ەۋروكۋبوك: قازاقستان كلۋبتارىنىڭ ءساتتى قادامى

 «ارمەنيا دا

ءبىزدىڭ جەر»

اراعا ءبىراز ۋاقىت سالىپ, ەۋروكۋبوك باسەكەلەرىنە قاي­تا ورالعان قاراعاندىنىڭ «شاح­تەرى» ەكىنشى ىرىكتەۋ كەزەڭىنىڭ العاشقى ويىنىن بۋحارەستتە (رۋ­مىنيا) وتكىزىپ, جەرگىلىكتى  «ستياۋا» ۇجىمىنان 1:0 ەسەبىمەن جەڭىلىپ قالعان ەدى. ءوز ەلىمىزدە قارىمتا قايتارۋدى نيەت ەتكەن «شاحتەر» پاندەميانىڭ سالدارىنان ءوز الاڭىنداعى ويىنىن ارمەنيا استاناسى – ەرەۆاندا وتكىزۋگە ءماجبۇر بولدى. سەبەبى ەپيدەميالىق احۋال بويىنشا قازاقستان رۋمىنيانىڭ «قىزىل ايماعىنا» ەنىپ, 25 شىلدەدەن باس­تاپ كوروناۆيرۋس ورشىگەن ەلدەردىڭ قاتارىنا كىرگەن. بۇل – ءبىزدىڭ ەلدەن رۋمىنياعا بارعاندار 14 كۇندىك كارانتينگە جاتقىزىلادى دەگەن ءسوز.

كونفەرەنتسيا ليگاسىنىڭ رەگ­لامەنتىنىڭ 1ك جيىنتىعىنىڭ تا­لاپ­تارىنا سايكەس, بۇنداي جاع­دايدا الاڭ يەسى بولىپ وتىرعان كلۋب بەيتاراپ الاڭ تاۋىپ, ماتچىن سول جەردە وتكىزۋى ءتيىس. وسىدان كەيىن «شاحتەر» فۋتبول كلۋبى رۋ­مىن كلۋبىمەن كەلىسسوزدەر جۇر­گىزىپ, ويىندى ارمەنيا استاناسى – ەرەۆاندا وتكىزەتىن بولىپ كەلىستى.

ەكى ماتچتى دا سىرت الاڭدا وتكىزۋگە ءماجبۇر بولعان «شاحتەر» ەرەۆانداعى ويىنعا تىڭعىلىقتى دايىندالىپ, شاراسىز كۇيگە قال­دىرعان رۋمىنيا كومانداسىن قالاي دا جەڭۋىمىز كەرەك دەپ اتتانعان بولاتىن. ءسويتىپ, «كەنشىلەر» كومانداسى ۆازگەن سارگسيان اتىنداعى ستاديوندا وتكەن ويىندا وزدەرىنەن الدەقايدا دەڭگەيى جوعارى «ستياۋانى» سان سوقتىرىپ كەتتى. كەزدەسۋدىڭ نەگىزگى ۋاقىتى 2:1 ەسەبىمەن اياقتالسا دا, ەكى ويىننىڭ ناتيجەسى بويىن­شا تارازى باسى تەڭەستى. ارى قا­راي ماتچ ەكسترا-تايمعا, ودان ءارى پەنالتي سەرياسىنا ۇلاس­تى. ال 11 مەترلىك نۇكتەدە قارا­عاندىلىق كوماندانىڭ باعى جانىپ, قارسىلاستارىنان باسىم ءتۇستى. بۇل جەردە فۋتبولشىلاردان بولەك,  «شاحتەر» قاقپاشىسى يگور شاتسكيدىڭ دە ەڭبەگىن ەرەك­شە اتاپ وتكەن ءجون. قارسىلاس ويىنشىنىڭ سوققىسىن قايتارا بىلگەن ول كومانداسىنا ماڭىزدى جەڭىس سىيلادى.

وسىلايشا ارمەنيادا الاڭ قوجايىنى بولىپ ويناعان «شاح­تەر» قارسىلاستارىنا مىنەز كور­سەتىپ, كەلەسى كەزەڭگە جولداما الدى. ەندى قاراعاندىنىڭ كومانداسى جارىستىڭ ءۇشىنشى اينالىمىندا ۋكراينانىڭ  «كولوس» كلۋبىمەن كەزدەسەدى. بىلتىرعى ۋكراينا چەم­پيوناتىندا 4-ورىن العان «كو­لوس» بىردەن كونفەرەنتسيا لي­گا­سىنىڭ ءۇشىنشى كەزەڭىنە جولداما العان. العاشقى ويىن 5 تامىزدا سىرت الاڭدا, قارىمتا كەزدەسۋ 10 تامىز كۇنى قازاقستاندا وتەدى دەپ جوسپارلانعان. الدىن الا مالىمەت بويىنشا, «شاحتەر» ءوز الاڭىنداعى ماتچتى «استانا ارەنادا» وتكىزەدى.

«توبىل» تارتىستى ويىن كورسەتتى

قوستانايدىڭ «توبىلى» كون­فەرەنتسيا ليگاسىنىڭ ەكىنشى ىرىك­تەۋ كەزەڭىندەگى العاشقى ماتچ­تان كەيىن قازاقستاندىق كوماندالار اراسىندا ەڭ ناشار ونەر كورسەتكەن ۇجىمنىڭ ءبىرى ەدى. حورۆاتيانىڭ «حايدۋك» كومانداسىمەن كەزدەسكەن بىلتىرعى قازاقستان چەمپيوناتىنىڭ كۇمىس جۇلدەگەرلەرى سىرت الاڭدا 2:0 ەسە­بىمەن جەڭىلىپ, كەلەسى كەزەڭگە شى­عۋ ءۇشىن جاعدايلارىن تىم ناشارلاتىپ العان-دى. ءتىپتى, فۋت­­­­بول ماماندارى «توبىل» بي­ىل دا ەۋرودودا باسەكەسىن ەرتە اياق­­­تايدى دەپ بولجامدارىن جا­ساپ, قوستانايلىق ۇجىمعا سەنىم­سىزدىكتەرىن بىلدىرگەن بولاتىن. الاي­دا «توبىل» حورۆاتيادان قازاق­ستانعا ءبىر بارماعى بۇگۋلى كەلگەن ەكەن.

قوستانايداعى ورتالىق ستا­ديون­دا وتكەن قارىمتا باسەكەدە الاڭ يەلەرى مۇلدە باسقا ويىن كور­سەتىپ, بارشا قازاقستاندىق فۋت­بول جانكۇيەرلەرىن دە, «حاي­دۋك» فۋتبولشىلارىن دا تاڭ قال­دى­رىپ, 4:1 ەسەبىمەن جەڭىسكە جەتتى. جاۋاپتى كەزدەسۋى الدىندا ال­دىڭعى ويىننان ساباق العان «تو­بىل» كلۋبىنىڭ باس باپكەرى مىن­دەتىن اتقارۋشى الەكساندر موس­كالەنكو قۇرامعا تاك­تيكالىق وزگەرىس جاساپ, ۇتىمدى شەشىم قابىلدادى.

ياعني سىرت الاڭداعى ويىندا قوسالقى قۇرامنان شىعىپ, «توبىلدىڭ» ويىنىنا قان جۇ­گىرتكەن سەرىكجان مۇجىقوۆ, رۋبەن بريجيدۋ, يگور سەرگەەۆ, دۋشان يوۆانچيچ جانە زوران توشيچ قوس­تانايداعى قارىمتا ماچتا ءبىرىنشى مينۋتتان باستاپ الاڭعا شىعىپ, كومانداسىن العا سۇيرەدى. اتالعان ويىنشىلار ءبىرىنشى تايم­دا كوزگە تۇسە قويماسا دا, ەكىن­شى تايمدا كەزدەسۋدىڭ باستى قاھار­ماندارىنا اينالدى.

ەكىنشى تايمنىڭ 56-مينۋتىندا د.ءيوۆانچيچتىڭ ايىپ الا­ڭىنىڭ سىرتىنان تەپكەن دوبى قورعاۋشىلاردىڭ بىرىنە ءتيىپ, قاق­پا تورىندا تۋلادى. ارادا بەس مينۋت وتكەندە زوران ءتوشيچتىڭ كەرەمەت پاسىنان كەيىن يگور سەر­گەەۆ ەسەپتى ەسەلەدى. ال 67-مي­نۋت­تا وزبەكستاندىق شابۋىلشى سەرىكجان مۇجىقوۆتىڭ اۋە­لەتە اسىرعان پاسىنا ءبىرىنشى جەتىپ, باسپەن تاماشا گول سوقتى. وسى­لايشا «توبىل» اينالدىرعان 11 مينۋتتىڭ ىشىندە قارسىلاس كوماندانىڭ قاقپاسىنا جاۋاپسىز ءۇش گول سوقتى. ەكى ويىننىڭ ناتيجەسى بويىنشا «توبىل» 3:2 ەسەبىمەن كەلەسى كەزەڭگە شىعۋعا ءبىر تابان جاقىن تۇرعان ەدى. الايدا 94-مينۋتتا ەمير ساحيتي «توبىل» قاقپاسىنىڭ ماڭىنداعى قاربالاس ءساتتى ءتيىمدى پايدالانىپ, ەسەپ ايىر­ماسىن قىسقارتتى. وسىدان كەيىن ويىن ەكسترا-تايمعا ۇلاستى. قوسىمشا تايمنىڭ ەكىنشى 15 مينۋتى اياقتالار تۇستا الاڭعا تىڭنان قوسىلعان ازات نۇرعاليەۆ جانە اسحات تاعىبەرگەن تاندەمى ءوز ناتيجەسىن بەردى. ازاتتان پاس العان اسحات ايىپ الاڭىنىڭ سىرتىنان ءدال سوققى جاساپ, كومانداسىنا ماڭىزدى جەڭىس سىيلادى. قورىتىندى ەسەپ – 4:1. بۇل ماتچتا دا قازاقستاندىق قاقپاشى ناعىز ەرلىك جاسادى. 70-مينۋتتا «حاي­دۋك» فۋتبولشىسى فيليپ كرو­ۆي­نوۆيچتىڭ ون ءبىر مەترلىك ايىپ دوبىن الەكساندر موكين قايتارا ءبىلدى.

ەندى الەكساندر موسكالەنكو شاكىرتتەرى ءۇشىنشى ىرىكتەۋ كەزە­ڭىندە سلوۆاكيانىڭ «جيلينا» كومانداسىمەن كەزدەسەدى. العاشقى ماتچ 5 تامىزعا, قارىمتا كەزدەسۋ 12 تامىزعا جوسپارلانعان.

قوسىمشا تايم

كۇش بەردى

ەلوردانىڭ «استانا» كلۋبى كونفەرەنتسيا ليگاسىنىڭ ەكىنشى ىرىكتەۋ كەزەڭىنىڭ العاشقى ماتچىندا گرەكيانىڭ «اريس» كلۋبىن ءوز الاڭىندا قابىلداپ, 2:0 ەسەبىمەن سەنىمدى تۇردە جەڭىسكە جەتتى. بۇل ەسەپ قارىمتا ويىن الدىندا جەرلەستەرىمىزگە ءبىراز باسىمدىق سىيلاعان ەدى. الايدا «استانا ارە­نادا» وتە ناشار ويناعان «اريس» ءوز ەلىندەگى «كلەانتيس ۆي­كە­ليديسا» ستاديونىنداعى قا­رىمتا باسەكەدە «استانانىڭ» ادى­مىن اشتىرمادى. ونىڭ ۇستىنە, سىرتتاعى ويىن­دا ەلوردالىق ۇجىم­عا ءبىرىنشى ماتچتىڭ ۇزدىك وي­ىنشىسى بولعان مارين توماسوۆ كومەكتەسە المادى.

ماتچتىڭ باستالۋىنا ءبىر ساعات قالعاندا توماسوۆ الاڭعا شىعاتىن نەگىزگى قۇرام ويىنشىلارىنىڭ تىزىمىندە بولعان ەدى. وكىنىشكە قاراي, دەنە قىزدىرۋ ساتىندە حورۆاتيالىق لەگيونەر اياعىنان جاراقات الىپ, ويىنعا قاتىسا المايتىنى بەلگىلى بولدى. دەگەنمەن ەۋروكۋبوك ويىندارىندا بىرنەشە جىلدىق تاجىريبەسى بار «استانا» قيىنشىلىقپەن بولسا دا كەلەسى كەزەڭگە جولداما الدى.

گرەكياداعى ماتچ 2:1 ەسەبىمەن الاڭ يەلەرىنىڭ پايداسىنا شە­شىلدى. ويىننىڭ 36-مينۋتىندا دميتريوس مانوس كومانداسىن العا شىعارسا, 78-مينۋتتا لۋكاس ساشا ەسەپتى 2:0-گە جەتكىزدى. ءسويتىپ ەكى ويىننىڭ ناتيجەسى بويىنشا تارازى باسى تەڭەسىپ, بۇل ويىن دا قوسىمشا تايمعا ۇلاستى. ابىروي بولعاندا, «استانا» ساپىنا جۋىر­دا عانا قوسىلعان 24 جاستاعى قورعاۋشى ەنەو بيتري ايىپ دوبىنان اسىرىلعان پاستى قاقپاعا ءدال باعىتتاپ, جەڭىستى گولدىڭ اۆتورى اتاندى. وسىلايشا ەلوردالىق ۇجىم ەكى ويىننىڭ قورىتىندىسى بويىنشا كونفەرەنتسيا ليگاسىنىڭ ءۇشىنشى ىرىكتەۋ كەزەڭىنە جولداما الدى.

«استانا» كەلەسى اينالىمدا فينليانديانىڭ «كۋپس» كومانداسىمەن كەزدەسەدى. العاشقى ويىن 5 تامىزدا سىرت الاڭدا, قارىمتا كەزدەسۋ 12 تامىز كۇنى «استانا ارەنادا» وتەدى.