بقو پوليتسيا دەپارتامەنتىنىڭ ءباسپاسوز قىزمەتى حابارلاعانداي, وقيعا تەمىرجول ۆوكزالى اۋدانىنداعى اۆتوتۇراقتا ورىن الدى.
بەلگىسىز بىرەۋ 31 جاستاعى تۇرعىنعا تيەسىلى «تويوتا ەستيما» اۆتوكولىگىن ايداپ كەتكەن. كەلتىرىلگەن زالال 4 ميلليون تەڭگەنى قۇرادى.
جەدەل ىزدەستىرۋ ءىس-شارالارى بارىسىندا 1982 جىلعى ورال قالاسىنىڭ تۇرعىنى ۇستالدى. الدىن الا تەرگەۋ بارىسىندا انىقتالعانداي, ەر ادام اۆتوكولىكتى ەسىرتكىگە ەلتىگەن كۇيىندە ايداعان. وعان قوسا, ول بۇرىن كولىك باسقارۋ قۇقىعىنان ايىرىلعان بولىپ شىقتى.
اۆتوكولىك ارنايى تۇراققا قويىلىپ, كۇدىكتى ۋاقىتشا ۇستاۋ يزولياتورىنا قامالدى. قازىرگى كەزدە قر قك 200-بابى 1-بولىگىنە (ايداپ كەتۋ) جانە 346-بابى 1-بولىگىنە (كولىك قۇرالدارىن باسقارۋ قۇقىعىنان ايىرىلعان جانە الكوگولدىك, ەسىرتكىلىك ماساڭ كۇيدەگى ادامنىڭ كولىك قۇرالىن باسقارۋى) سايكەس سوتقا دەيىنگى تەرگەۋ امالدارى باستالدى.
