الەۋمەتتىك جەلىگە, اسىرەسە ينستاگرام جەلىسىنە قۇمار جاس بۋىن ارتىستەر كولدە دەمالعان, كينوعا تۇسكەن, تۋعان اۋىلىندا اۋناپ-قۋناعان قۋانىشتى ساتتەرىن وقىرمانىمەن ۇزدىكسىز ءبولىسىپ وتىرعانى بەلگىلى. تەاتر فويەسىنە جەلى پاراقشاسىندا جاريالانعان دەمالىس ساتىنەن تۇسىرىلگەن سۋرەتتەردىڭ فوتوكورمەسى جاسالىپ, جاز قىزىقتارىن جاريا ەتتى. كىمنىڭ قايدا بولعانى, قالاي دەمالعانى كورەر كوزگە انىق كورىنەدى. ماڭدايىن كۇن ءسۇيىپ, جەل قاقتاعان, وتىز كۇنگى دەمالىس ويناقى مىنەز سىيلاپ, ءجۇزى قۋناق تارتقان اكتەرلەر مۇندايدى كۇتپەگەنى انىق, وزدەرىنىڭ تەاتردان تىس قاراپايىم ءومىرىن بەينەلەگەن اق-قارا ءتۇستى سۋرەتتەرىن كورىپ ەسى شىعا قۋانىپ, ءماز بولىپ جاتتى. مىسالى, بەلدى ارتىستەردىڭ ءبىرى راحمان ومار جارى, تەاتر اكتريساسى اقمارال دايراباەۆامەن, ۇلىمەن بىرگە تۋعان جەرى الاكولدە دەمالىپ قايتقان. تالانتتى اكتەر ماقسات ءسابيتوۆ قاسىم حان تۋرالى تۋىندىنى ءتۇسىرىپ جاتقان اقان ساتاەۆتىڭ « ۇلى دالا تاڭى» ءفيلمىنىڭ, ال جاس اكتريسا دينارا نۇربولات «قارا تاڭبا» تەلەسەريالىنىڭ تۇسىرىلىمىندە جۇرگەن. كورەرمەننىڭ سۇيىكتى اكتريساسى ايدا جانتىلەۋوۆا وتباسىمەن تۇركيادان ورالعان بەتى ەكەن. كادىربەك دەمەسىنوۆ, گۇلجامال قازاقباەۆا, ليديا كادەنوۆا سەكىلدى اعا بۋىن ارتىستەر وقشاۋلانعان ءومىردىڭ ءتارتىبىن بۇزا الماي, نەمەرە باعىپ, ۇيدە وتىرعاندارىن ايتتى. بۇدان كەيىن كورەرمەندەر زالىنا جينالعان قىزمەتكەرلەرگە شاعىن بەينەفيلم كورسەتىلدى.
قاتال كارانتين تارتىبىنە باعىنا وتىرىپ جۇمىس ىستەگەن تەاتر ەكى ماۋسىم ارالىعىندا كورەرمەنگە 135 قويىلىم, 4 پرەمەرا ۇسىنعان. تەاتر ديرەكتورى ازامات ساتىبالدى: «بيىل تەاتر جاڭا 75-ماۋسىمىنىڭ شىمىلدىعىن اشادى. جاڭا دەگەن – جاقسى ءسوز. بۇل الداعى ماۋسىمعا جاقسى كوڭىل كۇيمەن, جاڭا يدەيالارمەن, سونى شىعارماشىلىق جوسپارمەن قادام باسۋ دەگەن ءسوز. تەاتر – كەلەشەك ءۇشىن جۇمىس ىستەيتىن مەكەمە, ەندەشە ول ۇزدىكسىز العا قادام باسۋدى عانا مەجەگە الۋى ءتيىس. قۇم كەشىپ, قايىرلاپ قالعان كەمە سەكىلدى تەاتر ءبىر ورىندا تۇرىپ قالسا, ول ءسوزسىز رەگرەسكە الىپ كەلەدى. باسەكەسى مول كەزەڭدە تەاترعا كورەرمەندى كوبىرەك تارتۋ جولىن قاراستىرۋ – باسشىلىق مىندەتى. بيىلعى جىلى تەاتر بيلەتىنىڭ قۇنىن كوتەرۋدى كوزدەپ وتىرمىز. شىعىنى كوپ, كوپ جاعدايدا وزىنە ارقا سۇيەپ جۇمىس ىستەيتىن تەاتردىڭ زاماناۋي ماركەتينگى قالىپتاسىپ, ءوزىن ءوزى اسىراۋدىڭ ۇلگىسىن قالىپتاستىرۋى كەرەك. ول ءۇشىن اكتەر ويىنىنىڭ ساپاسى ارتىپ, سول باعاعا سايكەس بولۋى ءتيىس.
«تەاتر ماۋسىمى قازان ايىندا اشىلۋى كەرەك» دەگەن بۇلجىماس قاعيدا ەش جەردە جازىلماعان. سوندىقتان جىلداعى ءداستۇردى بۇزىپ, قازاندى كۇتپەي-اق قىركۇيەك ايىنىڭ العاشقى اپتاسىندا جاڭا ماۋسىمنىڭ شىمىلدىعىن اشىپ, كورەرمەندى جاڭا پرەمەرامەن قۋاندىرامىز. الداعى ۋاقىتتا تەاتردى جىل ون ەكى اي جۇمىس ىستەيتىن, جۇمىسى جازدا دا توقتامايتىن تەاترعا اينالدىرۋ جوسپاردا بار. ويتكەنى كورەرمەنمەن بايلانىستى ۇزۋگە بولمايدى. تەاتردان قول ءۇزىپ, كوز جازىپ قالعان كورەرمەن تەز سۋىپ قالادى. رۋحاني دۇنيەدەن ءنار الىپ, ەلىككەن, قىزىققان كورەرمەندى ارى قاراي قىزىقتىرا ءتۇسۋ – ءبىزدىڭ مىندەتىمىز. سول سەبەپتى قىركۇيەكتە بىردەن ەكى سپەكتاكل پرەمەراسىنىڭ تۇساۋى كەسىلىپ, كورەرمەنگە تارتۋ ەتىلەدى. قازان ايىنان باستاپ م.اۋەزوۆتىڭ «قاراگوز», تولەن ابدىكتىڭ ء«بىز ۇشەۋ ەدىك» جانە بالالارعا ارنالعان تاعى ءبىر سپەكتاكل, بارلىعى بەس قويىلىمدى ساحناعا شىعارۋ جوسپاردا تۇر».
نۇر-سۇلتان, تۇركىستان قالالارىنا جاسالاتىن گاسترولدىك ساپارلاردان بولەك, ازامات ساتىبالدى ع.مۇسىرەپوۆ تەاترىنىڭ ا.چەحوۆ فەستيۆالىنە شاقىرتۋ الىپ وتىرعان قازاقستاندىق ەڭ العاشقى ءارى جالعىز تەاتر ەكەنىن قۋانىشپەن سۇيىنشىلەدى. حالىقارالىق چەحوۆ فەستيۆالى دەگەن نە؟ تەاتر ديرەكتورىنىڭ تاراتا تۇسىندىرگەنىنە قاراعاندا, چەحوۆ فەستيۆالى – تمد اۋماعىنداعى عانا ەمەس, دۇنيەجۇزىلىك دەڭگەيدەگى ەڭ اۋقىمدى تەاتر بايگەسى. حالىقارالىق تەاتر قاۋىمداستىقتارى ءبىر اۋىزدان بەكىتكەن چەحوۆ فەستيۆالى – الەمدىك تەاتر باعىتتارىنىڭ, الۋان ءتۇرلى تەاتر ءداستۇرى مەن ءتۇرلى تەاتر مەكتەپتەرىنىڭ باس قوسىپ, توقايلاساتىن تانىمال شىعارماشىلىق الاڭى بولىپ سانالادى. وندا جىل سايىن مىندەتتى تۇردە ايىرىقشا تەاتر جاڭالىعى تانىلادى. وسى ۋاقىتقا دەيىن بۇل فەستيۆالگە كۇللى ورتا ازيا كەڭىستىگىنەن تەك قىرعىز تەاترى عانا «ماڭگۇرت» سپەكتاكلىمەن قاتىسقان. ال تالاي جىلدىق تاريحى بار, بەدەلدى فەستيۆالدىڭ سپەكتاكلدەرىن ساراپقا سالىپ, ۇزدىكتەرىن انىقتايتىن قۇرمەتتى قازىلار القاسىنا ازيالىق بەس مەملەكەتتەن تەك ءازىربايجان مامبەتوۆ قانا ءبىر مارتە توراعالىققا شاقىرىلعان. سوندىقتان ع.مۇسىرەپوۆ تەاترىنىڭ الەمدىك ماڭىزعا يە فەستيۆالگە شاقىرتۋ الۋى تەاتردىڭ عانا ەمەس, ۇلت مادەنيەتىنىڭ بوركىن اسپانعا اتىپ قۋاناتىنداي ايتۋلى جەتىستىگى رەتىندە قابىلدانىپ وتىر. قاراشا ايىنىڭ سوڭىندا دۇنيە جۇزىندەگى ەڭ مىقتى تەاترلار جۇيرىك سپەكتاكلىن باپتاپ اكەلىپ قوساتىن بايگەگە قازاقستاننىڭ اتىنان رەجيسسەر فارحاد مولداعاليدىڭ «قۇلاگەرى» قوسىلادى. «ا» ساناتتاعى حالىقارالىق ونەر بايگەسىنەن جۇلدەمەن ورالسا, ءارى قاراي بۇدان دا جوعارى ەۋروپالىق بايقاۋلارعا ەسىك اشىلىپ, جاستار تەاترى جولداما الادى. «مۇسىرەپوۆ تەاترى وسى مۇمكىندىكتى قولدان شىعارىپ الماۋدىڭ ازىرلىگىنە بۇگىننەن باستاپ كىرىسۋى كەرەك», دەدى قاشان دا شىعارماشىلىق قازانىندا قايناپ جۇرەتىن ا.ساتىبالدى.
الماتى
