ۇلتتىق بىرىڭعاي تەستىلەۋ ورتالىعىنىڭ جاقىندا جاريالاعان اقپاراتىنا سۇيەنسەك, 19 تالاپكەردىڭ ۇبت ناتيجەلەرى جويىلدى. ءيا, بۇعان دەيىن باقىلاۋ كامەرالارىنان بەينەجازبالاردى قاراۋ تۋرالى ەرەجە ەنگىزىلگەن ەدى. ۇبت اياقتالعاننان كەيىن 152 تالاپكەردىڭ تەستىلەۋ ەرەجەسىن بۇزعانى انىقتالىپ, ناتيجەلەرى جويىلدى. ولاردىڭ 91-ءى ءبىلىم بەرۋ گرانتىنان ايىرىلعان بولاتىن. ال بيىل ۇبت اياقتالعاننان كەيىن ۇلتتىق تەستىلەۋ ورتالىعىنىڭ قىزمەتكەرلەرى 145 مىڭ تالاپكەردىڭ بەينەجازبالارىن قارايدى. الدىمەن, ۇلتتىق تەستىلەۋ ورتالىعىنىڭ قىزمەتكەرلەرى 100-دەن جوعارى بالل جيناعان تەستىلەنۋشىلەردىڭ بەينەجازبالارىن تەكسەرەدى. ماسەلەن, تالاپكەرلەردىڭ ناتيجەلەرى ناۋرىز جانە مامىر, ماۋسىم ايلارىنداعى كورسەتكىشتەرىنەن ايتارلىقتاي جوعارى بولۋى مۇمكىن.
جاقىندا ۇبت بەينەجازبالارىنىڭ ءبىر بولىگىن ەگجەي-تەگجەيلى قاراپ شىققاننان كەيىن ورتالىق ماماندارى جوعارىدا اتالعان 19 تالاپكەردىڭ شپارگالكالاردى قولدانعانىن جانە ەرەجەلەردى بۇزعانىن انىقتادى. بۇل تۋرالى ۇلتتىق تەستىلەۋ ورتالىعى ديرەكتورىنىڭ مىندەتىن اتقارۋشى ناۋجان ديداربەكوۆا:
ء«بىز تۇلەكتەرىمىزدىڭ تەك ءوز بىلىمىنە ءۇمىت ارتۋىن قامتاماسىز ەتۋ ءۇشىن وسىنداي مۇقيات تەكسەرۋ جۇرگىزىپ جاتىرمىز. ويتكەنى بۇگىن تەست تاپسىرىپ, ەرەجەنى بۇزعان تالاپكەردىڭ ەرتەڭ پوليتسيا قىزمەتكەرى, دارىگەر, مۇعالىم نەمەسە سۋديا رەتىندە ادال مامان بولاتىنىنا كەپىلدىك جوق. سوندىقتان كوميسسيا 19 تالاپكەردىڭ ناتيجەلەرىن جويۋعا شەشىم قابىلدادى. ەندى ولار ءبىلىم بەرۋ گرانتتارىن تاعايىنداۋ كونكۋرسىنا قاتىسا المايدى. بىراق بۇل جاعدايلار بالالار تاراپىنان بولعانىن ەسكەرىپ, ولارعا جوعارى وقۋ ورىندارىندا اقىلى نەگىزدە وقۋ مۇمكىندىگى بەرىلەدى. جالپى, بارلىق تۇلەك ۇبت-نى جىلىنا بىرنەشە رەت تاپسىرا الادى. بۇل تەستىلەۋگە دايىندالۋ بارىسىندا وقۋشىلاردىڭ كۇيزەلىسىن ازايتادى. ءبىز تاعى دا تالاپكەرلەردى اكادەميالىق ادالدىققا شاقىرامىز. ۇبت-نىڭ بارىنشا اشىق جانە ادال ءوتۋى ءۇشىن بۇدان ءارى دە بارلىق جاعدايدى جاسايتىنىمىزدى ايتقىم كەلەدى. بەينەجازبالاردى تەكسەرۋدى جالعاستىرامىز. بۇزۋشىلىقتار انىقتالعان جاعدايدا ناتيجەلەر مەن ءتىپتى تاعايىندالعان گرانتتاردىڭ دا كۇشى جويىلادى», دەدى.
ورتالىق وكىلىنىڭ مالىمدەۋىنشە, باقىلاۋ كۇشەيتىلگەن ءۇش جىلدىڭ ىشىندە تىيىم سالىنعان زاتتاردى كىرگىزۋ ارەكەتتەرى ءبىرشاما ازايعان. 2019 جىلى 128 مىڭ, 2020 جىلى 1 296 تۇلەك ۇبت-عا تىيىم سالىنعان زاتتاردى الىپ وتۋگە تىرىسسا, بيىل مۇنداي 758 جاعداي تىركەلدى. تەستىلەۋ كەزىندە تىيىم سالىنعان زاتتاردى پايدالانۋعا تىرىسقانداردىڭ سانى 2019 جىلعى 2 363-تەن 2021 جىلى 749-عا دەيىن ازايدى.
بۇعان دەيىنگى تەستىلەۋلەردە ەشبىر تالاپتى بۇزباي ۇبت تاپسىرعانىمەن, شەكتى بالل جيناي الماي قالعان تالاپكەرلەرگە تامىزدا تاعى ءبىر مۇمكىندىك بار. وسى ايداعى تەستىلەۋگە قاتىساتىندار ۇبت-نى ءتورتىنشى رەت تاپسىرۋ ارقىلى شەكتى بالدى قايتادان جيناپ, جوعارى وقۋ ورىندارىنىڭ اقىلى بولىمىنە وقۋعا تۇسە الادى. بۇل تەستىلەۋگە قابىلداۋ 6 تامىزدا اياقتالعان بولاتىن. ەندى تالاپكەرلەر ەرتەڭ, ياعني تامىزدىڭ 10-ىنان باستاپ, 13 تامىزعا دەيىن تەست تاپسىرادى. تىركەلۋ كەزىندە تەستىلەنۋشىلەر ەمتيحان وتكىزىلەتىن ورىندى, كۇندى جانە ۋاقىتتى وزدەرى تاڭدايدى.
«وكىنىشكە قاراي, قاڭتار-ماۋسىم ارالىعىندا وتكەن ۇبت-دا كەيبىر تالاپكەرلەر شەكتى بالل جيناي المادى. ولار ەلىمىزدىڭ جوعارى وقۋ ورىندارىنا ءتۇسۋ مۇمكىندىگىنەن ايىرىلدى. ءبىز وسى بالالاردىڭ اقىلى بولىمگە ءتۇسۋ مۇمكىندىگى بولۋى ءۇشىن تامىز ايىندا قايتا تەستىلەۋدەن وتۋگە جاعداي جاسادىق. وقۋعا ءتۇسۋ ءۇشىن شەكتى بالل جانە ءار پاننەن كەمىندە 5 بالل جيناۋ قاجەت», دەپ ءتۇسىندىردى جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ.
