ساۋالناما كورسەتكەندەي, كوپ جاعدايدا ازاماتتاردىڭ 82,5 پايىزى جەدەل جاردەم قىزمەتىنە 4,69 ورتاشا باللمەن قاناعاتتانعان.
ازاماتتاردىڭ «103» - كە شاقىرۋ جاعدايلارىنىڭ 97,7 پايىزى قابىلداندى, ال 2,3 پايىز ازاماتتارعا ءوتىنىش بەرۋ ءۇشىن باسقا ءنومىر بەرىلگەن.
جەدەل جاردەم كورسەتۋ ەرەجەسى بويىنشا ديسپەتچەرگە قوڭىراۋ تۇسكەن ساتتەن باستاپ بريگادا شاقىرۋ ورنىنا شۇعىلدىعىنا بايلانىستى 10-60 مينۋت ىشىندە كەلۋى ءتيىس. رەسپوندەنتتەردىڭ 85,4 پايىزى جەدەل جاردەمدى كۇتۋ مەرزىمدەرى بەلگىلەنگەن نورماتيۆتەرگە سايكەس كەلەتىنىن كورسەتتى. جاعدايلاردىڭ 10,4 پايىزىندا جەدەل جاردەمنىڭ شاقىرۋعا كەلۋى ءبىر ساعاتتان استام ۋاقىتتى قۇرادى, تاعى 4,2 پايىز قاتىسۋشىلار جەدەل جاردەمنىڭ ناقتى كۇتۋ ۋاقىتىن ەسىنە تۇسىرە المادى. كەيبىر جاعدايلاردا جەدەل جاردەم قىزمەتىن ءتورت ساعات نەمەسە ءتىپتى بەس كۇن كۇتۋگە تۋرا كەلگەنى انىقتالدى.
رەسپوندەنتتەردىڭ 94,8 پايىزى دارىگەرلەر پاتسيەنتتەرگە قاجەتتى كومەك كورسەتكەنىن ايتتى. جاعدايلاردىڭ 47,4 پايىزىندا ۇيدە كومەك كورسەتىلدى, 35,2 پايىزىندا فەلدشەرلەر ناۋقاستاردى اۋرۋحاناعا جەتكىزدى. قىزمەت الۋشىلاردىڭ 1,9 پايىزى جەدەل جاردەم بريگاداسى قاجەتتى كومەك كورسەتپەي كەتكەنىن اتاپ ءوتتى.
جالپى, جەدەل جاردەم قىزمەتكەرلەرىنىڭ «سىپايىلىق جانە قاجەتتىلىكتەرگە نازار اۋدارۋ» ساناتى بويىنشا جۇمىسى ازاماتتاردى 88,3 پايىزعا قاناعاتتاندىردى. ەڭ تومەن باعا شىعىس قازاقستان, ماڭعىستاۋ جانە باتىس قازاقستان وبلىستارىنداعى بريگادالارعا بەرىلدى.
