ەرنات ءجۇنىسوۆتىڭ ايتۋىنشا, كوللەدجگە تۇسۋشىلەر ءۇشىن قابىلداۋ ەمتيحاندارى الىنىپ تاستالدى. تەك پەداگوگيكا, مەديتسينا جانە ونەر ماماندىقتارىنا عانا قابىلداۋ ەمتيحاندارى وتكىزىلەدى. ويتكەنى, مەديتسينا ماماندىعى بويىنشا تالاپكەرلەر پسيحومەتريالىق تەست تاپسىرۋى كەرەك. ال پەداگوگيكالىق ماماندىق بويىنشا اڭگىمەلەسۋ تۇرىندەگى تەست وتكىزىلەدى.
«بۇرىن تالاپكەرلەرىمىز ءبىر عانا ماماندىققا تاپسىراتىن بولسا, ەندى 4 ماماندىق تاڭداۋعا مۇمكىندىك الىپ وتىر. بۇل تالاپكەرلەرىمىز ءۇشىن جاسالعان ۇلكەن مۇمكىندىك دەپ ويلايمىن. ەمتيحان الىنىپ تاستالعاندىقتان ءاربىر ماماندىق بويىنشا بەيىندى جانە مىندەتتى پاندەردى انىقتادىق. مىسالى كونكۋرس اقپاراتتىق جۇيە ماماندىعىنا قاتىستى بولسا, وندا تالاپكەر ءۇشىن ەكى ءپان مىندەتتى بولادى. ءبىرى – الگەبرا, ەكىنشىسى – ينفورماتيكا. وسى ەكى ءپاننىڭ باعاسى مەن قازاق توبىنا تاسىراتىن بولسا قازاق ءتىلىنىڭ بالى ەسەپتەلىنەدى. وسى ءۇش ءپاننىڭ ورتاق بالى شىعارىلادى جانە ول كونكۋرس بالى سانالادى», دەدى ەرنات ءجۇنىسوۆ.
ديرەكتور ورىنباسارىنىڭ ايتۋىنشا, وسى ۋاقىتقا دەيىن كوللەدجگە تۇسۋشىلەر ءۇشىن 6 كۆوتا قاراستىرىلعان. ەندى وعان تاعى 3 كۆوتا قوسىلىپ وتىر. اتاپ ايتقاندا, كوپبالالى وتباسىدان شىققان بالالارعا 5 پايىز, تولىق ەمەس وتباسىدان شىققان بالالارعا 1 پايىز جانە مۇگەدەك بالا تاربيەلەپ وتىرعان وتباسىلار ءۇشىن 1 پايىز كۆوتا بەرىلەدى.
«قازىرگى ۋاقىتتا 129 مىڭعا تارتا تالاپكەر كوللەدجدەرگە قۇجاتتارىن تاپسىردى. 29 شىلدە مەن 3 تامىز ارالىعىندا ونەر ماماندىقتارى بويىنشا كونكۋرس ءوتىپ, ناتيجەسى شىعارىلدى. 3 700-دەن استام تالاپكەر قۇجات تاپسىرىپ, 2 800 وقۋعا ءتۇستى. سەبەبى, مەملەكەتتىك تاپسىرىس تەك 2 800 ادامعا بولىنگەن. كەلەسى كونكۋرس مەديتسينا مەن پەداگوگيكا ماماندىقتارى بويىنشا تامىزدىڭ 18-21 ارالىعىندا وتكىزىلەدى. ناتيجەسىن 22-23 تامىز كۇندەرى جاريالايمىز. كوللەدجگە تۇسكەندەرگە كوپتەگەن الەۋمەتتىك جەڭىلدىك قاراستىرىلعان. جۇمىسشى ماماندىعىنا تۇسكەن تالاپكەرلەر ءبىر مەزگىل ىستىق تاماقپەن قامتاماسىز ەتىلىپ, 21 787 تەڭگە كولەمىندە شاكىرتاقى الادى. ال جاتاقحانادا ورىن ەڭ الدىمەن از قامتىلعان وتباسىدان شىققان جانە 1-كۋرسقا تۇسكەن بالالارعا ءبىرىنشى كەزەكتە بەرىلەدى. بۇگىندە 438 جاتاقحانادا 60 مىڭنان استام ورىن بار», دەدى ەرنات ءجۇنىسوۆ.
