ايماقتار • 04 تامىز، 2021

تراكتوردى ماس كۇيىندە جۇرگىزگەن اۋىل تۇرعىنى قامالدى

228 رەت كورسەتىلدى

پاۆلودار وبلىسى ەرتىس اۋدانىندا ماس كۇيىندە كولىك تىزگىندەگەن 59 جاستاعى ەر ادام جەتى جىل مەرزىمگە كولىك باسقارۋ قۇقىعىنان ايىرىلىپ، 15 تاۋلىككە اكىمشىلىك قاماۋعا الىندى، دەپ حابارلايدى Egemen.kz Pavlodarnews.kz سايتىنا سىلتەمە جاساپ.

پاۆلودار وبلىستىق پوليتسيا دەپارتامەنتىنىڭ مالىمەتىنشە، ماس كۇيىندە كولىك جۇرگىزۋ تۋرالى زاڭنامانىڭ قاتاڭداتىلۋىنا قاراماستان، كۇن سايىن كولىكتى ماس كۇيىندە باسقارۋ فاكتىلەرى كوپتەپ تىركەلۋدە. ءتىپتى، ءتارتىپ ساقشىلارى كولىكتى تىزگىندەۋ قۇقىعىنان بۇرىن ايىرىلعان تۇرعىنداردى دا ماس كۇيىندە ۇستايدى.

- 2021 جىلدىڭ 31 شىلدەسىندە ەرتىس اۋدانىنىڭ پوليتسەيلەرى 59 جاستاعى ەر ادامنىڭ باسقارۋىمەن «متز-82» تراكتورىن توقتاتتى. قۇجاتتاردى تەكسەرۋ كەزىندە جۇرگىزۋشىنىڭ ىشىمدىك ىشكەنى انىقتالعان. جۇرگىزۋشى كۋالاندىرىلدى، مەديتسينالىق كۋالاندىرۋدىڭ قورىتىندىسىنا سايكەس ەر ادام ماس كۇيىندە بولعان. ءتارتىپ بۇزۋشىعا قاتىستى قر اقبك 608 - بابىنىڭ 1-ءبولىمى بويىنشا اكىمشىلىك حاتتاما تولتىرىلدى، - دەپ حابارلادى پاۆلودار وبلىسى ەرتىس اۋداندىق پوليتسيا ءبولىمىنىڭ باستىعى داۋلەت مولداباەۆ.

ماتەريال سوتتا قارالىپ، سوت قاۋلىسىمەن تراكتور جۇرگىزۋشىسى اتالعان اكىمشىلىك قۇقىق بۇزۋشىلىقتى جاساعانى ءۇشىن كىنالى دەپ تانىلىپ، جەتى جىل مەرزىمگە كولىك باسقارۋ قۇقىعىنان ايىرىلدى. سونىمەن قاتار، 15 تاۋلىككە اكىمشىلىك قاماۋعا الىندى.

سوڭعى جاڭالىقتار

ۇقساس جاڭالىقتار