ۆەدومستۆونىڭ مالىمەتىنشە, ەلىمىزگە 42 جولاۋشى كەلگەن, ونىڭ ىشىندە 15 ەرەسەك ادام جانە 10 بالا, سونداي-اق قازاقستان ەلشىلىگىنىڭ قىزمەتكەرلەرى بار. ودان باسقا, وسى بورتپەن قىرعىزستاننىڭ ءوتىنىشى بويىنشا قىرعىز رەسپۋبليكاسىنىڭ 14 ازاماتى ەۆاكۋاتسيالاندى. گۋمانيتارلىق وپەراتسيا رەتىندە وسى ۇشاقپەن قازاقستان ەلشىلىگىنە كومەك سۇراپ جۇگىنگەن 1 رەسەي ازاماتى مەن 1 ليتۆا ازاماتى اۋعانستان يسلام رەسپۋبليكاسىنان شىعارىلدى. «قازاقستان رەسپۋبليكاسى ءاردايىم شەتەلدەگى ءوز ازاماتتارىنىڭ مۇددەلەرى مەن قۇقىقتارىن قورعايدى», دەلىنگەن حابارلامادا.
سونداي-اق قازاقستان پرەزيدەنتى سىرتقى ىستەر مينيسترلىگىنە اۋعانستانداعى قازاقتاردىڭ قاۋىپسىزدىگىن قامتاماسىز ەتۋدى جانە قاجەت بولعان جاعدايدا تاريحي وتانىنا قايتارۋ ماسەلەسى بويىنشا بارىنشا كومەك كورسەتۋدى تاپسىردى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ مالىمدەدى.
«اۋعانستانداعى ەتنوستىق قازاقتاردىڭ وتىنىشىنە بايلانىستى مەملەكەت باسشىسى قاسىم-جومارت توقاەۆ سىرتقى ىستەر مينيسترلىگىنە ولاردىڭ قاۋىپسىزدىگىن قامتاماسىز ەتۋدى جانە قاجەت بولعان جاعدايدا تاريحي وتانىنا قايتارۋ ماسەلەسى بويىنشا بارىنشا كومەك كورسەتۋدى تاپسىردى», دەدى ا.سمادياروۆ ارنايى بريفينگتە.
قازىرگى كەزدە اۋعانستانداعى ەلشىلىككە ءتيىستى تاپسىرما بەرىلدى. وسى ورايدا سىرتقى ىستەر مينيسترلىگىنىڭ رەسمي وكىلى اۋعان جەرىندە مىڭداعان قازاق بار دەگەن اقپاراتتى جوققا شىعاردى.
«بىزدە بار مالىمەتتەرگە سايكەس, اۋعانستان اۋماعىندا 15-كە جۋىق ەتنوستىق قازاق وتباسى تۇرادى – شامامەن 200 ادام. ال كەيبىر قازاقستاندىق بۇقارالىق اقپارات قۇرالدارى اۋعان جەرىندە بىرنەشە مىڭ قازاقتىڭ تۇراتىنى تۋرالى تەكسەرىلمەگەن اقپارات تاراتتى. بۇل شىندىققا سايكەس كەلمەيدى. وسىعان بايلانىستى اقپاراتتى مۇقيات تەكسەرىپ وتىرۋدى جانە حالىقتى دۇرلىكتىرمەۋدى سۇرايمىز», دەدى ا.سمادياروۆ.
ونىڭ ايتۋىنشا, سوڭعى كەزدە ەلشىلىككە وزدەرىن «قازاقپىز» دەپ تانىستىراتىن ءتۇرلى توپتار ءجيى كەلە باستاعان. بىراق ءىس جۇزىندە ەشقانداي دالەلى جوق.
«ولاردىڭ كەيبىرەۋى قازاقشا بىلمەيدى. اتا-بابالارىنىڭ اۋعانستان اۋماعىنا قونىس اۋدارۋ تاريحى مەن رۋ-تايپالىق بايلانىستارى تۋرالى دا ايتا المايدى. ءبىز ەتنوستىق قازاقتاردىڭ تاريحي وتانىنا ورالۋىنا كومەك كورسەتۋ تۋرالى وتىنىشتەرگە مۇقيات تەكسەرىس جۇرگىزەمىز», دەيدى مينيسترلىكتىڭ رەسمي وكىلى.
