2020 جىلدان بەرى مال شارۋاشىلىعى سالاسىندا تەك سيىرلاردى ءتۇرلى تاۋەكەلدەردەن ساقتاندىرۋ جۇمىسى اتقارىلىپ كەلگەن بولاتىن. ەندى مىنە نارىققا قوي مەن جىلقىنى تولىق ساقتاندىرۋدى قامتاماسىز ەتەتىن جاڭا ونىمدەر ەنگىزىلدى. وعان بارلىق ىقتيمال تاۋەكەلدەر كىرەدى جانە سالىستىرمالى تۇردە قۇنى دا تومەن.
مال اۋرۋدان, ورتتەن, جازاتايىم وقيعالاردان شەتىنەن ۇرىلار سويىپ السا, جوعالىپ كەتسە ساقتاندىرۋ ارقىلى شىعىندى وتەپ الۋعا مۇمكىندىك بار.
مالدى قالىپتى تۇردە ساقتاندىرۋ اياسىندا فەرمەر مالىن ءوز شارۋاشىلىعىنىڭ اۋماعىندا عانا ءتۇرلى تاۋەكەلدەردەن ساقتاندىرا الادى. ساقتاندىرۋدىڭ كەڭەيتىلگەن فورماتىندا فەرمەر مالىن 5 كم راديۋستا ورنالاسقان كورشى شارۋاشىلىقتارداعى اۋرۋلاردىڭ ورشۋىنەن ساقتاندىرادى.
ساقتاندىرۋعا جاتاتىن مال سانى كەمىندە 30 باس بولۋى كەرەك. ساقتاندىرىلاتىن مال سانىنا بايلانىستى ساقتاندىرۋ تاريفتەرىنىڭ ءارتۇرلى دەڭگەيلەرى بەلگىلەنگەن. ماسەلەن, جىلقى ءۇشىن – 2,31 پايىزدان 6,46 پايىزعا دەيىن, ۇساق مال ءۇشىن – 2,38 پايىزدان 6,16 پايىزعا دەيىن.
– اتالعان ونىمدەر بويىنشا ساقتاندىرۋ سىياقىلارىن سۋبسيديالاۋ تۇرىندە مەملەكەتتىك قولداۋ جۇمىس ىستەيدى. ول اۋىل شارۋاشىلىعى تاۋار وندىرۋشىلەرىن ىنتالاندىرۋعا جانە ساقتاندىرۋ سىياقىسى سوماسىنىڭ 50 پايىزىن سۋبسيديالاۋ ارقىلى ساقتاندىرۋ شارتىن جارتىلاي ارزانداتۋعا باعىتتالعان. وسىلايشا, ساقتاندىرۋ شارتىن جاساۋ كەزىندە فەرمەر شارت قۇنىنىڭ جارتىسىن, ال قالعان جارتىسىن وپەراتور – اۋىل شارۋاشىلىعىن قارجىلاي قولداۋ قورى تولەيدى, – دەپ ناقتىلادى اۋىل شارۋاشىلىعىن قارجىلاي قولداۋ قورىنىڭ باسقارۋشى ديرەكتورى اسقار قاليەۆ.
جۇيەدە قارجى نارىعىن رەتتەۋ جانە دامىتۋ جونىندەگى اگەنتتىكتىڭ ليتسەنزياسى بار ساقتاندىرۋ كومپانيالارى عانا جۇمىس ىستەيدى.
تاۋەكەلدەردى الەمدىك ساقتاندىرۋ نارىعىندا «ا» رەيتينگىسى بار حالىقارالىق قايتا ساقتاندىرۋ كومپانياسى قايتا ساقتاندىراتىن بولادى. بۇل ساقتاندىرۋ تاۋەكەلدەرى تۋىنداعان جاعدايدا كەپىلدەندىرىلگەن تولەمدەردى قامتاماسىز ەتۋگە مۇمكىندىك بەرەدى.
شارت جاساۋدان باستاپ تولەمدەرگە دەيىنگى بارلىق راسىمدەر فەرمەردىڭ ەلەكتروندى تسيفرلى قولتاڭباسى ارقىلى Qoldau.kz پلاتفورماسىندا ورنالاسقان Agroinsurance اقپاراتتىق سەرۆيسىندە جۇرگىزىلەدى.
اتالعان ونىمدەر ءىشىنارا اۆتوماتتاندىرىلعان. ەگەر جانۋار اۋىرعان جاعدايدا ەپيزووتيالىق قىزمەتتەر ءىس-شارالارىن جۇرگىزۋى كەرەك جانە ولاردىڭ ناتيجەلەرى جۇيەگە جۇكتەلەدى.
