1 تامىز كۇنى ساعات 23:40-تا قاراعاندىدا كوپقاباتتى ءۇيدىڭ بەسىنشى قاباتىنداعى پاتەردىڭ تەرەزەسىنەن 2017 جىلى تۋعان بالا قۇلاپ كەتتى.
الدىن الا مالىمەت بويىنشا, بالا ەرەسەكتەردىڭ قاراۋىنسىز قالعان. ول ماقاجانوۆ اتىنداعى كلينيكاعا جەتكىزىلدى.
«بالادا ءبىراز جاراقات بار - جابىق كەۋدە جاراقاتى, وڭ جاق وكپەنىڭ كوگەرۋى. ەكى اياعى بىرنەشە جەردەن جاراقاتتانعان. يەك ايماعىنىڭ كوگەرگەن جاراسى. ءىشتىڭ جاراقاتى. جاعدايى تۇراقتى, قازىرگى ۋاقىتتا جانساقتاۋ بولىمىندە جاتىر», دەپ حابارلادى قاراعاندى وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى.
قۇتقارۋشىلاردىڭ ايتۋىنشا, ەرەسەكتەر قاراۋىنسىز قالۋ - بالالاردىڭ جاراقاتتانۋى مەن ءولىمىنىڭ نەگىزگى سەبەبى بولىپ وتىر. وسىعان بايلانىستى وبلىستىڭ تجد قىزمەتكەرلەرى اتا-انالاردان كىشكەنتاي بالاسىن مۇقيات قاداعالاۋدى, ولاردى تەرەزەسى اشىق ۇيدە جالعىز قالدىرماۋدى سۇرايدى.
