ۋاقىتشا بەلسەندىلىگىن جوعالتقان وندىرۋشىلەر دە جوق ەمەس. ولاردىڭ قاتارى 12 ايدا 19 پايىزعا ءبىر-اق ارتقان. 2021 جىلدىڭ شىلدە ايىنداعى دەرەك بويىنشا ەلدە 341,9 مىڭ كاسىپورىن بار. ءىرى-ۇساعىن قوسا ەسەپتەگەندە. بۇل 2020 جىلدىڭ شىلدەسىمەن سالىستىرعاندا 6,4 پايىزعا جوعارى كورسەتكىش. Ranking پورتالىنىڭ دەرەگىنە سۇيەنەر بولساق, وسى ۋاقىت ىشىندە ۋاقىتشا جۇمىس ىستەمەي قالعان كاسىپورىنداردىڭ سانى 18,8 پايىز, ياعني 120,7 مىڭعا دەيىن كوبەيگەن. جاڭا كومپانيالار بىلتىرعىدان 2,7 پايىزعا (50,1 مىڭ) كوپ بولسا, بەلسەندى كومپانيالار سانى نەبارى 0,04 پايىزعا وسكەن.
«ۋاقىتشا بەلسەندىلىگىنەن ايىرىلعان كومپانيالاردىڭ باسىم بولىگى الماتى وبلىسىنا تيەسىلى. وڭىردەگى ونداي كاسىپورىندار سانى 54 پايىزعا ارتقان. پروبلەمالىق كومپانيالار سونداي-اق نۇر-سۇلتان مەن شىمكەنت قالاسىندا دا ءجيى كەزدەسەدى. ال بەلسەندى كاسىپورىندار سانى بويىنشا الدىڭعى ورىندا شىمكەنت قالاسى تۇر: 7 پايىزعا ارتىپ, 7,4 مىڭعا جەتكەن. ۇزدىك ۇشتىككە شىعىس قازاقستان جانە پاۆلودار وبلىستارى دا كىرەدى. ءبىرىنشى توقساننىڭ قورىتىندىسى بويىنشا شاعىن بيزنەس سەگمەنتىندەگى وندىرىلگەن ءونىم, اتقارىلعان جۇمىس جانە كورسەتىلگەن قىزمەت كولەمى 5,3 ترلن تەڭگەنى قۇرادى. بۇل 2020-مەن سالىستىرعاندا 22,9 پايىزعا جوعارى», دەپ جازادى Ranking ساراپشىلارى.
ەكونوميكالىق ءونىم مەن قىزمەت كولەمى تۇرعىسىنان سالالار اراسىندا ساۋدا, اۆتوجوندەۋ, قۇرىلىس جانە وڭدەۋشى ونەركاسىپتىڭ ءباسى بيىك. كوش سوڭىندا جۇرگەنى – سۋمەن جابدىقتاۋ. شاعىن كاسىپورىندار وندىرگەن ءونىم مەن كورسەتكەن قىزمەتتەن تۇسكەن تابىس 9,9 ترلن تەڭگە بولىپتى. بۇل تسيفر دا بىلتىرعى تسيفردان 19,7 پايىزعا كوپ. اسىرەسە تابىستىڭ باسىم بولىگى كاسىبي, عىلىمي جانە تەحنيكالىق سالالاردا جانە ساۋدا, اۆتوجوندەۋ, قۇرىلىس سەكتورلارىندا.
بيىل كاسىپورىنداردىڭ شىعىنى 10,6 پايىزعا قىسقارعان. شىعىن دا تاعى سول ساۋدا مەن اۆتوجوندەۋدى, قۇرىلىس پەن وڭدەۋشى ونەركاسىپتى ماڭايلايدى. ورتا جانە ءىرى كومپانيالار سەگمەنتىندە ءبىرىنشى توقساندا 8,6 ترلن تەڭگەگە ونىمدەر ساۋدالانىپ, قىزمەتتەر ۇسىنىلعان. وسىنشاما كىرىستىڭ كوپ بولىگىنە تاۋ-كەن ءوندىرىسى جانە كارەر قازۋ, وڭدەۋشى ونەركاسىپ, ترانسپورت پەن ساقتاۋ سالاسى كوبىرەك ۇلەسىن قوسقان.
«ورتا جانە ءىرى كاسىپورىنداردىڭ قىزمەتى مەن تاۋارىنان تۇسكەن تابىس 12,5 ترلن تەڭگەنى قۇرايدى. بۇل بىلتىرمەن سالىستىرعاندا 13,4 پايىزعا كوپ. ال كاسىپورىنداردىڭ شىعىنى 9,1 ترلن تەڭگەگە جەتكەن. 2020-مەن سالىستىرعاندا 17 پايىزعا از», دەلىنگەن جوبا زەرتتەۋىندە.
