«قىلقالام ۇشىنداعى قۇدىرەت» اتتى كورمەگە اتالعان مۋزەي قورىنداعى قازاقستاندىق كورنەكتى قىلقالام شەبەرلەرىنىڭ 70-كە جۋىق زاماناۋي ونەر تۋىندىسى قويىلعان.
«قوعامنىڭ تاريحي دامۋى مەن وركەندەۋى سول ەلدىڭ مادەنيەتى مەن ونەرىنە بايلانىستى. قازىرگى ۋاقىتتا ەلىمىزدە كوركەمونەر تۋىندىلارىنا ايىرىقشا كوڭىل ءبولىنىپ جاتىر. بەينەلەۋ ونەرىنىڭ كەڭ قانات جايىپ كەلە جاتقانى وسىعان دالەل بولسا كەرەك. ەگەمەندىك العالى بەرى قازاقستاندىق قىلقالام شەبەرلەرىنىڭ تۋىندىلارىنا قىزىعۋشىلىق ارتىپ كەلەدى. سول سەبەپتى 60-جىلدار ۇرپاعى وكىلى, قازاقستان بەينەلەۋ ونەرىنىڭ كلاسسيگى, ايرىقشا قولتاڭبا يەسى شايماردان ساريەۆ اتىنداعى كوركەمسۋرەت قولدانبالى-ساندىك ونەر مۋزەيىمەن بىرلەسىپ وسى كورمەنى ۇيىمداستىرىپ وتىرمىز.
جالپى بەينەلەۋ ونەرى ادامزات قوعامىنىڭ العاشقى كەزەڭىندە پايدا بولدى. ول ادام بالاسىنا زاتتىق دۇنيەنى تانۋ ءۇشىن ءارى وسى قوعامداعى الار ورنىن بىلۋگە قاجەت بولعاندىقتان تۋىندادى. كورمەدەن قازاق اۋىلىنىڭ ءيىسىن سەزىپ, ۇلتتىق تاريح پەن ءداستۇردى كورە الامىز», دەدى قر ۇلتتىق مۋزەيى ديرەكتورىنىڭ ورىنباسارى اباي ساتىبالدين كورمەنىڭ اشىلۋىندا.
سونداي-اق, كورمەدە كوپشىلىككە بەيمالىم اۆتورلاردىڭ دا كەسكىندەمەلىك تۋىندىلارى ۇسىنىلعان.
«كورمەدەگى تۋىندىلاردىڭ دەنى وتانعا, تۋعان جەرگە جانە ۇلتتىق-ءداستۇردى دارىپتەۋگە ارنالعان. جانە مۇندا ءبىزدىڭ وڭىردە عانا ەمەس ەلىمىزدە كەڭىنەن تانىمال قىلقالام شەبەرلەرىنىڭ تۋىندىسى قويىلعان. ءار تۋىندىنىڭ وزىندىك تاريحى بار. دەگەنمەن بىرنەشە جۇمىستى ەرەكشە اتاپ وتكىم كەلەدى. ول ماحامبەت وتەمىس ۇلىنا ارنالعان, اۋىل تىرشىلىگىنەن حابار بەرەتىن جانە قۇراق كورپە بەينەلەنگەن تۋىندىنىڭ ورنى ەرەكشە», دەدى اتىراۋ وبلىستىق ش. ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيىنىڭ ديرەكتورى تولەگەن ورىنباسار ۇلى.
ۇلتتىق مۋزەيدە اشىلعان «قىلقالام ۇشىنداعى قۇدىرەت» اتتى كوشپەلى كورمەنى ەلوردا جۇرتشىلىعى 30 تامىزعا دەيىن تەگىن تاماشالاي الادى.
