سپورت • 12 تامىز، 2021

شاتسكي «شاحتەردى» پلەي-وففقا شىعاردى

22 رەت كورسەتىلدى

كونفەرەنتسيا ليگاسىنىڭ ءۇشىنشى اينالىمىنا جولداما الىپ، كىشىگىرىم سەنساتسيا جاساعان قاراعاندىنىڭ «شاحتەرى»، انە-مىنە دەگەنشە اتالعان ءتۋرنيردىڭ پلەي-وفف ساتىسىنا دا شىقتى. ەرەۆاندا وتكەن ەكىنشى ىرىكتەۋ كەزەڭىنىڭ قارىمتا كەزدەسۋىندە «كەنشىلەر» كومانداسى رۋمىنيانىڭ اتاقتى «ستياۋا» كلۋبىن پەنالتي سەرياسىندا جارىستان شىعارىپ جىبەرسە، كۇنى كەشە ءدال سونداي جاعدايمەن ۋكراينانىڭ «كولوسىن» ۇتتى.

قازاقستاندىق كوماندالار ارا­سىندا ەڭ ءبىرىنشى بولىپ ەۋرو­كۋبوك ويىندارىنىڭ توپتىق كەزەڭىنە شىققان «شاحتەر» اراعا جەتى جىل سالىپ سول جەتىستىگىن قايتالاۋعا جاقىن تۇر. 2012 جىلى ەل چەمپيونى اتانىپ، ءبىر جىلدان كەيىن قازاقستان كۋبوگى مەن سۋپەركۋبوگىن جەڭىپ العان قاراعاندىلىقتار 2013/14 جىلعى ەۋرودودا باسەكەسىندە جاق­سى ناتيجەگە قول جەتكىزگەنىن جانكۇيەرلەر جاقسى بىلەدى. كەيىن­نەن قۇلديلاۋ كەزەڭىن باس­تان وتكەرگەن «كەنشىلەر» بىلتىردان باستاپ ءوز قولداۋشىلارىن ءتاۋىر ويىنىمەن قۋانتىپ كە­لەدى. دەگەنمەن كومانداعا ءالى دە تۇراقتىلىق جەتىسپەيدى. ەل بىرىنشىلىگىندە الا-قۇلا ويىن كورسەتىپ جۇرگەن قاراعاندىلىقتار قازىرگى تاڭدا تۋرنير كەستەسىندە 19 ۇپايمەن 11-ورىندا تۇر. دەسە دە «شاحتەردىڭ» كونفەرەنتسيا ليگاسىنىڭ پلەي-وفف كەزەڭىنە دەيىن جەتۋى – كلۋب ءۇشىن تاماشا ناتيجە. ارينە، قاراعاندىلىق كلۋب بۇل ناتيجەمەن شەكتەلىپ قال­ماي، توپتىق كەزەڭگە دە شى­عادى دەگەن ۇمىتتەمىز.

«شاحتەردىڭ» ءۇشىنشى كە­زەڭ­دەگى قارسىلاسى رۋمىنيانىڭ «ستياۋاسى» سياقتى تاجىريبەلى كو­ماندا بولماسا دا، ءوز ەلىندە ءتاۋىر ۇجىم سانالادى. كيەۆ وبلىسىنداعى شاعىن عانا كوۆاليوۆكا اۋىلىنىڭ كومانداسى 2012 جىلى قۇرىلىپ، 2019/2020 جىلعى ماۋسىمنان باستاپ ۋكراي­نانىڭ پرەمەر-ليگاسىندا ونەر كورسەتىپ كەلەدى. وتكەن ماۋسىمدا ۋكراينا بىرىنشىلىگىندە 4-ورىنعا تۇراقتاپ، بىردەن كونفەرەنتسيا ليگاسىنىڭ ءۇشىنشى كەزەڭىنە جولداما العان ەدى.

ەكى كوماندا اراسىنداعى ءبى­رىنشى كەزدەسۋ ۋكرايناداعى 5 مىڭ جانكۇيەرگە شاقتالعان «كولوس» ستاديونىندا ءوتىپ، 0:0 ەسەبىمەن تەڭ اياقتالعانى بەلگىلى. «استانا ارەناداعى» قارىمتا كەزدەسۋدە دە كوماندالاردىڭ كۇشتەرى تەڭ بولدى. ايتپاقشى، «شاحتەر» دە «توبىل» سياقتى ءوز الاڭىنداعى ەۋروكۋبوك ماتچتارىن ەلوردادا وت­­كىزۋگە ءماجبۇر. ويتكەنى قارا­­عان­­دىنىڭ ورتالىق ستاديونى ۋەفا سەر­تيفيكاتتاۋىنان وتكەن جوق.

90 مينۋت بويى كوماندالار ءبىر-ءبىرىنىڭ قاقپاسىنان ساڭىلاۋ تابا الماعان سوڭ، ويىن ەكسترا-تايمعا ۇلاستى. 15 مينۋتتان ەكى تايم ويناعان فۋتبولشىلار بۇل ۋا­قىتتا دا گول سوعا المادى. نەگىزى 120 مينۋتتا ەكى ۇجىمدا دا گول سوعاتىن بىرنەشە مۇمكىندىك بول­عان ەدى. الايدا شابۋىلشىلار وڭ­تايلى ساتتە ءمۇلت كەتىپ جاتتى. ءسويتىپ نەگىزگى جانە قوسىمشا ۋا­قىتتاردا جەڭىمپاز كوماندا انىقتالماعان سوڭ، فۋتبولشىلار پەنالتي تەبۋگە كىرىستى.

«ستياۋامەن» وتكەن ەرەۆان­داعى ماتچتا قاقپاشى يگور شاتسكيدىڭ تاماشا ويناعانى ەسىمىزدە. بۇل جولعى 11 مەترلىك «لوتەرەيادا» دا شاتسكي ءۇش سوق­قىنى قايتارىپ، كومانداسىن كە­لەسى كەزەڭگە الىپ شىقتى. ءسوي­تىپ «شاحتەر» قازاق­ستاندىق كوماندالار اراسىندا ءبىرىنشى بولىپ كونفەرەنتسيا لي­گاسىنىڭ پلەي-وفف كەزەڭىنە جولداما الدى.

ال «كولوس» قاتارىنان ەكىنشى جىل ەۋروكۋبوك باسەكەسىن ءۇشىنشى ىرىكتەۋ كەزەڭىنەن اياقتاۋعا ءماج­بۇر بولدى. ولار بىلتىرعى ەۋ­روپا ليگاسىنىڭ ءۇشىنشى اينالىمىندا حورۆاتيانىڭ «ريەكا» كومانداسىنان جەڭىلىپ، جارىستان ەرتە شىعىپ قالعان ەدى. ەندى، مىنە، بيىل قازاقستاندىق كوماندادان ايلاسىن اسىرا المادى.

ەندى «شاحتەردى» الدا تاعى ەكى ماڭىزدى ويىن كۇتىپ تۇر. قا­زىرشە جەرلەستەرىمىزدىڭ پلەي-وفف ساتىسىنداعى قارسىلاسى انىق­­تالعان جوق. بىراق «كەن­شى­لەرگە» سوڭعى اينالىمدا سلو­ۆا­­كيا­نىڭ «سپارتاك» نەمەسە ءيزرايل­دىڭ «ماككابي» كلۋبىنىڭ ءبىرى قارسىلاس اتانۋى ءتيىس. ەكى ۇجىم اراسىنداعى العاشقى ويىن سلوۆاكيادا ءوتىپ، ماتچ 0:0 ەسە­بىمەن اياقتالدى. قارىمتا ماتچ 12 تامىزدا يزرايلدە وتەدى.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار