بۇل سىنعا قازاقستاننىڭ اتىنان 25 پاراليمپياداشى قاتىسىپ, سپورتتىڭ 7 تۇرىنەن ەل نامىسىن قورعاۋعا اتتانادى.
«پاراليمپيادا ويىندارى قارساڭىندا «قازاقستاننىڭ پاراليمپيادا سپورتىن قولدايمىز» چەللەندجى باستالدى. ريو-2016 پاراليمپيادا ويىندارىنان كەيىن ەلىمىزدە پاراسپورتپەن اينالىسقىسى كەلەتىندەردىڭ سانى ارتتى, وڭىرلەردە مۇگەدەك ادامدارعا ارنالعان جاڭا سپورت مەكتەپتەرى اشىلدى جانە ەلوردادا ۋلترازاماناۋي پاراليمپيادالىق جاتتىعۋ ورتالىعى سالىندى. وندا مۇمكىندىگى شەكتەۋلى ادامدار وزىنە قولايلى سپورت تۇرىمەن تەگىن اينالىسا الادى», دەپ جازىلعان ۇلتتىق پاراليمپيادا كوميتەتى ماركەتينگ جانە كوممۋنيكاتسيا دەپارتامەنتىنىڭ حابارلاماسىندا.
كوميتەت جاريالاعان چەللەدجگە قاتىسۋ ءۇشىن پاراليمپياداشىلارعا قولداۋ بىلدەرگەن مازمۇنداعى بەينەۇندەۋ ءتۇسىرىپ, الەۋمەتتىك جەلىگە نپك @kazparalympics رەسمي اككاۋنتىن بەلگىلەۋ ارقىلى مىنا حەشتەگتەرمەن سالۋ قاجەت: #teamkz, #kazparalympics جانە #parateamkz.
چەللەندجگە ءبىرىنشى بولىپ نۇرلان قويانباەۆ, ارۋجان ساين, ماقپال يسابەكوۆا, ءمولدىر اۋەلبەكوۆا, بەيبىت قورعان, ەرلان كوكەەۆ, باقىت سىزدىقوۆا سياقتى تانىمال ادامدار ءۇن قوسقان.
ەسكە سالساق, 29 شىلدە كۇنى قر پرەزيدەنتى قاسىم-جومارت توقاەۆ قازاقستان ۇلتتىق پاراليمپيادا قۇراما كومانداسىنىڭ مۇشەلەرىمەن كەزدەسكەن بولاتىن. مەملەكەت باسشىسى سپورتشىلاردىڭ تاۋەلسىز قازاقستان تاريحىندا العاش رەت پاراليمپيادا ويىندارىنا 25 جولداما ۇتىپ, بايراقتى باسەكەگە ۇلكەن قۇراممەن اتتانىپ بارا جاتقانىن اتاپ ءوتتى.
«الەمدەگى ءجۇز مىڭداعان سپورتشىنىڭ اراسىنان ۇزدىك شىعىپ, وسى ويىندارعا جولداما الۋ ەكىنىڭ ءبىرىنىڭ قولىنان كەلە بەرمەيدى. سىزدەر بۇعان تاباندىلىق پەن كاسىبي دايىندىقتىڭ ارقاسىندا قول جەتكىزۋگە بولاتىنىن دالەلدەدىڭىزدەر. دەمەك, ءاربىر پارا سپورتشىمىزدى قازىردىڭ وزىندە جەڭىمپاز دەۋگە بولادى. وزدەرىڭىزدى بارشا وتانداسىمىز ماقتان تۇتادى», دەگەن ەدى مەملەكەت باسشىسى.
