Energyprom مالىمەتىنشە, اۋىل, ورمان جانە بالىق شارۋاشىلىعى سالاسىندا ەڭبەك قىلاتىن كاسىپورىندار سانى 8 جىل قاتارىنان كوبەيىپ وتىر ەكەن. ارينە, بۇل – ءارى تاڭعالارلىق, ءارى قۋانارلىق قۇبىلىس. بيىل ونداي كاسىپورىندار سانى 15,3 مىڭعا جەتكەن. وندا جۇمىس ىستەيتىن ادام سانى 69 مىڭنان اسادى. بۇل – ءبىرىنشى توقساننىڭ سوڭىنداعى كورسەتكىش. ولاردىڭ كوبى, 56 مىڭنان اسا ادام نەگىزىنەن وسىمدىك جانە مال شارۋاشىلىعى, اڭشىلىق جانە قىزمەت كورسەتۋ سالاسىندا كاسىپ ەتىپ, كۇن كورەدى ەكەن. تاعى 2 مىڭداي ادام ورمان جانە اعاش كەسۋدىڭ اينالاسىندا ماڭداي تەرىن توگىپ ءجۇر. اۋىل شارۋاشىلىعىنىڭ ماماندارى اسىرەسە سولتۇستىك قازاقستان, اقمولا جانە قوستاناي وبلىستارىندا كوپ. ال وسى سالاداعى ورتاشا جالاقى ءبىرىنشى توقساندا 116,1 مىڭ تەڭگەنى قۇراعان. بۇل ەلدەگى ورتاشا جالاقى كورسەتكىشىنەن ەكى ەسە تومەن.
«قازاقستان رەسپۋبليكاسىندا سوڭعى جىلدا جالاقى 15,2 پايىزعا ءوستى, ال اۋىل, ورمان جانە بالىق شارۋاشىلىعى سالاسىنداعى جالاقى نەبارى 10,4 پايىزعا عانا كوبەيدى. بۇل سالاداعى جالاقىنىڭ ساتىپ الۋ قابىلەتىنىڭ ءوسىمى 2,9 پايىزدى قۇراعان. ونىڭ وزىندە ساتىپ الۋ قابىلەتىنىڭ ءوسىمى تەك قانا وسىمدىك جانە مال شارۋاشىلىعى سالاسىندا عانا بايقالىپ وتىر. اۋىل شارۋاشىلىعىنداعى ەڭ جوعارعى ورتاشا ايلىق جالاقى ورمان جانە اعاش كەسۋ سالاسىندا بايقالادى – 127,3 مىڭ تەڭگە», دەپ جازادى Energyprom.
وسىمدىك جانە مال شارۋاشىلىعىندا, اڭشىلىق پەن قىزمەت كورسەتۋ سالالارىنداعى ازاماتتار ورتاشا ماندە 115,9 مىڭ تەڭگە السا, بالىق جانە اكۆامادەنيەت سالاسىندا ەڭبەك ەتۋشىلەر 81,1 مىڭ تەڭگەنى قاناعات تۇتادى.
ءدال قازىرگى كەزەڭدە اۋىل شارۋاشىلىعى – كۇيرەۋدىڭ از-اق الدىندا تۇرعان, ەلەۋلى كومەك پەن قولداۋدى قاجەت ەتەتىن سالا. ۇكىمەت سوزىنە سەنسەك, سالاعا قارجى جەتۋدەي-اق جەتىپ جاتىر. ناقتىلاعاندا – ينۆەستيتسيا. 2021-ءدىڭ قاڭتار-مامىرىندا سالانىڭ نەگىزگى كاپيتالىنا كەلگەن ينۆەستيتسيا 213,8 ملرد تەڭگەنى قۇراعان. Finprom دەرەگىنشە, بۇل بىلتىرمەن سالىستىرعاندا 47 پايىزعا كوپ. وسى ايدىڭ باسىندا پرەمەر-مينيستر اسقار مامين دە شارۋاشىلىقتارعا ءىرى كولەمدە قارجى بەرىلەتىنىن باسا ايتقان.
«بيىل اۋىل شارۋاشىلىعىنا 700 ملرد تەڭگەدەن استام ينۆەستيتسيا سالىنادى. تاماق ونىمدەرى وندىرىسىنە بەرىلەتىن ينۆەستيتسيا دا 18,8 پايىزعا ارتىپ, 124 ملرد تەڭگەگە جەتەدى. قازىر جالپى سوماسى 335 ملرد تەڭگە بولاتىن 285 ينۆەستيتسيالىق جوبا جۇزەگە اسىپ جاتىر. اتالعان شارا 8,4 مىڭ جۇمىس ورنىن قۇرۋعا مۇمكىندىك بەرەدى», دەگەن ەدى ۇكىمەت باسشىسى.
مەملەكەت اۋىل شارۋاشىلىعىن قولداۋدىڭ تاعى ءبىر تەتىگى رەتىندە اۋىل شارۋاشىلىعىن قولداۋ قارجىلىق قورىن قۇرعان ەدى. قور ديرەكتورى ءامىرحان سمايل ۇلىنىڭ ايتۋىنشا, قور مال شارۋاشىلىعىن دامىتۋ ءۇشىن 16 پايىزبەن 30 ملن تەڭگە نەسيە بەرەدى. Qoldau.kz باعدارلاماسى ارقىلى سىياقى ستاۆكاسىن ارزانداتۋ ماقساتىندا سۋبسيديا راسىمدەۋگە بولادى. سوندا 10 پايىزى سۋبسيديا ەسەبىنەن قايتارىلادى دا, شارۋاشىلىق يەسى 6 پايىزدى عانا تولەۋگە مۇمكىندىك الادى.
قازاقستاننىڭ كەڭ-بايتاق دالاسى, ەجەلدەن اڭشىلىق پەن مالشىلىققا دەگەن يكەمدىلىگى, وسىمدىك پەن دالا تابيعاتىنىڭ قىر-سىرىن مەڭگەرگەندىگى – اۋىل شارۋاشىلىعىن دامىتۋعا قاجەتتى فاكتورلار. دەسە دە دامۋ ءۇشىن بۇل فاكتورلار ازدىق ەتەرى ءسوزسىز. مەملەكەتتىڭ ءتيىمدى قولداۋى قاجەت. سالا قاشان اياعىنان تىك تۇرىپ كەتكەنشە.
