اقش ىندەتتەن ءبىر كۇندە مىڭنان استام ادامنىڭ قايتىس بولعانىن مالىمدەدى, بۇل شامامەن ءبىر ساعاتتا 42 ادامنىڭ ءومىرى ءۇزىلدى دەگەن ءسوز. مامانداردىڭ ايتۋىنشا, ۆيرۋستىڭ دەلتا شتامى ەلدىڭ از ۆاكتسينالانعان ايماقتارىندا كەڭىنەن تارالىپ جاتىر. احۋال سوڭعى ايدا قاتتى ۋشىققان. مۇنداي, ءبىر كۇندە مىڭ ادام قايتىس بولعان جاعداي سوڭعى رەت ناۋرىز ايىندا تىركەلگەن.
باستاپقىدا ۇكىمەتتەر مەن بيزنەس وكىلدەرى ۆاكتسينا سالدىرۋدى ىنتالاندىرۋ ءۇشىن اقشالاي سىياقىلار مەن وزگە دە سىيلىقتار ۇسىنعانىمەن, جاعداي كۇردەلەنگەنىن كورگەن كەيبىر كومپانيالار مەن شتاتتار جۇمىس ورنىن ساقتاپ قالعىسى كەلەتىن جۇمىسشىلارعا ۆاكتسينا سالدىرۋدى مىندەتتەي باستادى.
ادەتتە قاتال شارالار ەنگىزەتىن اۋستراليا انىقتالعان ءبىر ناۋقاس ءۇشىن ەل استاناسى مەن وعان ىرگەلەس ايماقتى ءبىر اپتاعا جاباتىن بولدى. كاسىپورىندار مەن وزگە مەكەمەلەردىڭ جۇمىسى شەكتەلەدى, ال تۇرعىندار كۇنىنە ءبىر ساعاتتان ارتىق سىرتتا سپورتپەن شۇعىلدانا المايدى. جۇمىستى مۇمكىندىگىنشە ۇيدەن اتقارۋ مىندەتتەلىپ وتىر.
ال جاڭا زەلانديا ۇكىمەتى ەل شەكاراسى جىل سوڭىنا دەيىن حالىقارالىق ساياحاتشىلار ءۇشىن جابىلاتىنىن مالىمدەدى. پرەمەر-مينيستر دجاكيندا اردەرن جۋرناليستەرگە ەلدىڭ ءالى تولىق اشىلا المايتىنىن جانە ۆاكتسينالاۋ اياقتالعانعا دەيىن شەكارا جابىق بولاتىنىن ايتتى. جاڭا زەلانديادا ەكپە الۋ وزگە دامىعان ەلدەرگە قاراعاندا باياۋ جۇرگەن. تۇرعىنداردىڭ شامامەن 29 پايىزى ۆاكتسينانىڭ ءبىر دوزاسىن, ال 17 پايىزى تولىعىمەن العان. پاندەميا باستالعاننان بەرى 4,9 ميلليون حالقى بار ەلدە 2557 ينفەكتسيا جۇقتىرۋ جانە 26 ءولىم تىركەلگەن.
جاعدايدىڭ ۋشىققانىن كورشىلەس رەسەي دە مالىمدەدى. ەلدە پاندەميا باستالعالى كۇندەلىكتى ءولىم سانىنىڭ ەڭ جوعارى كورسەتكىشى تىركەلگەن, ياعني ءبىر كۇندە 808 ادام قايتىس بولعان. Johns Hopkins ۋنيۆەرسيتەتىنىڭ مالىمەتى بويىنشا, قازىرگى ۋاقىتتا رەسەيدە COVID-19 ىندەتىنە قاتىستى ءولىمنىڭ رەسمي سانى – 168 049 ادام. بۇل – الەمدەگى بەسىنشى كورسەتكىش. 24 ماۋسىمنان باستاپ ەلدە ءبىر كۇندە
20 مىڭنان استام جاڭا جاعداي تىركەلگەن.
ال وليمپيا ويىندارى اياقتالعان جاپونيادا دەمالىس ماۋسىمى ءالى بىتكەن جوق. ۆيرۋس جۇقتىرعاندار سانى ارتقانىنا قاراماستان, حالىق ۇكىمەتتىڭ ساپارلارعا شىقپاي, بارلار مەن مەيرامحانالارعا بارماۋعا شاقىرۋىن تىڭدار ەمەس. جاپونيادا كۇندەلىكتى ناۋقاستار سانى ءبىر اپتادان استام ۋاقىت ىشىندە 10 مىڭنان استى, ال سوڭعى ءتورت ايدا ولاردىڭ جالپى سانى ەكى ەسە ارتىپ, 1 ميلليوننان اسقان. جەكسەنبىدە اياقتالعان ويىندار كەزىندە توكيوداعى كۇندەلىكتى انىقتالعان ناۋقاستار سانى ءۇش ەسە وسكەن. پرەمەر-مينيستر ەسيحيدە سۋگا باياۋ باستالعان, بىراق قازىر جاقسى ءجۇرىپ جاتقان ۆاكتسينالاۋعا ءۇمىت ارتىپ وتىر.
وسىلايشا, الەمنىڭ تۇكپىر-تۇكپىرىندەگى مەملەكەتتەر ىندەتتىڭ جاڭا قاۋپىمەن بەتپە-بەت كەلىپ وتىر. كوپ ەلدە ۆاكتسينالاۋ پروتسەسى باياۋ ءجۇرىپ, ۆيرۋستان قايتىس بولعاندار سانى كوبەيىپ بارادى.
