملەكەت باسشىسىنىڭ تاپسىرماسىمەن ۆاكتسينا قىرعىزستانعا گۋمانيتارلىق كومەك رەتىندە جىبەرىلدى. ول جاقتا ۆاكتسينا تىركەۋدەن ءوتىپ, مەديتسينالىق ماقساتتا قولدانۋعا رۇقسات الدى. QazVac ۆاكتسيناسىنا وزگە ەلدەر دە قىزىعۋشىلىق تانىتىپ وتىر. QazVac ۆاكتسيناسىنىڭ ەكى كەزەڭى ناتيجەلەرىنىڭ Lancet بەدەلدى حالىقارالىق جۋرنالدار توبىندا جاريالانۋىن ءبىزدىڭ عالىمداردىڭ ۇلكەن جەتىستىگى دەپ باعالاۋعا بولادى», دەدى كۇنسۇلۋ زاكاريا.
